ବର୍ଷା ପାଣି ନିଷ୍କାସନ ପାଇଁ ରାସ୍ତା ହାଣିଲେ ଗ୍ରାମବାସୀ

(ସେଖ୍ ଫୈଜନ କାଦ୍ରୀ/ଭଦ୍ରକ): ବାସୁଦେବପୁର ବ୍ଲକ ଅନ୍ତର୍ଗତ ବିଦେଇପୁର ପଞ୍ଚାୟତ ମହାନ୍ତି ସାହିରେ ଲଗାଣ ବର୍ଷା ଯୋଗୁ କିଛି ଦିନ ତଳେ ଗାଁ ଦାଣ୍ଡ ବୁଡି ଯାଇଥିଲା । ଫଳରେ ଜଳ ନିଷ୍କାସନ ପାଇଁ ଗାଁ ଲୋକେ କରଞ୍ଜଆଡିଆ-ବିଦେଇପୁର ମୁଖ୍ୟ ରାସ୍ତାକୁ ଗତକାଲି ହାଣିଥିବା ଦେଖିବାକୁ ମିଳିଛି । ସୂଚନା ଅନୂଯାୟୀ, ପ୍ରବଳ ବର୍ଷା ଯୋଗୁ ବିଦେଇପୁର ପଞ୍ଚାୟତ ମହାନ୍ତି ସାହିର ଏକ ପୋଖରୀରେ ବର୍ଷା ପାଣି ଅତ୍ୟଧିକ ଜମିବା ସହ ନିକଟରେ ଥିବା ଘର ଗୁଡିକରେ ପାଣି ପଶିଯିବା ଆଶଙ୍କା ସୃଷ୍ଟି ହୋଇଥିଲା । ତେଣୁ ଗାଁ ଲୋକେ ବିଦେଇପୁର-କରଞ୍ଜଆଡିଆ ରାସ୍ତାର ମହାନ୍ତି ସାହି ନିକଟରେ ଏକ ରାସ୍ତାକୁ ହାଣି ଜଳ ନିଷ୍କାସନ କରିଥିଲେ। ଯାହା ଫଳରେ ରାସ୍ତାରେ ଲୋକଙ୍କ ଯାତାୟତ ବାଧା ପ୍ରାପ୍ତ ହୋଇଥିଲା। ଏପରିକି କରଞ୍ଜଆଡିଆକୁ ଯାଉଥିବା ଆମ୍ବୁଲାନ୍ସ ଏବେ ଫେରି ଆସି ଅନ୍ୟବାଟରେ ଯିବାକୁ ପଡୁଛି। ବିଦେଇପୁର-କରଞ୍ଚଆଡିଆ ରାସ୍ତା ନିର୍ମାଣ କାର୍ୟ୍ୟ ବର୍ତ୍ତମାନ ଚାଲୁ ରହିଛି । ଗାଁ ପୋଖରୀରୁ ଜଳ ନିଷ୍କାସନ ପାଇଁ ଥିବା ହୋମପାଇପ୍ ଭାଙ୍ଗିଯିବା କାରଣରୁ ଏଭଳି ପରିସ୍ଥିତି ସୃଷ୍ଟି ହୋଇଥିବା ଗ୍ରାମବାସୀ ଅଭିଯୋଗ କରିଛନ୍ତି । ଉକ୍ତ ସ୍ଥାନରେ ଜଳ ନିଷ୍କାସନ ପାଇଁ କଲଭର୍ଟ ନିର୍ମାଣ ପାଇଁ ଦାବି କରିଛନ୍ତି।