ଭୁବନେଶ୍ୱର: ପ୍ରବାସୀ ଓଡିଆଙ୍କ ଘର ଲେଉଟା ପାଇଁ ରାଜ୍ୟ ସରକାର ଦୁଇଟି ନମ୍ବର ୧୦୦ ଓ ୧୦୪ ହେଲପ୍ ଲାଇନ ଜାରି କରିଛନ୍ତି । ଓଡିଶାକୁ ଫେରିବାକୁ ଚାହୁଁଥିବା ଓଡିଆ ଏହି ନମ୍ବରରେ ଫୋନ କରି ଆବଶ୍ୟକୀୟ ସୂଚନା ପାଇ ପାରିବେ । କିନ୍ତୁ ଏହି ନମ୍ବରରେ ଫୋନ କଲେ କିଛି ଉତ୍ତର ଆସୁନି । ଏପରି ଅଭିଯୋଗ ଆଣିଛନ୍ତି ସୁରତରୁ ଫେରିଥିବା ୧୨ ଜଣ । ଏମାନଙ୍କୁ ଯାଜପୁର ଓ ଭଦ୍ରକ ଯିବାକୁ ଥିଲା । ସେମାନେ ବାରମ୍ବାର ଉଭୟ ନମ୍ବରକୁ ଫୋନ କରିଥିଲେ ମଧ୍ୟ କେହି ଫୋନ ଉଠାଇ ନ ଥିଲେ । ଅନୋନ୍ୟପ।।ୟ ହୋଇ ଶେଷରେ ସମସ୍ତ କଟକଟାକୁ ପଛରେ ପକାଇ ଏମାନେ ଚାଲିଚାଲି ଘରକୁ ଫେରିଲେ ।
ସୂଚନା ଅନୁଯାୟୀ, ଗତ ମେ ୨ ତାରିଖରେ ସୁରତରୁ ୬୦ ଜଣ ଓଡିଶା ଆସିଥିଲେ । ସେମାନଙ୍କ ମଧ୍ୟରୁ ୧୨ ଜଣ ଯାଜପୁର ଓ ଭଦ୍ରକର ହୋଇଥିବାରୁ ସେମାନଙ୍କୁ ଭୁବନେଶ୍ୱରର କଳ୍ପନା ଛକ ନିକଟରେ ଓହ୍ଲାଇ ଦିଆଯାଇଥିଲା । ଏହା ପରେ ସେମାନେ ୧୦୦ ଓ ୧୦୪କୁ ବାରମ୍ବାର ଫୋନ କରିଥିଲେ କି କିପରି ଗାଁକୁ ଫେରିବେ । କିନ୍ତୁ ସେହି ନମ୍ବରୁ କୌଣସି ଉତ୍ତର ଆସି ନ ଥିଲା । ତେଣୁ ୧୨ ଜଣ ଭୁବନେଶ୍ୱରର ରାସ୍ତାରେ ବୁଲାବୁଲି କରିବା ସହ ଚାଲିଚାଲି ଘର ମୁହାଁ ହୋଇଥିଲେ । କିଛି ବାଟ ଯିବା ପରେ ଏକ ମିନି ଟ୍ରକ ଧରିଥିଲେ । ତେବେ ଏଠାରେ ପ୍ରଶ୍ନ ଉଠୁଛି, ୨୪ ଘଣ୍ଟିଆ କାର୍ଯ୍ୟ କରୁଥିବା ହେଲପ୍ ଲାଇନକୁ ଫୋନ କରାଗଲେ ଯଦି ଫୋନ କେହି ନ ଉଠାଇବେ ତବେ ଏହି ନମ୍ବର କଣପାଇଁ ସରକାର ଜାରି କରିଛନ୍ତି । ଏହି ଯୁବକମାନେ ଏତେ ବାଟ ଚାଲି ଚାଲି ଯାଇଥିବାରୁ ନିଶ୍ଚିତ କୌଣସି ସ୍ଥାନରେ କିଛି ଖାଦ୍ୟ, ପାନୀୟ ତ କିଣିଥିବେ? କୌଣସି ଜାଗାରେ ବସିଥିଲେ? ଯଦି ଏମାନେ ସଂକ୍ରମିତ ହୋଇଥିବେ, ସେମାନଙ୍କ ଅସହାୟତା ଓ ସରକାରୀ କଳର ଉପରଠାଉରିଆ କାର୍ଯ୍ୟ ପାଇଁ କେତେ ଲୋକେ ସଂକ୍ରମିତ ହେବାର ଆଶଙ୍କା ସୃଷ୍ଟି ହୋଇଛି ସେଥିପାଇଁ କିଏ ଦାୟୀ ରହିବେ?
