(ଲଣ୍ଡନ) : କରୋନା ମହାମାରୀ ମନରୁ ଲିଭିନଥିବା ବେଳେ ବିଶ୍ବ ସ୍ୱାସ୍ଥ୍ୟ ସଂଗଠନ (ହୁ) ଗୋଟିଏ ଅଜଣା ରୋଗର ନାଁ ଦେଇଛି ଡିଜିଜ୍ ଏକ୍ସ। ଏହି ରୋଗ କୋଭିଡ୍-୧୯ ଅପେକ୍ଷା ଆହୁରି ଭୟଙ୍କର ମହାମାରୀର କାରଣ ହୋଇପାରେ। ବ୍ରିଟେନର ଟିକା ଟାସ୍କଫୋର୍ସର ଚେୟାରମ୍ୟାନ୍ ଭାବରେ କାର୍ଯ୍ୟ କରିଥିବା କେଟ୍ ବିଙ୍ଗହମ୍ କହିଛନ୍ତି ଯେ ୧୯୧୯-୧୯୨୦ର ବିନାଶକାରୀ ସ୍ପାନିସ୍ ଫ୍ଲୁ ପରି ଏହି ନୂତନ ଭୂତାଣୁ ସମାନ କ୍ଷତିସାଧନ କରିପାରେ।
ସୂଚନାନୁଯାୟୀ , ହୁ ଅନୁଯାୟୀ, ଡିଜିଜ୍ ଏକ୍ସ ଏକ ନୂତନ ଏଜେଣ୍ଟ ହୋଇପାରେ – ଜୀବାଣୁ, ଭୂତାଣୁ କିମ୍ବା ଫଙ୍ଗସ୍ – ଯାହାର କୌଣସି ଜଣାଶୁଣା ଚିକିତ୍ସା ପଦ୍ଧତି ନାହିଁ। ନିଜର ଉଦ୍ବେଗ ପ୍ରକାଶ କରି ବିଙ୍ଗହମ୍ କହିଛନ୍ତି, ୧୯୧୮-୧୯ ଫ୍ଲୁ ମହାମାରୀରେ ବିଶ୍ୱରେ ଅତି କମ୍ରେ ୫୦ ନିୟୁତ ଲୋକ ପ୍ରାଣ ହରାଇଥିଲେ, ଯାହା ପ୍ରଥମ ବିଶ୍ୱଯୁଦ୍ଧରେ ମୃତ୍ୟୁସଂଖ୍ୟାର ଦୁଇଗୁଣ। ଆଜି ପୃଥିବୀରେ ଉପଲବ୍ଧ ଭୂତାଣୁଗୁଡ଼ିକ ମଧ୍ୟରୁ ଗୋଟିଏ ଭୂତାଣୁ ସମାନ ସଂଖ୍ୟକ ମୃତ୍ୟୁର କାରଣ ହୋଇପାରେ।
