ସିଏଏକୁ ନୁହେଁ ବିକାଶକୁ ଲୋକେ ପସନ୍ଦ କରିଛନ୍ତି: ମମତା

(କୋଲକାତା): ଦିଲ୍ଲୀ ବିଧାନସଭା ନିର୍ବାଚନ ଫଳାଫଳ ପ୍ରକାଶ ପାଇବା ପୂର୍ବରୁ ମଙ୍ଗଳବାର ଭୋଟ ଗଣତି ଚାଲିଥିବା ବେଳେ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ଆଗୁଆ କେଜ୍ରିୱାଲଙ୍କୁ ଶୁଭେଚ୍ଛା ଜଣାଇଥିଲେ । ମଧ୍ୟାହ୍ନ ୧ଟା ସୁଦ୍ଧା ଆପ୍ ୫୮ ଆସନରେ ଆଗୁଆ ଥିବା ଦେଖି ଦିଲ୍ଲୀବାସୀ ବିଜେପିକୁ ଗ୍ରହଣ କରି ନ ଥିବା ସେ କହିଥିଲେ । ଦିଲ୍ଲୀବାସୀ ବିଜେପିକୁ ପ୍ରତ୍ୟାଖ୍ୟାନ କରିଛନ୍ତି । ପୂର୍ବରୁ ମହାରାଷ୍ଟ୍ର ଓ ଝାଡଖଣ୍ଡରେ ମଧ୍ୟ ଲୋକେ ଦଳକୁ ଗ୍ରହଣ କରିନାହାନ୍ତି ବୋଲି ସେ ମତ ଦେଇଥିଲେ । ବିଜେପିକୁ ସର୍ବଦା ସମାଲୋଚନା କରୁଥିବା ମମତା ଆହୁରି କହିଛନ୍ତି ଯେ, ସିଏଏ, ଏନଆରସି ଓ ଏନପିଆରକୁ ମଧ୍ୟ ଦେଶବ୍ୟାସୀ ଗ୍ରହଣ କରିବେ ନାହିଁ । କାରଣ ଏଗୁଡିକ ଆଳରେ ନିର୍ବାଚନରେ ସମର୍ଥନ ହାସଲ କରାଯାଇପାରିବ ନାହିଁ । ବିଜେପି ମିଛ କହି ପ୍ରତିଶୋଧର ରାଜନୀତି କରୁଛି । ଯେଉଁଥି ପାଇଁ ତାକୁ ପରାଜିତ ହେବାକୁ ପଡିଛି । ଦିଲ୍ଲୀରେ କେବଳ ବିକାଶ ହିଁ କାମ କରିବ । କେଜ୍ରିୱାଲଙ୍କ ବିକାଶ ମୂଳକ କାମ ଲୋକଙ୍କ ମନକୁ ପାଇଛି । ବିଜୟ ପାଇଁ କେଜ୍ରିୱାଲଙ୍କୁ ଶୁଭେଚ୍ଛା ଜଣାଇଥିବା ବୋଲି ସେ କହିଛନ୍ତି ।