ମହାରାଷ୍ଟ୍ର ରାଜନୀତିରେ ଏବେ ଏକ ନୂଆ ଚର୍ଚ୍ଚା ଜୋର୍ ଧରିଛି। ଶରଦ ପାୱାରଙ୍କ ଦଳ (NCP-SP) କଂଗ୍ରେସ ସହ ମିଶ୍ରଣ ହେବା ନେଇ ଚାଲିଥିବା ଗୁଜବ ଉପରେ ଏବେ କଂଗ୍ରେସର ବରିଷ୍ଠ ନେତାମାନେ ସ୍ପଷ୍ଟୀକରଣ ଦେଇଛନ୍ତି। ମହାରାଷ୍ଟ୍ର କଂଗ୍ରେସ ସଭାପତି ନାନା ପାଟୋଲେ ଏବଂ ପୂର୍ବତନ ମୁଖ୍ୟମନ୍ତ୍ରୀ ପୃଥ୍ୱୀରାଜ ଚଭନ ଏହି ପ୍ରସଙ୍ଗରେ ବଡ଼ ପ୍ରତିକ୍ରିୟା ରଖିଛନ୍ତି।
ମହାରାଷ୍ଟ୍ର କଂଗ୍ରେସର ବରିଷ୍ଠ ନେତା ନାନା ପାଟୋଲେ କହିଛନ୍ତି ଯେ, ଶରଦ ପାୱାରଙ୍କ ଦଳ କଂଗ୍ରେସରେ ମିଶିବା ନେଇ ଦଳ ଭିତରେ ଏପରି କୌଣସି ଆଲୋଚନା ହୋଇନାହିଁ। ଏହା କେବଳ ଏକ ଗୁଜବ। ଅସଲ ଓ ମୂଳ ପ୍ରସଙ୍ଗରୁ ଲୋକଙ୍କ ଧ୍ୟାନ ହଟାଇବା ପାଇଁ ଏଭଳି ମିଛ ଖବର ପ୍ରଚାର କରାଯାଉଛି।
ଅନ୍ୟପଟେ ପୂର୍ବତନ ମୁଖ୍ୟମନ୍ତ୍ରୀ ପୃଥ୍ୱୀରାଜ ଚଭନ କହିଛନ୍ତି ଯେ, ସେ ଖବରକାଗଜରୁ ଏହି ମିଶ୍ରଣ ଖବର ବିଷୟରେ ଜାଣିବାକୁ ପାଇଛନ୍ତି, କିନ୍ତୁ ବ୍ୟକ୍ତିଗତ ଭାବେ ସେ ଏବାବଦରେ ଅଜ୍ଞ ଥିଲେ। ତଥାପି ସେ ଏକ ବଡ଼ ଇସାରା ଦେଇ କହିଛନ୍ତି, ଯେଉଁ ଦଳଗୁଡ଼ିକ ନିଜ ନାମରୁ ‘କଂଗ୍ରେସ’ ଶବ୍ଦ ହଟାଇ ନାହାନ୍ତି, ତାହା ତୃଣମୂଳ କଂଗ୍ରେସ (TMC) ହେଉ କିମ୍ବା ଏନସିପି (NCP), ସେମାନେ ଏବେ ନିଜ ମୂଳ ଘରକୁ (କଂଗ୍ରେସକୁ) ଫେରି ଆସିବା ଉଚିତ।
