ଭୋପାଳ: ଲକଡାଉନ ଭିତରେ ପୁଣି ପ୍ରବାସୀ ଶ୍ରମିକଙ୍କ ହିଂସା ଉଗ୍ର ରୂପ ନେଇଛି । ମଧ୍ୟପ୍ରଦେଶ ଓ ମହାରାଷ୍ଟ୍ର ସୀମାନ୍ତ ଜିଲା ବରୱାନୀର ସେନ୍ଧୱାଠାରେ ପ୍ରବାସୀ ଶ୍ରମିକଙ୍କ ବିକ୍ଷୋଭ ହିଂସାତ୍ମକ ରୂପ ନେଇଛି। ଖାଦ୍ୟ କିମ୍ବା ଗମନାଗମନ ବ୍ୟବସ୍ଥା କରି ନ ଥିବା ପ୍ରତିବାଦରେ ଶହସ୍ରାଧିକ ପ୍ରବାସୀ ଶ୍ରମିକ ପ୍ରଶାସନିକ ଅଧିକାରୀଙ୍କ ଉପରକୁ ଢ଼େଲାପଥର ମାଡ଼ କରିଛନ୍ତି। ବୁଧବାର ସନ୍ଧ୍ୟାରୁ ସ୍ଥାନୀୟ ଜାତୀୟ ରାଜପଥ-୩ କଡ଼ରେ ଭୋକ ଉପାସରେ ମହିଳା ଓ ଶିଶୁଙ୍କ ସମେତ ହଜାର ହଜାର ଶ୍ରମିକ ପଡ଼ି ରହିଥିଲେ । ଶେଷରେ ସେମାନଙ୍କ ଅସନ୍ତୋଷ ଉଗ୍ର ନେଇଥିଲା ଓ ମଧ୍ୟପ୍ରଦେଶ ସରକାରଙ୍କ ବିରୋଧରେ ବିଷୋଦ୍ଗର କରିଥିଲେ। ମହାରାଷ୍ଟ୍ର ସରକାର ଏହି ସୀମାନ୍ତ ପର୍ୟ୍ୟନ୍ତ ସେମାନଙ୍କୁ ପଠାଇବା ବ୍ୟବସ୍ଥା କରିଥିବାବେଳେ ମଧ୍ୟପ୍ରଦେଶ ସରକାର କିଛି ବୁଝୁ ନ ଥିବା ସେମାନେ ଅଭିଯୋଗ କରିଥିଲେ। କିଛି ବସ୍ ସେଠାରୁ ଫେରିଯିବା ପରେ ଶ୍ରମିକମାନେ ଉତ୍ତ୍ୟକ୍ତ ହୋଇପଡ଼ିଥିଲେ; ପରେ ୧୩୫ଟି ବସ୍ ଯୋଗେ ସେମାନଙ୍କୁ ନିଜ ଅଞ୍ଚଳକୁ ପଠାଯାଇଥିଲା ବୋଲି କହିଛନ୍ତି ସ୍ଥାନୀୟ ଜିଲାପାଳ। ଏହି ଶ୍ରମିକମାନେ ମହାରାଷ୍ଟ୍ରର ପୁଣେରୁ ନିଜ ରାଜ୍ୟକୁ ଫେରୁଥିଲେ।
ମଧ୍ୟପ୍ରଦେଶ- ମହାରାଷ୍ଟ୍ର ସୀମାନ୍ତରେ ପ୍ରବାସୀ ଶ୍ରମିକଙ୍କ ତାଣ୍ଡବ
