କୋଭିଡ-୧୯ କଟକଣାକୁ ଆହୁରି ଶକ୍ତ କରିଛି ବିଏମସି

ଭୁବନେଶ୍ୱର: ଭୁବନେଶ୍ୱରରେ କରୋନା ସଂକ୍ରମଣ ଆଶାତୀତ ଭାବେ ବୃଦ୍ଧି ପାଇ ଚାଲିଛି । ତେଣୁ ପ୍ରଶାସନ କେତେକ କ୍ଷେତ୍ରରେ କଟକଣାକୁ ଆହୁରି ଶକ୍ତ କରିଛି । ହଟସ୍ପଟ୍ ଜିଲ୍ଲାରୁ ଭୁବନେଶ୍ୱରକୁ ଆସିଲେ କ୍ୱାରେଣ୍ଟାଇନ୍ ବାଧ୍ୟତାମୂଳକ କରାଯାଇଛି । ଏନେଇ ସୂଚନା ଦେଇଛନ୍ତି ବିଏମସି କମିଶନର ପ୍ରେମଚାନ୍ଦ ଚୌଧରୀ । ସେ କହିଛନ୍ତି, ହଟସ୍ପଟ୍ ଜିଲ୍ଲାରୁ ଭୁବନେଶ୍ନର ଆସିଲେ କ୍ୱାରେଣ୍ଟାଇନରେ ରହିବା ବାଧ୍ୟତାମୂଳକ । ହୋମ କ୍ୱାରେଣ୍ଟାଇନ ବଦଳରେ କ୍ୱାରେଣ୍ଟାଇନରେ ରହିବାକୁ ହେବ । ଶୁକ୍ରବାରଠାରୁ ଏହି ନିୟମ ଲାଗୁ ହୋଇଛି । ସେହିପରି ବସ୍ତୀ ଅଞ୍ଚଳରେ ହୋମ କ୍ୱାରେଣ୍ଚାଇନ୍ ପାଇଁ ଅନୁମତି ନାହିଁ । ତେଣୁ ବସ୍ତୀ ଅଞ୍ଚଳକୁ ଅଧିକ ଧ୍ୟାନ ଦିଆଯାରଥିବା ସେ କହିଛନ୍ତି ।
ଶୁକ୍ରବାର ରାଜଧାନୀ ଭୁବନେଶ୍ୱରରୁ ଆଉ ୧୬ କୋଭିଡ-୧୯ ପଜିଟିଭ୍ ଚିହ୍ନଟ ହୋଇଛନ୍ତି । ଏମାନଙ୍କ ମଧ୍ୟରୁ ୨ ଜଣ ହୋମ କ୍ୱାରେଣ୍ଟାଇନରେ ଥିବା ବେଳେ ଅନ୍ୟ ୧୪ ଜଣ ହେଉଛନ୍ତି ସ୍ଥାନୀୟ ସଂକ୍ରମିତ । ସେହିପରି ଗତକାଲି ଭୁବନେଶ୍ୱରରୁ ୩୮ ଜଣ ପଜିଟିଭ ଚିହ୍ନଟ ହୋଇଥିବା ବେଳେ ୨୫ ଜଣ ହୋମ କ୍ୱାରେଣ୍ଟାଇନରୁ ଓ ୧୩ ଜଣ ସ୍ଥାନୀୟ ଥିଲେ । ପ୍ରତ୍ୟହ ହୋମ କ୍ୱାରେଣ୍ଟାଇନରୁ କିଛି କିଛି ସଂକ୍ରମିତ ଚିହ୍ନଟ ହେଉଛନ୍ତି । ଏହା ବ୍ୟତୀତ ହୋମ କ୍ୱାରେଣ୍ଟାଇନରେ ରହୁଥିବା ଲୋକମାନେ ମଧ୍ୟ କୋଭିଡ-୧୯ ନିୟମ ମାନୁନଥିବା ଦେଖିବାକୁ ମିଳୁଛି । ତେଣୁ ବିଏମସି ହୋମ କ୍ୱାରେଣ୍ଟାଇନ ବଦଳରେ କ୍ୱାରେଣ୍ଟାଇନକୁ ଅଧିକ ଗୁରୁତ୍ୱ ଦେଉଛି ।