ବାଇକ୍ ଲୁଟେରା ଗିରଫ

(ମହାଭାରତ, ଭଦ୍ରକ): ଭଦ୍ରକ ଗ୍ରାମାଞ୍ଚଳ ଥାନା ଅଧିନସ୍ଥ ବାରିକପୁର ଅଞ୍ଚଳରେ ଜଣେ ବାଇକ୍ ଲୁଟେରାକୁ ସ୍ଥାନୀୟ ଲୋକେ କାବୁ କରିବା ପରେ ନିର୍ଧୁମ ମାଡ଼ ଦେଇଛନ୍ତି । ପରେ ପୋଲିସ ତାକୁ ଗିରଫ କରିଛି । ସୂଚନା ଅନୁଯାୟୀ, ଭଦ୍ରକ ଗ୍ରାମାଞ୍ଚଳ ଥାନା ଅଧିନସ୍ଥ ବରପଦା (କିଆ ଗଢିଆ) ଅଞ୍ଚଳର ପ୍ରଶାନ୍ତ ପରିଡା ସ୍ଥାନୀୟ ଅଞ୍ଚଳର ବହୁ ଲୋକଙ୍କ ବାଇକ୍ ଚୋରି କରି ପଳାଇଥିବା ଅଭିଯୋଗ ହୋଇଛି । ପୋଲିସ ସୂଚନା ଅନୁଯାୟୀ, ଅଭିଯୁକ୍ତ ଜଣକ ପ୍ରଥମେ ଗାଁ ଲୋକଙ୍କ କାମ କରିବା ପାଇଁ ପାଇଁ ଯାଇଥାଏ । ଏହାପରେ ବାହାନା କରି ଖାଇବା ଆଣିବାକୁ ଘର ମାଲିକଙ୍କ ଠାରୁ ବାଇକ୍ ମାଗି ନେଇଥାଏ । ପରେ ତାକୁ ଚୋରି କରି ନେଇଥାଏ । ଶୁକ୍ରବାର ସନ୍ଧ୍ୟାରେ ବାସନ୍ତୀ ଦୁର୍ଗା ପଡିଆ ନିକଟରେ ସେ ବୁଲୁଥିବା ଖବର ପାଇ ଗାଁ ଲୋକେ କାବୁ କରି ନେଇଥିଲେ । ଏହାପରେ ପଡିଆରେ ତାକୁ ବାନ୍ଧି ନିର୍ଧୁମ ଛେଚିଥିଲେ । ପରେ ପୋଲିସକୁ ଡାକି ଜିମା ଦେଇଥିଲେ । ପୋଲିସ ତାକୁ ଅଟକ ରଖି ପଚରାଉଚରା କରିଛି ।