କଟକ: କେନ୍ଦ୍ରାଞ୍ଚଳ ରାଜସ୍ବ ଆୟୁକ୍ତ (ଆରଡିସି) ତଥା କଟକ ମହାନଗର ନିଗମ (ସିଏମସି) ଅଧିକାରୀ ଅନିଲ ସାମଲଙ୍କ ଅବସରର ତତ୍କ୍ଷଣାତ୍ ତାଙ୍କୁ ନୂତନ ଦାୟିତ୍ୱ ଦିଆଯାଇଛି । ଗୁରୁବାର ସିଏମସି ପଦରୁ ସ।।ମଲ ଅବସର ଗ୍ରହଣ କରିଥିବା ବେଳେ ତାଙ୍କୁ ତତ୍କ୍ଷଣାତ୍ ରାଜ୍ୟ ସରକାରଙ୍କ ଗୃହ ଓ ନଗର ଉନ୍ନୟନ ବିଭାଗ ପକ୍ଷରୁ ନିଯୁକ୍ତି ଦିଆଯାଇଛି। କଟକ ଉନ୍ନୟନ କର୍ତ୍ତୃପକ୍ଷ (ସିଡିଏ)ର ଅଧ୍ୟକ୍ଷ ଓ ନିଗମର ପ୍ରଶାସକ ଭାବେ ସେ ଗୋଟିଏ ବର୍ଷ ପାଇଁ କାର୍ୟ୍ୟ କରିବେ ବୋଲି ବିଜ୍ଞପ୍ତି ପ୍ରକାଶ ପାଇଛି। ଓଡ଼ିଶା ଉନ୍ନୟନ କର୍ତ୍ତୃପକ୍ଷ ନିୟମ, ୧୯୮୨ ଧାରା ୩ ଏବଂ ଉପଧାରା ୫ (କ) ଅନୁସାରେ ନଗର ଉନ୍ନୟନ ବିଭାଗ ଏହି ନୂତନ ଦାୟିତ୍ବ ଅର୍ପଣ କରିଛି।
ଏହା ପୂର୍ବରୁ ସାମଲ ଆଇଜିଆର, ଅତିରିକ୍ତ ପରିବହନ ଆୟୁକ୍ତ ଏବଂ ଶ୍ରୀ ଜଗନ୍ନାଥ ସଂସ୍କୃତ ବିଶ୍ବବିଦ୍ୟାଳୟର କୁଳପତି ଭାବେ କାର୍ଯ୍ୟ କରିଥିଲେ । ସେ ଯାଜପୁର ଓ ଅନୁଗୋଳ ଜିଲାର ଜିଲାପାଳ ଏବଂ ପର୍ୟ୍ୟଟନ ନିର୍ଦେଶକ ଭାବେ କାର୍ଯ୍ୟ କରି ସଫଳତାର ହାସଲ କରିଥିଲେ। ବିଶେଷକରି ପୁରୀ ଶ୍ରୀମନ୍ଦିର, ଲିଙ୍ଗରାଜ ମନ୍ଦିର ଓ ସମ୍ବଲପୁର ମା’ ସମଲେଶ୍ବରୀ ମନ୍ଦିରର ଉନ୍ନତିକରଣ, ବଡ଼ଡାକ୍ତରଖାନା ଉନ୍ନତିକରଣ, ତାଳଦଣ୍ଡା କେନାଲ ରାସ୍ତା ସମ୍ପ୍ରସାରଣ, ନୂତନ ବସ ଟର୍ମିନାଲ ଆରମ୍ଭ ଓ ବସ୍ତିବାସିନ୍ଦାଙ୍କୁ ଥଇଥାନ ପ୍ରଭୃତିରେ ତାଙ୍କର ଭୂମିକା ରହିଥିଲା।
