ସ୍ୱାଧୀନତା ଦିବସରେ ୧୦୫୭ ପୋଲିସ ଓ ସୁରକ୍ଷାକର୍ମୀଙ୍କୁ ସମ୍ମାନ

ସ୍ୱାଧୀନତା ଦିବସ ଅବସରରେ ଦେଶର ୧୦୫୭ ଜଣ ପୋଲିସ, ଅଗ୍ନିଶମ ସେବା, ହୋମଗାର୍ଡ ଓ ସିଭିଲ୍ ଡିଫେନ୍ସ ଏବଂ କାରାଗାର ସେବାର କର୍ମଚାରୀଙ୍କୁ ଗ୍ୟାଲେଣ୍ଟ୍ରି ଓ ସର୍ଭିସ୍ ମେଡାଲ୍‌ରେ ସମ୍ମାନିତ କରାଯାଇଛି। କେନ୍ଦ୍ର ଗୃହ ମନ୍ତ୍ରଣାଳୟ ପକ୍ଷରୁ ଏହି ସମ୍ମାନ ଘୋଷଣା କରାଯାଇଛି।

ମୋଟ ୩୦୧ଟି ମେଡାଲ୍ ଫର୍ ଗ୍ୟାଲେଣ୍ଟ୍ରି ପ୍ରଦାନ କରାଯାଇଛି। ଏଥିରୁ ୨୭୨ଟି ପୋଲିସ କର୍ମଚାରୀଙ୍କୁ ଏବଂ ୨୯ଟି ଅଗ୍ନିଶମ ସେବା କର୍ମଚାରୀଙ୍କୁ ମିଳିଛି। ଏହି ପଦକଗୁଡ଼ିକ ସାହସିକ କାର୍ଯ୍ୟ, ଜୀବନ ଓ ସମ୍ପତ୍ତି ରକ୍ଷା, ଅପରାଧ ରୋକିବା ଏବଂ ଅପରାଧୀଙ୍କୁ ଧରିବା ସମୟରେ ଦେଖାଇଥିବା ବୀରତା ପାଇଁ ଦିଆଯାଇଛି।

ଗ୍ୟାଲେଣ୍ଟ୍ରି ମେଡାଲ୍ ପାଇଥିବା ୩୦୧ ଜଣଙ୍କ ମଧ୍ୟରୁ ୧୯୭ ଜଣ ବାମପନ୍ଥୀ ଉଗ୍ରବାଦ ପ୍ରଭାବିତ ଅଞ୍ଚଳରେ ସେବା କରୁଥିବାବେଳେ ସାହସିକ କାର୍ଯ୍ୟ ପାଇଁ ସମ୍ମାନିତ ହୋଇଛନ୍ତି। ୫୧ ଜଣ ଜମ୍ମୁ-କଶ୍ମୀର, ୧୨ ଜଣ ଉତ୍ତର-ପୂର୍ବ ଅଞ୍ଚଳ ଏବଂ ୪୧ ଜଣ ଅନ୍ୟ ଅଞ୍ଚଳରୁ ରହିଛନ୍ତି।

ଏହାବ୍ୟତୀତ ପ୍ରେସିଡେଣ୍ଟ୍‌ସ ମେଡାଲ୍ ଫର୍ ଡିଷ୍ଟିଙ୍ଗୁଇସ୍ଡ ସର୍ଭିସ୍ (PSM) ପାଇଁ ୯୨ ଜଣଙ୍କୁ ଚୟନ କରାଯାଇଛି। ସେଥିରୁ ୮୩ଟି ପୋଲିସ ସେବା, ୪ଟି ଅଗ୍ନିଶମ ସେବା, ୩ଟି ସିଭିଲ୍ ଡିଫେନ୍ସ ଓ ହୋମଗାର୍ଡ ସେବା ଏବଂ ୨ଟି କାରାଗାର ସେବା ପାଇଁ ରହିଛି। ସେହିପରି ମେଡାଲ୍ ଫର୍ ମେରିଟୋରିଅସ୍ ସର୍ଭିସ୍ (MSM) ଭାବେ ୬୬୪ଟି ପଦକ ଦିଆଯାଇଛି। ଏଥିରୁ ୬୦୬ଟି ପୋଲିସ, ୨୮ଟି ଅଗ୍ନିଶମ, ୧୮ଟି ସିଭିଲ୍ ଡିଫେନ୍ସ ଓ ହୋମଗାର୍ଡ ଏବଂ ୧୨ଟି କାରାଗାର ସେବା ପାଇଁ ରହିଛି। ସ୍ୱାଧୀନତା ଦିବସ ପୂର୍ବରୁ ଘୋଷିତ ଏହି ସମ୍ମାନ ଦେଶର ସୁରକ୍ଷା ଓ ଜନସେବାରେ ନିଷ୍ଠା, ସାହସ ଓ ଉତ୍ସର୍ଗୀକୃତ ସେବା ପାଇଁ କର୍ମଚାରୀମାନଙ୍କ ଅବଦାନକୁ ସ୍ୱୀକୃତି ଦେଇଛି।