ଅଡୁଆରେ ଜଗନ ମୋହନ, ହତ୍ୟା ଅଭିଯୋଗ ଆଣିଲେ ଭଉଣୀ

(ହାଇଦ୍ରାବାଦ): ଆନ୍ଧ୍ରପ୍ରଦେଶ ମୁଖ୍ୟମନ୍ତ୍ରୀ ଜଗନ ମୋହନ ରେଡ୍ଡୀଙ୍କ ପାଇଁ ଅଡୁଆ ବଢିଛି । ତାଙ୍କ ବିରୋଧରେ ହତ୍ୟା ଅଭିଯୋଗ ଆଣି ତାଙ୍କର ସମ୍ପର୍କୀୟ ଭଉଣୀ କୋର୍ଟଙ୍କ ଦ୍ୱାରସ୍ଥ ହୋଇଛନ୍ତି । ଗତବର୍ଷ ମାର୍ଚ୍ଚ ମାସରେ ଜଗନ ମୋହନଙ୍କ ଦାଦାଙ୍କୁ ହତ୍ୟା କରାଯାଇଥିଲା । ଏଥିରେ ଜଗନଙ୍କ ହାତ ଥିିବା ତାଙ୍କ ସମ୍ପର୍କିୟ ଭଉଣୀ ସୁନିତା ଅଭିଯୋଗ କରିଛନ୍ତି । ଏହି ହତ୍ୟାକାଣ୍ଡ ପଛରେ ଜଗନ ମୋହନ, ସାଂସଦ ୱାଇଏସ ଅଭିନାଶ ରେଡ୍ଡୀ ଓ ତାଙ୍କ ବାପା ଭାସ୍କର ରେଡ୍ଡୀଙ୍କର ହାତ ରହିଛି ବୋଲି ଆନ୍ଧ୍ରପ୍ରଦେଶ ହାଇକୋର୍ଟରେ ସୁନିତା ଦାଖଲ କରିଥିବା ପିଟିସନରେ ଉଲ୍ଲେଖ କରିଛନ୍ତି ।
ସୂଚନାଯୋଗ୍ୟ, ଜଗନଙ୍କ ଦାଦା ତଥା ପୂର୍ବତନ ସାଂସଦ ୱାଇଏସ ବିବେକାନନ୍ଦ ରେଡ୍ଡୀଙ୍କ ମୃତଦେହ ତାଙ୍କ ଘର କାଡାପ୍ପାରୁ ଉଦ୍ଧାର ହୋଇଥିଲା । ନିର୍ବାଚନର ଠିକ ପୂର୍ବରୁ ତାଙ୍କୁ ଦୁର୍ବୃତ୍ତମାନେ ହତ୍ୟା କରିଥିଲେ । ବିବେକାନନ୍ଦ ଘରେ ଏକୁଟିଆ ଥିଲେ । ସେ ୱାଇଏସଆର କଂଗ୍ରେସର ନିର୍ବାଚନୀ ଇସ୍ତାହାର ପ୍ରକାଶ କରିବା ପୂର୍ବରୁ ତାଙ୍କୁ ହତ୍ୟା କରାଯାଇଥିଲା । ତେବେ ଏହି ହତ୍ୟାକାଣ୍ଡ ବେଳେ ବର୍ତ୍ତମାନର ମୁଖ୍ୟମନ୍ତ୍ରୀ ଜଗନ ମୋହନ ବିରୋଧୀ ଦଳର ନେତା ଥିଲେ । ସେତେବେଳେ ସେ ସିବିଆଇ ତଦନ୍ତ ପାଇଁ ଦାବି କରିଥିଲେ । କିନ୍ତୁ ଏବେ କ୍ଷମତାରେ ଥିବା ବେଳେ କାହିଁକି ସିବିଆଇ ତଦନ୍ତ ପାଇଁ ନିର୍ଦ୍ଦେଶ ଦେଉନାହାନ୍ତି । ହତ୍ୟାକାଣ୍ଡକୁ ରଫାଦଫା କରିବାକୁ ବୋଧେ ଚାହୁଛନ୍ତି ବୋଲି ଦର୍ଶାଇ ସୁନୀତା ପ୍ରଶ୍ନ କରିଛନ୍ତି ।