୨୦୨୪ ନୂଆବର୍ଷ ଦିନ ଜାପାନରେ ଅନୁଭୂତ ହୋଇଥିବା ୭.୬ ତୀବ୍ରତାର ଭୂକମ୍ପ ଓ ପରେପରେ ଅଦ୍ୟାବଧି ଅନୁଭୂତ ହୋଇଥିବା ପ୍ରାୟ ୧୫୫ଟି ଭୂକମ୍ପରେ ପ୍ରାୟ ୫୦ ଲୋକଙ୍କ ମୃତ୍ୟୁ ଘଟିବା ସହ ବହୁ ଲୋକ ଆହତ ହୋଇଛନ୍ତି ଏବଂ ହଜାର ହଜାର ଲୋକ ବିସ୍ଥାପିତ ହୋଇଛନ୍ତି। ସୁନାମିରେ ଅନେକ ଘର ଓ କାର୍ ଭାସିଯାଇଛି।
ସୂଚନାନୁଯାୟୀ , ପ୍ରାୟ ୩୩,୦୦୦ ଲୋକ ଏବେ ବିଜୁଳି ଅଭାବରୁ ଅନ୍ଧାରରେ ଅଛନ୍ତି। ରାଜପଥ ସମେତ ଦେଶର ଅନେକ ରାସ୍ତା ଓ ରେଳରାସ୍ତା କ୍ଷତିଗ୍ରସ୍ତ ହୋଇଥିବାରୁ ସଡ଼କ ପରିବହନ ବ୍ୟବସ୍ଥା ବିପର୍ଯ୍ୟସ୍ତ ହୋଇପଡ଼ିଛି। ଫଳରେ ଉଦ୍ଧାର କାର୍ଯ୍ୟରେ ବାଧା ସୃଷ୍ଟି ହେଉଛି। ସୋମବାର ଅପରାହ୍ଣରେ ୭.୬ ତୀବ୍ରତାର ଭୂକମ୍ପ ଅନୁଭୂତ ହେବା ପରେ ପଶ୍ଚିମ ଉପକୂଳରେ ସୁନାମି ଉଠିଥିଲା ଏବଂ ଅନେକ କାର୍ ଓ ଘର ସମୁଦ୍ରକୁ ଧୋଇ ହୋଇ ଯାଇଥିଲା। ଦେଶର ନିପଟ ନୋଟୋ ପେନିନସୁଲା ଅଞ୍ଚଳ ସବୁଠାରୁ ବେଶି ପ୍ରଭାବିତ ହୋଇଥିବା ବେଳେ ସେଠାରେ ସେନା କର୍ମଚାରୀମାନଙ୍କୁ ଉଦ୍ଧାର କାର୍ଯ୍ୟରେ ନିୟୋଜିତ କରାଯାଇଛି।
