ଭୁବନେଶ୍ୱର/ ଶିଳାସ୍ମିତା ରାୟ: କନ୍ୟାଦାନ ବଡ ପୁଣ୍ୟ । ବବିଙ୍କୁ ତ ସେ ସୁଯୋଗ ମିଳି ନାହ । କିନ୍ତୁ ବବି ମୋତେ ସେହି ପୁଣ୍ୟରୁ ବଞ୍ଚିତ କଲେ । ତାର ଫଳ ତାଙ୍କୁ ନିଶ୍ଚିତ ମିଳିବ । ସମୟ ବଡ ବଳବାନ ଓ ସମୟ ସବୁବେଳେ ଜଣଙ୍କ ସପକ୍ଷରେ ନ ଥାଏ । ଯିଏ ମୋର, ମୋ ପରିବାରର ତଥା ମୋ ଝିଅର ଭାବମୂର୍ତ୍ତି, ଭବିଷ୍ୟତ ନଷ୍ଟ କରିଛନ୍ତି ସେମାନଙ୍କୁ ଭଗବାନ ଦଣ୍ଡଦେବେ । ଦଳରୁ ବହିଷ୍କାର ପରେ ଗୋପାଳପୁର ବିଧାୟକ ତଥା ବିବାହ ଭାଙ୍ଗିଥିବା ଜଣେ ଦୁଃଖୀ ବାପା ରୂପେ ପ୍ରଦୀପ ପାଣିଗ୍ରାହୀଙ୍କ ଉକ୍ତି । ପ୍ରଦୀପ ଖୋଲାଖୋଲି କ୍ୟାମେରି ସମ୍ମୁଖରେ ଯାଜପୁର ବିଧାୟକ ପ୍ରଣବ ପ୍ରକାଶ ଦାସ ଓ ମୁଖ୍ୟମନ୍ତ୍ରୀଙ୍କ ବ୍ୟକ୍ତିଗତ ସଚିବ ଭି କେ ପାଣ୍ଡିଆନଙ୍କୁ ତାଙ୍କ ଝିଅର ଜୀବନ ନଷ୍ଟ କରିଥିବା କହିବା ସହ ସେମାନଙ୍କ କର୍ମଫଳ ସେମାନଙ୍କୁ ମିଳୁ ବୋଲି କ୍ଷୋଭ ଓ ଦୁଃଖରେ ପ୍ରାର୍ଥନା କରୁଥିବା ଦେଖିବାକୁ ମିଳିଛି । ବବି ଓ ପାଣ୍ଡିଆନଙ୍କୁ ସିଧାସଳଖ ଟାର୍ଗେଟ କରିଛନ୍ତି ପ୍ରଦୀପ ।
ବବି ଅବିବାହିତ, ତେଣୁ ତାଙ୍କର କନ୍ୟା ଦାନର ପ୍ରଶ୍ନ ନାହିଁ । କିନ୍ତୁ କନ୍ୟାଦାନ ସୁଯୋଗରୁ ତାଙ୍କୁ ବବି ବଞ୍ଚିତ କରିବାକୁ ନେଇ ପ୍ରଦୀପ କହିବା ସହ ବବିଙ୍କୁ ତାଙ୍କ କର୍ମଫଳ ମିଳୁ ବୋଲି ପ୍ରାର୍ଥନା କରୁଛନ୍ତି । ଏଥିସହ ପାଣ୍ଡିଆନଙ୍କୁ ମଧ୍ୟ ଦଣ୍ଡିତ କରିବାକୁ ଭଗବାନଙ୍କ ନିକଟରେ ଗୁହାରି କରିଛନ୍ତି । ତେବେ କାହିଁକି? ଏମିତି କଣ ଘଟିଗଲା, ଯେଉଁଥି ପାଇଁ ରାଜ୍ୟର କ୍ଷମତା କେନ୍ଦ୍ରର ଦୁଇ ବାହୁବଳିଙ୍କ ବିରୋଧରେ ବିଷୋଦ୍ଗାର କରିଛନ୍ତି ପ୍ରଦୀପ? କଣ ତାଙ୍କୁ ଦଳରୁ ବହିଷ୍କାର କରାଯାଇଥିବାର କ୍ଷୋଭ ତାଙ୍କୁ କ୍ରୋଧିତ କରିଛି ନାଁ ଝିଅର ବିବାହ ଭାଙ୍ଗିବାକୁ ନେଇ ଭଗ୍ନ ହୃଦୟରେ ବାତ୍ସଲ୍ୟରେ ଅନ୍ଧ ହୋଇ ସେ ଏପରି କହିଛନ୍ତି?
ପ୍ରଦୀପ ମୁଖ୍ୟମନ୍ତ୍ରୀଙ୍କ ବିଶ୍ୱସ୍ତ ହେବାକୁ ଦଳର କିଛି ନେତା ତଥା ପାଣ୍ଡିଆନଙ୍କୁ ହଜମ ହେଉନଥିବା ପ୍ରଦୀପଙ୍କ ଉକ୍ତିରୁ ସ୍ପଷ୍ଟ ହୋଇଛି । ପ୍ରଦୀପ ମୁଖ୍ୟମନ୍ତ୍ରୀଙ୍କ ସହ ପ୍ରତ୍ୟକ୍ଷ ଯୋଗାଯୋଗ ସ୍ଥାପନକୁ ନେଇ ପ୍ରଦୀପଙ୍କ ଉପରେ ପ୍ରତିଶୋଧପରାୟଣ ହୋଇ ତାଙ୍କ ଝିଅଙ୍କ ବିବାହ ସ୍ଥିର ହୋଇଥିବା ଆକାଶ ପାଠକଙ୍କୁ ଓ ତାଙ୍କ ବାପା ଆଇପିଏସ ଅଭୟ ପାଠକଙ୍କୁ ଜାଲିଆତି ଅଭିଯୋଗରେ ଗିରଫ କରାଯାଇଛି । ଉଭୟ ବାପା ପୁଅ ଅନେକ ଜାଲିଆତିରେ ଲିପ୍ତ ଥିବା ଅଭିଯୋଗରେ ସେମାନଙ୍କ ନାମରେ ସାଂଘାତିକ ଅଭିଯୋଗ ହୋଇଛି । ଏହି କାର୍ଯ୍ୟରେ ପ୍ରଦୀପ ମଧ୍ୟ ଲିପ୍ତ ଥିବା କହି ତାଙ୍କୁ ଦଳରୁ ବହିଷ୍କାର କରାଯାଇଛି ।
ଯଦି ତାଙ୍କ ଗତକାଲିର ପ୍ରେସ ମିଟ ଓ ବିଭିନ୍ନ ଗଣମାଧ୍ୟମକୁ ଦେଇଥିବା ବାଇଟକୁ ଅନୁଶୀଳନ କରାଯାଏ, ତେବେ ଅନୁଭୂତ ହେଉଛି, ସେ ସରକାରୀ କଳର ଦୋଷ ଦୁର୍ବଳତା ବିରୋଧରେ ମୁହଁ ଖୋଲିବାକୁ ଯାଇ ଆଜି ଦଣ୍ଡିତ ହୋଇଛନ୍ତି । ତାଙ୍କ କଥାରେ ମଧ୍ୟ ରହିଛି ଅନେକ ଗୁମର । ସମୟ ବଡ ବଳବାନ ଓ ସମୟ ମଧ୍ୟ ସର୍ବଦା କାହା ସପକ୍ଷରେ ନ ଥାଏ । ମଣିଷର କର୍ମ ଅନୁଯାୟୀ ଫଳ ମିଳେ । ବିଜେଡି ପ୍ରାରମ୍ଭରୁ ସେ ଦଳରେ ଥିଲେ । ସେ ମଧ୍ୟ ମୁଖ୍ୟମନ୍ତ୍ରୀଙ୍କ ଅତ୍ୟନ୍ତ ବିଶ୍ୱସ୍ତ ଓ ନିକଟତର ଥିଲେ । କିନ୍ତୁ ଆଜି ତାଙ୍କୁ ଦଳରୁ ବିତାଡିତ କରାଯାଇଛି । ତେଣୁ ବବି ଦାସ ଗତ ନିର୍ବାଚନରେ କ୍ଷମତା କେନ୍ଦ୍ରରେ ପାଦ ଥାପି ଯେଉଁ ଉତ୍ଫୁଲ୍ଲିତ ହୋଇ କାର୍ଯ୍ୟ କରୁଛନ୍ତି ତାହା ବେଶି ଦିନ ପାଇଁ ନୁହେଁ । ଏହା ଆମେ କହୁ ନାହୁଁ ପ୍ରଦୀପଙ୍କ କଥାରୁ ଜଣାପଡିଛି ।
ସେହିପରି ଦଳରେ ତଥା ପ୍ରଶାସନରେ ଯାହା ଚାଲିଛି ତାହା ମୁଖ୍ୟମନ୍ତ୍ରୀଙ୍କ ବ୍ୟକ୍ତିଗତ ସଚିବ ପାଣ୍ଡିଅ।ନଙ୍କ ଇଙ୍ଗିତରେ ବୋଲି ମଧ୍ୟ କହିବାକୁ ପଛାଇନାହାନ୍ତି ପ୍ରଦୀପ । ସେ ମଧ୍ୟ ପାଣ୍ଡିଆନଙ୍କୁ ପରୋକ୍ଷରେ କହିବାକୁ ଚାହିଁଛନ୍ତି, ଦିନେ ପ୍ୟାରୀମୋହନ ମହାପାତ୍ର ମୁଖ୍ୟମନ୍ତ୍ରୀଙ୍କ ଛାୟୀ ପରି ଥିଲେ, ଏବେ ଯେମିତି ପାଣ୍ଡିଆନ ରହିଛନ୍ତି । ଦଳ ତଥା ମୁଖ୍ୟମନ୍ତ୍ରୀଙ୍କ କିଏ ନିକଟତ ହେବ, କିଏ ଭେଟିବ ସବୁ ପ୍ୟାରୀଙ୍କ ଦ୍ୱାରା ପରିଚାଳିତ ହେଉଥିଲା । ଆଜି ପ୍ୟାରୀ ନାହାନ୍ତି । ପ୍ୟାରୀଙ୍କୁ ମଧ୍ୟ ଦଳ ବିରୋଧୀ କାର୍ଯ୍ୟ ପାଇଁ ଦଳରୁ ବହିଷ୍କାର କରାଯାଇଥିଲା । ପାଣ୍ଡିଆନ ଦଳରେ ନାହାନ୍ତି, କିନ୍ତୁ ଉପରବାଲାର ଛାଟ ପ୍ରହାରରୁ ଯେ ବର୍ତ୍ତିଯିବେ ଏପରି ଚିନ୍ତା କରୁଥିଲେ ସେ ଭୁଲ କରୁଥିବା କହିବାକୁ ଚାହିଁଛନ୍ତି ପ୍ରଦୀପ । ପ୍ରଦୀପ ନିଜ କ୍ଷୋଭ ମାଧ୍ୟମରେ ପାଣ୍ଡିଆନ ସରକାର ଓ ସରକାରୀ କଳ ଚଳାଉଥିବା କହିଛନ୍ତି।
