(ଦିଲ୍ଲୀ) : ମଦ ନୀତି ଦୁର୍ନୀତି ମାମଲାରେ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କ ଅନ୍ତରୀଣ ଜାମିନ ଉପରେ ଆଜି ସୁପ୍ରିମକୋର୍ଟ ରାୟ ପ୍ରଦାନ କରିବେ । ତେବେ ଏହାର ଦିନକ ପୂର୍ବରୁ ଅର୍ଥାତ ଗୁରୁବାର ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ସୁପ୍ରିମକୋର୍ଟରେ ସତ୍ୟପାଠ ଦାଖଲ କରିବା ସହ କେଜ୍ରିୱାଲଙ୍କ ସମ୍ଭାବ୍ୟ ଜାମିନକୁ ବିରୋଧ କରିଛି । ନିର୍ବାଚନରେ ପ୍ରଚାର କରିବା ମୌଳିକ ଅଧିକାର ନୁହେଁ ବୋଲି କହିଛି ଇଡି ।
ସୂଚନାନୁଯାୟୀ , ସୁପ୍ରିମକୋର୍ଟରେ ଇଡି ନିଜ ଯୁକ୍ତିରେ ଦର୍ଶାଇଛି ଯେ କେଜ୍ରିୱାଲ ନିର୍ବାଚନ ଲଢ଼ୁନାହାନ୍ତି । ଏହା ପୂର୍ବରୁ କୌଣସି ନେତାଙ୍କୁ ନିର୍ବାଚନୀ ପ୍ରଚାର ନିମନ୍ତେ ନ୍ୟାୟିକ ହାଜତରୁ ଜାମିନ ପ୍ରଦାନ କରାଯାଇ ନାହିଁ । ପ୍ରଚାର କରିବା ମୌଳିକ ଅଧିକାର ନୁହେଁ । ତେଣୁ ଦିଲ୍ଲୀ ମୁଖ୍ୟମନ୍ତ୍ରୀଙ୍କୁ ଜାମିନ ଦେବା ଯୁକ୍ତିଯୁକ୍ତ ନୁହେଁ । ଗତ ୭ ତାରିଖରେ ଶୁଣାଣି ବେଳେ ସୁପ୍ରିମକୋର୍ଟ ଇଡିକୁ କହିଥିଲେ ଯେ ନିର୍ବାଚନ ୫ ବର୍ଷକୁ ଥରେ ଆସେ । ଏହା ଅସାଧାରଣ ପରିସ୍ଥିତି । ଯଦି ଆମେ କେଜ୍ରିୱାଲଙ୍କୁ ଜାମିନ ପ୍ରଦାନ କରୁ ତେବେ ସେ ଦିଲ୍ଲୀ ସରକାରରେ କୌଣସି ପ୍ରକାର ହସ୍ତକ୍ଷେପ କରିବେ ନାହିଁ ।
