ଭୁବନେଶ୍ୱର/ଶିଳାସ୍ମିତା ରାୟ: କିଛି ଦିନ ତଳେ ଗଞ୍ଜାମ ଜିଲ୍ଲା ବୁଗୁଡା ବ୍ଲକ ଶିକ୍ଷାଧିକାରୀଙ୍କ ଠାରୁ ବଟି ମାଗି ୩ ଜଣ ଗିରଫ ହେଲେ । କିନ୍ତୁ ସବୁଠାରୁ ଦୁର୍ଭାଗ୍ୟପୂର୍ଣ୍ଣ ବିଷୟ ଏହି ତିନି ଜଣ କୌଣସି ଗୁଣ୍ଡା ଶ୍ରେଣୀୟ ଲୋକ ନ ଥିଲେ । ସମସ୍ତେ ସାମ୍ବାଦିକ । ଦୁଇ ଜଣ ବଡ ବଡ ନାମକରା ଗଣମାଧ୍ୟମର ସାମ୍ବାଦିକ ହୋଇଥିବା ବେଳେ ଅନ୍ୟ ଜଣକ ଏକ ନୂଆ ଚ୍ୟାନେଲର ସାମ୍ବାଦିକ । ବାରମ୍ବାର ସାମ୍ବାଦିକଙ୍କ ବଟି ଆଦାୟ ପରି ଘଟଣାକୁ ନେଇ ଲଜ୍ଜାରେ ମୁଣ୍ଡ ନଇଁ ଯାଉଛି । ଏପରି କିଛି ଲୋକଙ୍କ ପାଇଁ ସବୁ ଗଣମାଧ୍ୟମ ନିନ୍ଦିତ । ଏମିତି କିଛି ସାମ୍ବାଦିକଙ୍କ ପାଇଁ ପୂରା ସାମ୍ବାଦିକ ଗୋଷ୍ଠୀ ଲଜ୍ଜିତ ହେଉଛନ୍ତି । ତେବେ ଏପରି ହେବା ପଛର କାରଣ କଣ? କାହିଁ ଏପରି ହେଉଛି ଓ ଏହାକୁ ପ୍ରୋତ୍ସାହନ ଦେବାରେ ଗଣମାଧ୍ୟମ ସଂସ୍ଥା ଓ ତାର ମୁଖ୍ୟ ତଥା ମାଲିକଙ୍କର କିଛି ଭୂମିକା ରହୁ ନାହିଁ ତ? ବର୍ତ୍ତମାନ ସମୟ ଆସିଛି ଏସବୁ ଉପରେ ତର୍ଜମା କରିବାର । ଗଣତନ୍ତ୍ରର ଚତୁର୍ଥ ସ୍ତମ୍ଭ ପ୍ରତି ବିପଦ ସୃଷ୍ଟି କରୁଥିବା ବିଭିନ୍ନ ତତ୍ୱକୁ ଦୂର କରିବାର ଆବଶ୍ୟକତା ବର୍ତ୍ତମାନ ଜରୁରୀ ହୋଇ ପଡିଛି ।
ଏଥିରେ ବ୍ୟକ୍ତିଗତ ସ୍ତରରୁ ଆରମ୍ଭ କରି ସରକାରୀ କଳ ପର୍ଯ୍ୟନ୍ତ ସମସ୍ତେ ଭାଗିଦାର ପରି ମନେ ହେଉଛି । ସାଧାରଣତଃ ସତ୍ୟ ଉପସ୍ଥାପନ କରିବାକୁ ଯାଇ ସରକାରୀ କଳର ଦୋଷ ଦୁର୍ବଳତା ପଦାକୁ ଆସେ । ଫଳରେ ଉକ୍ତ ସାମ୍ବାଦିକଙ୍କ ଉପରେ ଅନେକଙ୍କ ନଜର ଥାଏ । ତେଣୁ ସେହି ସାମ୍ବାଦିକଙ୍କୁ କିଣିବାକୁ ଚେଷ୍ଟା କରାଯାଏ । ଅନେକ ସମୟରେ ସରକାରୀ କଳ, ଦୁର୍ନୀତିଖୋର ନିଜ ସପକ୍ଷରେ ଖବର ପ୍ରସାରଣ ପାଇଁ ମଧ୍ୟ ସାମ୍ବାଦିକଙ୍କୁ ଲାଞ୍ଚ ଦେଇଥାନ୍ତି । ଏଇଥିରୁ ଆରମ୍ଭ ହୁଏ ସାମ୍ବାଦିକତା କ୍ଷେତ୍ରରେ ଦିଆ ନିଆର କାରବାର ।
କିଛି ବଡ ବଡିଆ ସାମ୍ବାଦିକଙ୍କୁ ମାଲେମାଲେ ହେବାର ଦେଖି ତଳତଳିଆ ସାମ୍ବାଦିକ ମଧ୍ୟ ମାରି ପିଟି ଖାଇବା ଫର୍ମୁଲା ଆପଣେଇ ନେଉଛନ୍ତି । ଆଉ କିଛି ଦଲାଲ ମଧ୍ୟ ସାମ୍ବାଦିକତାକୁ ଅର୍ଥ ଉପାର୍ଜନର ଏକ ସହଜ ବାଟ ଭାବେ ଆପଣେଇ ନେଉଛନ୍ତି । ଦୁର୍ନୀତିଖୋରଙ୍କ ବିରୋଧରେ ଲେଖି ସେମାନଙ୍କ ମଧ୍ୟରେ ଭୟ ସୃଷ୍ଟି କରିବାକୁ ଚେଷ୍ଟା କରିବା ସହ ସେମାନଙ୍କଠାରୁ ଅର୍ଥ ହଡପ କରନ୍ତି । ଯେମିତି କିଛି ଦିନ ତଳେ ଗଞ୍ଜାମରୁ ୩ ଜଣ ସାମ୍ବାଦିକ ବଟି ଆଦାୟ କରିବାକୁ ଯାଇ ଧରାପଡିଛନ୍ତି ।
ସାମ୍ବାଦିକତା କ୍ଷେତ୍ର ସହ ଆର୍ଥିକ ଅନଟନ ଲାଗିରହିଛି । ତେଣୁ ଅନେକ ସଂସ୍ଥା ସେମାନଙ୍କ କର୍ମଚାରୀଙ୍କୁ ଦରମା ଦେଇ ନ ଥାନ୍ତି । ଗୋଟିଏ ପଟେ ସାମ୍ବାଦିକ ହେବାର ନିଶା, ଅନ୍ୟପଟେ ପରିବାର ପ୍ରତିପୋଷଣର ଭାର । ତେଣୁ କିଛି ସାମ୍ବାଦିକ ପରିବାର ପ୍ରତିପୋଷଣ ପାଇଁ ଦୁର୍ନୀତିଖୋରଙ୍କୁ ନିଜ ରୋଜଗାରର ସାଧନ ଭାବନ୍ତି । ଦୂର୍ନୀତିଖୋର ମଧ୍ୟ ସେହିସବୁ ସାମ୍ବାଦିକଙ୍କୁ ଅଳ୍ପ କିଛି ଅର୍ଥ ଦେଇ ଖୁସି ହେବା ସହ ସାମ୍ବାଦିକଙ୍କ ପରିବାର ମଧ୍ୟ ସୁରୁଖୁରୁରେ ଚଳେ । ଫଳରେ ସାମ୍ବାଦିକତା କଳୁଷିତ ହେଉଛି । ଏହି କ୍ଷେତ୍ରରେ ସାମ୍ବାଦିକ ନିଜ ନୀତି ଆଦର୍ଶରୁ ଓହରିବା କାରଣ ଦାରିଦ୍ର୍ୟ ବୋଲି କୁହାଯାଇ ପାରିବ ।
ବର୍ତ୍ତମାନ ବଜାରରେ ଆଉ ଏକ ପ୍ରକାରର ବଟି ସଂଗ୍ରହର ଚଳଣି ଆରମ୍ଭ ହୋଇଛି, ଯାହା ଅତ୍ୟନ୍ତ ମାରାତ୍ମକ । ଏହାକୁ ସଂସ୍ଥା ପ୍ରୋତ୍ସାହନ ଦେଉଛନ୍ତି । ଆଉ ଏହି ସଂସ୍ଥାର ପ୍ରତିଷ୍ଠାତା ରାଜ୍ୟର କିଛି ନାମକରା ସାମ୍ବାଦିକ । ସାମ୍ବାଦିକତା କ୍ଷେତ୍ରରେ ବେଶ ନାମ କମେଇଛନ୍ତି । ସେମାନେ ସଂସ୍ଥା ଖୋଲି ଖୋଲାଖୋଲି ଦରମା ଦେଇ ପାରିବେ ନାହିଁ ବୋଲି କହିବା ସହ ସେମାନଙ୍କ ନିକଟରେ କାମ କରୁଥିବା ସାମ୍ବାଦିକଙ୍କୁ ସେମାନଙ୍କ କ୍ଷେତ୍ରରୁ ଅର୍ଥ ଉପାର୍ଜନ ପାଇଁ ଖୋଲା ଛୁଟ ଦେଉଛନ୍ତି । ପ୍ରତିଷ୍ଠାତା ଖୋଲା ଖୋଲି ସାମ୍ବାଦିକତା ବୃତ୍ତିକୁ ଲଜ୍ଜିତ କରି ସାମ୍ବାଦିକଙ୍କୁ ପ୍ରୋତ୍ସାହନା ଦେଉଛନ୍ତି ବଟି ସଂଗ୍ରହ କରିବାକୁ । ଉପରୁ ତଳ ସବୁଠି କିଛି ମାତ୍ରାରେ ସାମ୍ବାଦିକତା କ୍ଷେତ୍ରରେ ଦୁର୍ନୀତି କାୟା ବିସ୍ତାର କରିବାରେ ଲାଗିଲାନି, ଯାହା ଏହି ମହତ ବୃତ୍ତିକୁ ନିନ୍ଦିତ କରୁଛି। ତେଣୁ ସମୟ ଆସିଛି ଏପରି ସଂସ୍ଥା ଓ ସେମାନଙ୍କ ପ୍ରତିନିଧିଙ୍କ ଉପରେ ସମସ୍ତ ସ୍ୱାଭିମାନୀ ସାମ୍ବାଦିକ ଗୋଷ୍ଠୀ ଏକତ୍ରିତ ହୋଇ କଠୋର ପଦକ୍ଷେପ ନେଇ ସେମାନଙ୍କ ଅସଲ ଚେହେରା ସର୍ବସମ୍ମୁଖକୁ ଆଣନ୍ତୁ ତଥା ସାମ୍ବାଦିକତାକୁ କଳୁଷ ମୁକ୍ତ ରଖନ୍ତୁ ।
