(ମହାଭାରତ, କାଶୀପୁର): ସ୍ୱାଧୀନତାର ଅନେକ ବର୍ଷ ପରେ ମଧ୍ୟ ଗ୍ରାମାଞ୍ଚଳରେ ମୌଳିକ ସୁବିଧା ଅପହଞ୍ଚ ହୋଇଛି । ଗାଡି ଚଳାଚଳ ପାଇଁ ସାଧାରଣ ରାସ୍ତାଟିଏ ହୋଇପାରିନାହିଁ । ସଡକ ନଥିବାରୁ ଏକ ଜରୁରୀ କାଳୀନ ସେବାରୁ ବଞ୍ଚିତ ହୋଇଛନ୍ତି ଜଣେ ଗର୍ଭବତୀ ମହିଳା । ଫଳରେ ଜଣେ ଗର୍ବବତୀଙ୍କୁ ଷ୍ଟ୍ରେଚରରେ ନାଳ ନର୍ଦ୍ଦମା ଡେଇଁ ପ୍ରାୟ ୨ କିମି ଆଣିବାକୁ ପଡିଥିଲା । ଏହି ଅଭାବନୀୟ ଘଟଣାଟି ଘଟିଛି ରାୟଗଡା ଜିଲ୍ଲା କାଶୀପୁର ବ୍ଲକ ଅନ୍ତର୍ଗତ ଅଡାଜୋର ଗ୍ରାମ ପଞ୍ଚାୟତର ଦଳଗୁମ୍ମା ଗାଁରେ । ପୀଡିତା ଜଣକ ବିକ୍ରମ ମାଝିଙ୍କ ସ୍ତ୍ରୀ ହାମଦେଇ ମାଝି ବୋଲି ଜଣାପଡିଛି । ତେବେ ଏହି ଘଟଣାକୁ ନେଇ ସାଧାରଣରେ ତୀବ୍ର ଅସନ୍ତୋଷ ଦେଖା ଦେଇଛି ।
ସୂଚନା ଅନୁଯାୟୀ, ଦଳଗୁମ୍ମା ଗାଁର ବିକ୍ରମ ମାଝିଙ୍କ ପତ୍ନୀ ହାମଦେଇ ମାଝୀଙ୍କୁ ଶୁକ୍ରବାର ଅପରାହ୍ନରେ ପ୍ରସବ ଜନିତ ଯନ୍ତ୍ରଣା ହୋଇଥିଲା । ସମୟକ୍ରମେ ଯନ୍ତ୍ରଣା ବଢିବାରୁ ପରିବାର ଲୋକେ ୧୦୮ ଆମ୍ବୁଲାନ୍ସକୁ ଯୋଗାଯୋଗ କରିଥିଲେ । ଖବର ପାଇ ଆମ୍ବୁଲାନ୍ସ ଆସିଥିଲା । କିନ୍ତୁ ଗାଁ ପର୍ଯ୍ୟନ୍ତ ଯାଇ ପାରି ନଥିଲା । ଆଗକୁ ରାସ୍ତା ନଥିବାରୁ ଗାଁକୁ ଯାଇପାରି ନ ଥିଲା । ଗାଁ ଠାରୁ ଆମ୍ବୁଲାନ୍ସ ଥିବା ରାସ୍ତାର ଦୂରତା ୨ କିମି । କିନ୍ତୁ ଗାଁରେ ପସୂତି ମହିଳାଙ୍କୁ ବୋହି ଆଣିବାକୁ ପୁରୁଷ ଲୋକ ନ ମିଳିବାରୁ ଶେଷରେ ଗାଁ ମହିଳାମାନଙ୍କ ସହଯୋଗରେ ଆମ୍ବୁଲାନ୍ସ କର୍ମଚାରୀ ଜଣକ ହାତ ବଢାଇଥିଲେ । ଆମ୍ବୁଲାନ୍ସ ଫାର୍ମାସିଷ୍ଟ ନଳିନୀ ବିଡିକା, ଡ୍ରାଇଭର ଧବଳେଶ୍ୱର ପୁଜାରୀ ଓ ହେଲପର ସୀମାଞ୍ଚଳ ଗାଁର ମହିଳାମାନଙ୍କ ସହ ଉକ୍ତ ଗର୍ଭବତୀ ମହିଳାଙ୍କୁ ଷ୍ଟ୍ରେଚର ସାହାଯ୍ୟରେ ବୋହି ଆଣିଥିଲେ । ଏଥିପାଇଁ ଅନେକ କଷ୍ଟ ସ୍ୱୀକାର କରିବାକୁ ପଡିଥିଲା । ରାସ୍ତାରେ ନାଳ ପାରି ହେବା ପରେ ପ୍ରାୟ ୨ କିମି ବାଟ ବୁହା ହେବା ପରେ ଗର୍ଭବତୀ ମହିଳା ଚିକିତ୍ସା ପାଇଁ କାଶୀପୁର ଗୋଷ୍ଠି ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି ହୋଇଥିଲେ । ଫଳରେ ଗର୍ଭବତୀ ଓ ଗର୍ଭସ୍ଥ ଶିଶୁ ସୁସ୍ଥ ଥିବା ସୂଚନା ମିଳିଛି । ଆମ୍ବୁଲାନ୍ସ କର୍ମଚାରୀଙ୍କ ଏଭଳି କାର୍ଯ୍ୟ ଏବେ ସାଧାରଣରେ ଚର୍ଚ୍ଚାର ବିଷୟ ପାଲଟିଛି ।
