ସବୁ ଆଶଙ୍କାରେ ପଡ଼ିଛି ପୂର୍ଣ୍ଣଛେଦ । ଡିଫେଣ୍ଡିଂ ଚାମ୍ପିଅନ୍ ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ ଦଳର ଘରୋଇ ଗ୍ରାଉଣ୍ଡ ଚିନ୍ନାସ୍ୱାମୀ ଷ୍ଟାଡ଼ିୟମକୁ ମିଳିଛି ସବୁଜ ସଂକେତ । କର୍ଣ୍ଣାଟକ ସରକାର ଏହି ଷ୍ଟାଡିୟମରେ ଆଇପିଏଲ୍ ମ୍ୟାଚ୍ ଆୟୋଜନ ପାଇଁ କର୍ଣ୍ଣାଟକ ରାଜ୍ୟ କ୍ରିକେଟ୍ ସଂଘ (କେଏସସିଏ)କୁ ଅନୁମତି ପ୍ରଦାନ କରିଛନ୍ତି । ଏଣିକି ଆଇପିଏଲ୍ ମ୍ୟାଚ ସମେତ ଅନ୍ୟାନ୍ୟ ଘରୋଇ, ଅନ୍ତର୍ଜାତୀୟ ମ୍ୟାଚ ଏହି ଷ୍ଟାଡିୟମରେ ଆୟୋଜନ କରିହେବ । ଆଗାମୀ ଆଇପିଏଲ୍ରେ ରୟାଲ୍ ଚ୍ୟାଲେଞ୍ଜର୍ସ ଚିନ୍ନାସ୍ୱାମୀ ଷ୍ଟାଡ଼ିୟମ୍ରେ ୫ଟି ଘରୋଇ ମ୍ୟାଚ ଖେଳିବ ।
ଚଳିତ ମାସ ୨୮ ତାରିଖରୁ ଆଇପିଏଲ ଆରମ୍ଭ ହେବ । ଡିଫେଣ୍ଡିଂ ଚାମ୍ପିଅନ ରୟାଲ୍ ଚ୍ୟାଲେଞ୍ଜର୍ସ ବେଙ୍ଗାଲୁରୁ ଉଦ୍ଘାଟନୀ ମୁକାବିଲାରେ ସନରାଇଜର୍ସ ହାଇଦ୍ରାବାଦକୁ ଭେଟିବ । ଚିନ୍ନାସ୍ୱାମୀ ଷ୍ଟଡ଼ିୟମ୍କୁ ଉଦଘାଟନୀ ମ୍ୟାଚ ଆୟୋଜନ କରିବାକୁ ଅନୁମତି ମିଳିଛି । ଆଇପିଏଲ୍ର ନିୟମ ଅନୁଯାୟୀ ଡିଫେଣ୍ଡିଂ ଚାମ୍ପିଅନ ଦଳକୁ ଉଦ୍ଘାଟନୀ ଓ ଫାଇନାଲ୍ ମ୍ୟାଚ ଆୟୋଜନ କରିବାକୁ ସୁଯୋଗ ଦିଆଯାଏ । ରୟାଲ ଚ୍ୟାଲେଞ୍ଜର୍ସ ଗତ ବର୍ଷ ଚାମ୍ପିଅନ୍ ହୋଇଥିବାରୁ ଏଥର ଉଭୟ ମ୍ୟାଚ ଆୟୋଜନ କରିବ । ଏହା ବ୍ୟତୀତ ଷ୍ଟାଡ଼ିୟମ୍ ଘରୋଇ ଦଳର ୫ଟି ମ୍ୟାଚ ସମେତ ଏକ ପ୍ଲେ-ଅଫ୍ ମ୍ୟାଚ ମଧ୍ୟ ଆୟୋଜନ କରିବାକୁ ସୁଯୋଗ ପାଇବ ।
