(ଗୁଆହାଟୀ): ଆସାମର ଦିବ୍ରୁଗଡରେ ଥିବା ବୁର୍ହି ଡିହିଙ୍ଗ ନଦୀରେ ନିଆଁ ଲାଗି ତିନି ଦିନ ଧରି ଜଳୁଥିବା ଦେଖାଯାଇଛି । ନଦୀ ମଧ୍ୟ ଦେଇ ଯାଇଥିବା ଏକ ତେଲ ପାଇପ ଲାଇନ ଫାଟି ନିଆଁ ଲାଗିଥିବା ଅନୁମାନ କରାଯାଉଛି । ଏପର୍ଯ୍ୟନ୍ତ ନିଆଁକୁ ଆୟ୍ତ୍ତ କରାଯାଇ ପାରିନାହିଁ । ସ୍ଥାନୀୟ ପ୍ରଶାସନ ପକ୍ଷରୁ ନିଆଁକୁ ଆୟତ୍ତ କରିବା ପାଇଁ କୌଣସି ପଦକ୍ଷେପ ନିଆଯାଉ ନଥିବା ସେଠାକାର ବାସିନ୍ଦା ଅଭିଯୋଗ କରିଛନ୍ତି ।
ରିପୋର୍ଟ ଅନୁଯାୟୀ, ଦିବ୍ରୁଗଡ ଜିଲ୍ଲା ନହରକଟିଆ ଅନ୍ତର୍ଗତ ସାସୋନି ଗାଁ ନିକଟ ଦିଘୋଲିବିଲ୍ ଠାରେ ବୁର୍ହି ଦିହିଙ୍ଗ ନଦୀରେ ଏହି ଅଗ୍ନିକାଣ୍ଡ ଘଟିଛି । ଏହି ନଦୀ ମଧ୍ୟ ଦେଇ ଅଏଲ ଇଣ୍ଡିଆ ଲିମିଟେଡର ପାଇପ ଲାଇନ ବିଛା ଯାଇଥିଲା । ଗତ କିଛି ତଳେ ନଦୀରେ ତେଲ ଭାସୁଥିବା ସ୍ଥାନୀୟ ବାସିନ୍ଦା ଦେଖିଥିଲେ । ପରେ କୌଣସି କାରଣବଶତଃ ତେଲରେ ନିଆଁ ଲାଗି ଯାଇଥିଲା । ଅଳ୍ପ କିଛି ଦିନ ନିଆଁର ଶିଖା ସ୍ଥାନକୁ ଆଚ୍ଛାଦିତ କରି ରଖିଛି । ନଦୀରେ ଜଳୁଥିବା ନିଆଁର ଶିଖା ଓ ସେଥିରୁ ଉଠୁଥିବା କଳା ଧୂଆଁକୁ ଦେଖି ସ୍ଥାନୀୟ ଅଧିବାସୀଙ୍କ ମନରେ ଛନକା ପଶିଯାଇଛି । ଏହାର କିଛି ଭିଡିଓ ମଧ୍ୟ ସୋସିଆଲ ମିଡିଆରେ ଭାଇରାଲ ହୋଇଛି । ନଦୀ ମଧ୍ୟ ଦେଇ ଯାଇଥିବା ତେଲ ପାଇପ ଲାଇନ କଣା କରି ଦୁର୍ବୃତ୍ତମାନେ ତେଲ ଚୋରାଇ ନେବାକୁ ଉଦ୍ୟମ କରିବା ବେଳେ ଏଭଳି ଦୁର୍ଘଟଣା ଘଟିଥାଇ ପାରେ ବୋଲି ସନ୍ଦେହ କରାଯାଉଛି । ଏବେ ଏକ ଟେକ୍ନିକାଲ ଟିମ୍ ନିଆଁ ଲିଭାଇବା ସହ ଦୁର୍ଘଟଣାସ୍ଥଳକୁ ଯାଇ ପାଇପ୍ ଲାଇନ ମରାମତି କରିବା ପାଇଁ ଉଦ୍ୟମ ଚଳାଇଛନ୍ତି
