ବରିଷ୍ଠ ଆରଏସଏସ ପ୍ରଚାରକ ପି ପରମେଶ୍ୱରମଙ୍କ ପରଲୋକ

(ନୂଆଦିଲ୍ଲୀ): ରାଷ୍ଟ୍ରୀୟ ସ୍ୱୟଂ ସେବକ ସଂଘ (ଆରଏସଏସ)ର ବରିଷ୍ଠ ପ୍ରଚାରକ ତଥା ଭାରତୀୟ ଜନସଂଘର ପୂର୍ବତନ ନେତା ପି ପରମେଶ୍ୱରନଙ୍କର ରବିବାର ପରଲୋକ ହୋଇଛି । ମୃତ୍ୟୁ ବେଳକୁ ତାଙ୍କୁ ୯୧ ବର୍ଷ ବୟସ ହୋଇଥିଲା । ଶନିବାର ରାତି ପ୍ରାୟ ବେଳେ ତାଙ୍କର ମୃତ୍ୟୁ ହୋଇଥିଲା । କେରଳର ପାଲ୍ଲାକାଡ ଜିଲ୍ଲାର ଓଟ୍ଟାପ୍ପାଲମ ଠାରେ ତାଙ୍କର ଆୟୁର୍ବେଦିକ ଚିକିତ୍ସା ଚାଲୁ ରହିଥିଲା ବେଳେ ତାଙ୍କର ମୃତ୍ୟୁ ହୋଇଛି । ୧୯୨୭ରେ କେରଳର ଆଲାପୁଝା ଜିଲ୍ଲାର ମୁହାମାରେ ଜନ୍ମଗ୍ରହଣ କରିଥିବା ପରମେଶ୍ୱରନ ତାଙ୍କ ଛାତ୍ର ଜୀବନ କାଳରେ ଆରଏସଏସରେ ଯୋଗ ଦେଇଥିଲେ । ୧୯୬୭ରୁ ୧୯୭୧ ଯାଏ ଭାରତୀୟ ଜନସଂଘର ସମ୍ପାଦକ ଭାବେ କାର୍ଯ୍ୟ କରିଥିଲେ । ପରେ ୧୯୭୧ରୁ ୧୯୭୭ ଯାଏ ସଂଘର ଉପସଭାପତି ଭାବେ ଦାୟିତ୍ୱ ତୁଲାଇଥିଲେ । ଏହାପରେ ୧୯୭୭-୮୨ ପର୍ଯ୍ୟନ୍ତ ଦୀନଦୟାଲ ଗବେଷଣା ପ୍ରତିଷ୍ଠାନର ନିର୍ଦ୍ଦେଶକ ରହିଥିଲେ । ପଣ୍ଡିତ ଦୀନଦୟାଲ ଉପାଧ୍ୟାୟ, ଅଟଳ ବିହାରୀ ବାଜପେୟୀ ଏବଂ ଲାଲକୃଷ୍ଣ ଆଡଭାନୀଙ୍କ ଭଳି ବରିଷ୍ଠ ନେତା ସହ କାମ କରିଥିବା ପରମେଶ୍ୱରନଙ୍କୁ ୨୦୧୮ରେ ଦେଶର ଦ୍ୱିତୀୟ ସର୍ବୋଚ୍ଚ ବେସାମରିକ ସମ୍ମାନ ପଦ୍ମ ବିଭୁଷଣରେ ସମ୍ମାନିତ କରାଯାଇଥିଲା । ୨୦୦୪ରେ ସେ ପଦ୍ମଶ୍ରୀ ସମ୍ମାନ ପାଇଥିଲେ । ତାଙ୍କ ବିୟୋଗରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଶୋକ ପ୍ରକାଶ କରିଛନ୍ତି । ସେ ଭାରତର ଗର୍ବିତ ପୁତ୍ର ଥିଲେ । ତାଙ୍କ ବିୟୋଗରେ ଦୁଃଖୀ ବୋଲି ପ୍ରଧାନମନ୍ତ୍ରୀ ଟୁଇଟ୍ କରି କହିଛନ୍ତି ।