ମୁଜଫରନଗର: ଦୁର୍ଘଟଣାରେ ପ୍ରବାସୀ ଶ୍ରମିକଙ୍କ ମୃତ୍ୟୁ ଘଟଣା ଥମିବାର ନାମ ନେଉନାହିଁ । ପୁଣି ଉତ୍ତରପ୍ରଦେଶର ମୁଜଫରନଗରରେ ବୁଧବାର ବିଳମ୍ବିତ ରାତିରେ ଏକ ସଡ଼କ ଦୁର୍ଘଟଣାରେ ୬ ପ୍ରବାସୀଙ୍କ ମୃତ୍ୟୁ ହୋଇଛି । ମୃତ ଶ୍ରମିକମାନେ ବିହାର ଗୋପାଳଗଞ୍ଜର ବୋଲି ଜଣାପଡ଼ିଛି। ବିହାରର ଏହି ଯୁବକ ଚାଲି ଚାଲି ଯାଉଥିବା ସମୟରେ ବସ୍ ଚଢ଼ିଯାଇଥିଲା । ଫଳରେ ୬ ଜଣଙ୍କର ମୃତ୍ୟୁ ଘଟିଛି। ଘଲୌଲୀ ଚେକ୍ପୋଷ୍ଟ ନିକଟରେ ଏହି ଦୁର୍ଘଟଣା ଘଟିଛି। ଅନ୍ୟ ୪ ଶ୍ରମିକ ଏଥିରେ ଗୁରୁତର ଆହତ ହୋଇଛନ୍ତି।
ପଞ୍ଜାବରେ କାମ କରୁଥିବା ବିହାର ଶ୍ରମିକ ଲକଡାଉନରେ ହଇରାଣ ହେବା ପରେ ଶେଷରେ ନିଜ ଗାଁକୁ ଫେରୁଥିଲେ ଚାଲିଚାଲି । ଗତକାଲି ବିଳମ୍ବିତ ରାତିରେ ମୁଜଫରନଗର-ସହାରନପୁର ରାଜ୍ୟ ରାଜପଥ-୫୯ରେ ଚାଲି ଚାଲି ଯାଉଥିଲେ। ରାତି ପ୍ରାୟ ୧୧ଟା ୪୫ରେ ଏକ ବସ୍ ଶ୍ରମିକମାନଙ୍କ ଉପରେ ଚଢ଼ି ଯାଇଥିଲା। ଅନ୍ଧାର ଯୋଗୁ ଡ୍ରାଇଭର ବସ୍କୁ ନେଇ ଫେରାର ହୋଇଯାଇଥିଲା।
ଚାଲିଚାଲି ଯାଉଥିବା ପ୍ରାବସୀଙ୍କ ଉପରେ ମାଡିଗଲା ବସ, ୬ ମୃତ
