(ମହାଭାରତ, ବଣାଇ): ସୁନ୍ଦରଗଡ ଜିଲ୍ଲା ବଣାଇ ଥାନା ଅନ୍ତର୍ଗତ ଟିକିରାପୋଷ ଗାଁରେ ଅନ୍ଧ ବିଶ୍ୱାସର କରୁଣ ପରିଣତି ଦେଖିବାକୁ ମିଳିଛି । ଏଠାରେ ଗୁଣି ଗାରେଡି ସନ୍ଦେହରେ ଜଣେ ମହିଳାଙ୍କୁ ଟାଙ୍ଗିଆରେ ହାଣି ହତ୍ୟା କରାଯାଇଛି । ମୃତା ମହିଳା ଜଣକ ଟିକାୟତପାଲି ଗାଁର ବନ୍ଧନୀ ଓରାମ ବୋଲି ଜଣାପଡିଛି । ଏଥିରେ ଜଣେ ଦେଢ ବର୍ଷର ଶିଶୁ ମଧ୍ୟ ଗୁରୁତର ଆହତ ହୋଇଛି ।
ସୂଚନା ଅନୁଯାୟୀ, ବନ୍ଧନୀ ଟିକିରାପୋଷ ଗାଁରେ ତାଙ୍କ ଝିଅର ବାହାଘର କରିଥିବା ବେଳେ ତାକୁ ଦେଖିବା ପାଇଁ ବେଳେବେଳେ ତାଙ୍କ ଶାଶୂଘରକୁ ଯାଇଥାଆନ୍ତି । କିନ୍ତୁ ଝିଅର ଦିଅର ବନ୍ଧନୀଙ୍କ ଯିବା ଆସିବାକୁ ବିରୋଧ କରିଥାନ୍ତି । ଏପରିକି ବନ୍ଧନୀ ଗୁଣିଗାରେଡି କରୁଥିବାରୁ ତାଙଯକ ପରିବାର ଲୋକଙ୍କ ଦେହ ଭଲ ରହୁ ନଥିବା ଦିଅର ଅଭିଯୋଗ କରି ଆସୁଥିଲେ । ଏହା ସତ୍ତେ୍ୱ ଗତକାଲି ବନ୍ଧନୀ ତାଙ୍କ ଝିଅକୁ ଦେଖିବାକୁ ଆସିଥିଲେ । ରାତିରେ ସମସ୍ତେ ଖାଇ ସାରିବା ପରେ ଘର ବାହାରେ ନିଆଁ ପୁଇଁ ହେବା ବେଳେ ଦିଅର ରତିକାନ୍ତ ଏକ ଟାଙ୍ଗୀଆରେ ବନ୍ଧନୀଙ୍କୁ ଆକ୍ରମଣ କରିଥିଲେ । ଫଳରେ ଘଟଣାସ୍ଥଳରେ ହିଁ ତାଙ୍କର ମୃତ୍ୟୁ ହୋଇଥିଲା । ଏହି ଆକ୍ରମଣରେ ବନ୍ଧନୀଙ୍କ ପାଖରେ ଥିବା ରତିକାନ୍ତଙ୍କ ଦେଢ ବର୍ଷର ଭଣଜା ମଧ୍ୟ ଗୁରୁତର ଆହତ ହୋଇଛନ୍ତି । ତାଙ୍କୁ ବଣାଇ ଡାକ୍ତରଖାନାରେ ପ୍ରଥମେ ଭର୍ତ୍ତି କରାଯାଇଥିଲା । ପରେ ରାଉରକେଲା ଡାକ୍ତରଖାନାକୁ ସ୍ଥାନାନ୍ତର କରାଯାଇଛି । ଅନ୍ୟପଟେ ଅଭିଯୁକ୍ତ ରତିକାନ୍ତ ଘଟଣାସ୍ଥଳରୁ ଫେରାର ହୋଇଯାଇଛି । ପୋଲିସ ଘଟଣାସ୍ଥଳରେ ପହଞ୍ଚି ଶବ ଜବତ କରି ବ୍ୟବଚ୍ଛେଦ ପାଇଁ ପଠାଇବା ସହ ଘଟଣାର ତଦନ୍ତ ଆରମ୍ଭ କରିଛି ।
