କକ୍ରୋଚ ଜନତା ପାର୍ଟିର ପ୍ରତିଷ୍ଠାତା ଅଭିଜିତ ଦୀପକେ ଗିରଫ। ତ୍ରିରଙ୍ଗା ଯାତ୍ରା ପାଇଁ ଉଦ୍ୟମ କରି ଅଟକ ଥିବା ଦୀପକେଙ୍କୁ ଦିଲ୍ଲୀ ପୁଲିସ୍ ପ୍ରତିଷେଧକ ମୂଳକ ପ୍ରାବଧାନ ଆଧାରେ ଗିରଫ କରିଛି। ପୁଲିସ୍ର କହିବା କଥା ଯେ ଭାରତୀୟ ନ୍ୟାୟ ସଂହିତାର ଧାରା ୧୨୬ ଓ ୧୨୭ ଅନୁସାରେ ଦୀପକେଙ୍କ ବିରୋଧରେ କାର୍ୟ୍ୟାନୁଷ୍ଠାନ ଗ୍ରହଣ କରାଯାଇଛି। ଆଜି ତାଙ୍କୁ ସ୍ୱତନ୍ତ୍ର କାର୍ୟ୍ୟନିର୍ବାହୀ ମାଜିଷ୍ଟ୍ରେଟଙ୍କ ଆଗରେ ପୁଲିସ୍ ହାଜର କରାଇବ। କନୌଟ ପ୍ଲେସରେ ଥିବା କେନ୍ଦ୍ରୀୟ ପାର୍କକୁ ନ ଯିବା ପାଇଁ ଦୀପକେଙ୍କୁ ୨ ଥର ପୁଲିସ୍ ନୋଟିସ କରିଥିଲା। ହେଲେ ସେ ଏହାକୁ ଉଲ୍ଲଙ୍ଘନ କରିଥିବା ପୁଲିସ୍ ଅଭିଯୋଗ କରିଛି। ତାଙ୍କୁ ଶୃଙ୍ଖଳା ଭଙ୍ଗ ପାଇଁ ପ୍ରଥମେ ଅଟକ ଓ ପରେ ପ୍ରତିଷେଧକ ବ୍ୟବସ୍ଥା ସ୍ୱରୂପ ଗିରଫ କରାଯାଇଛି।
ପୂର୍ବରୁ ଏକଦା ଅଟକ ରହିବା ବେଳେ ଦୀପକେ ଗୋଟିଏ ବଣ୍ଡରେ ଦସ୍ତଖତ କରିଥିଲେ। ସେ ୫୦ ହଜାର ଟଙ୍କାର ବଣ୍ଡ ବଳରେ ମୁକ୍ତ ହୋଇଥିଲେ। ଏହି ସମୟରେ ସେ ବର୍ଷକ ପାଇଁ ସର୍ବସାଧାରଣ ଶୃଙ୍ଖଳା ଭଙ୍ଗ କରିବେ ନାହିଁ ବୋଲି କହିଥିଲେ। ଅନ୍ୟପକ୍ଷରେ ସିଜେପି ଅଭିଯୋଗ କରିଛି ଯେ ଦୀପକେଙ୍କୁ ପୁଲିସ୍ ଏବେ ଅଜଣା ସ୍ଥାନରେ ଲୁଚାଇ ରଖିଛି। ଦଳ ତାଙ୍କ ସହ ଯୋଗାଯୋଗ କରିପାରୁ ନାହିଁ। ସେହିପରି ଦୀପକେଙ୍କୁ ତାଙ୍କ ଓକିଲମାନଙ୍କ ସହ ମଧ୍ୟ ଭେଟିବାକୁ ପୁଲିସ୍ ଦେଉନାହିଁ। କିନ୍ତୁ ଏ ସମ୍ପର୍କରେ ଦିଲ୍ଲୀ ପୁଲିସ୍ କିଛି ବି କହିନାହିଁ।
