ନିଯୁକ୍ତି ପ୍ରକ୍ରିୟାରୁ ବାଦ୍‌ ନିଷ୍ପତ୍ତିକୁ ଓଡ଼ିଶା ହାଇକୋର୍ଟ ରଦ୍ଦ କଲେ

ନିଯୁକ୍ତି ପ୍ରକ୍ରିୟାରୁ ବାଦ୍‌ ନିଷ୍ପତ୍ତିକୁ ଓଡ଼ିଶା ହାଇକୋର୍ଟ ରଦ୍ଦ କରିଦେଇଛନ୍ତି । ଓଡ଼ିଶା ହାଇକୋର୍ଟ ଏକ ଗୁରୁତ୍ୱପୂର୍ଣ୍ଣ ନିର୍ଦ୍ଦେଶ ଦେଇ ୩୩୭ ପ୍ରାର୍ଥୀଙ୍କ ନିଯୁକ୍ତି ପାଇଁ ରାସ୍ତା ପରିଷ୍କାର କରିଛନ୍ତି । ଓଏସଏସଏସସି ଦ୍ୱାରା ଆୟୋଜିତ ହୋଇଥିବା ପରୀକ୍ଷା ସମ୍ପର୍କିତ ବିବାଦର ସମାଧାନ କରିଛନ୍ତି ମାନ୍ୟବର ହାଇକୋର୍ଟ । ଓଏସଏସଏସି ପକ୍ଷରୁ ୨୦୨୩ ଅକ୍ଟୋବର ୨୦ରେ ୨୭୧୨ଟି ପଦରୁ ୧୬୭୭ ଫରେଷ୍ଟ ଗାର୍ଡ, ୩୧୬ଫରେଷ୍ଟର ଏବଂ ୭୧୯ ଲାଇଭ୍‌‌ ଇନ୍ସେପେକ୍ଟର ପଦରେ ନିଯୁକ୍ତି ପାଇଁ ବିଜ୍ଞପ୍ତି ପ୍ରକାଶ କରିଥିଲେ । ଏହି ସମସ୍ତ ପଦ ଲାଗି ମୋଟ୍‌‌ ୨ଲକ୍ଷ ୫୫ ହଜାର ୧୬୯ଜଣ ପ୍ରାର୍ଥୀ ପରୀକ୍ଷା ଦେଇଥିଲେ । ଯେଉଁଥିରୁ ୮ ହଜାର ୪୯୬ଜଣ ମନୋନୀତ ହୋଇଥିଲେ । ଏହାବାଦ୍‌‌ ୩୩୭ଜଣଙ୍କ ପରୀକ୍ଷାଫଳକୁ ପ୍ରକାଶ କରାଯାଇନଥିଲା । କମିସନ ଅଭିଯୋଗ କରିଥିଲେ ଯେ, କେତେକ ଆଶାୟୀ ସେମାନଙ୍କ ଆବେଦନ ପତ୍ରରେ ଭୁଲ୍ ତଥ୍ୟ ଦେଇଛନ୍ତି କିମ୍ବା ପରୀକ୍ଷାରେ ଅନୁଚିତ ମାର୍ଗ ଆପଣେଇଛନ୍ତି । ଏହି ପ୍ରାର୍ଥୀମାନଙ୍କ ଏକାଡେମିକ କ୍ୟାରିୟର ଏତେ ଭଲ ନ ଥିଲା ବେଳେ ହଠାତ୍‌ ପରୀକ୍ଷାରେ ଅଧିକ ମାର୍କ ରଖିବାକୁ କମିସନ ଗ୍ରହଣ କରି ନ ଥିଲେ । କପି କରି ସେମାନେ ପରୀକ୍ଷାରେ ଅଧିକ ନମ୍ବର ରଖିଛନ୍ତି ବୋଲି ଦର୍ଶାଇ ୨୦୨୫ ମସିହାରେ ସେମାନଙ୍କୁ କାରଣ ଦର୍ଶାଅ ନୋଟିସ ଦିଆଯାଇ ନିଯୁକ୍ତି ପ୍ରକ୍ରିୟାରୁ ବାଦ୍ ଦିଆଯାଇଥିଲା । ଏନେଇ ଓଏସଏସସି ପକ୍ଷରୁ ଏକ କମିଟି ଗଠନ କରାଯାଇ ଆଶାୟୀ ପ୍ରାର୍ଥୀଙ୍କ ପରୀକ୍ଷାଫଳ ପ୍ରକାଶନ ଉପରେ ଅଙ୍କୁଶ ଲଗାଯାଇଥିଲା ।

ହାଇକୋର୍ଟଙ୍କ ରାୟ ପରେ କମିସନ ଆସନ୍ତା ୩ ସପ୍ତାହ ମଧ୍ୟରେ ଆଶାୟୀମାନଙ୍କ ପଦ ପ୍ରଦାନ ପାଇଁ ରାଜ୍ୟ ସରକାରଙ୍କୁ ସୁପାରିଶ କରିବେ । ସୁପାରିଶ ପାଇବା ପରେ ସରକାରୀ ବିଭାଗ ବିନା କୌଣସି ବିଳମ୍ବରେ ସେମାନଙ୍କୁ ନିଯୁକ୍ତି ପ୍ରଦାନ କରିବେ । ଏହି ଆବେଦନକାରୀ ପ୍ରାର୍ଥୀମାନେ ପୂର୍ବରୁ ସରକାରୀ ଚାକିରୀରେ ଯୋଗଦେଇଥିବା ପ୍ରାର୍ଥୀଙ୍କ ଠାରୁ ବରିଷ୍ଠତା ଦାବି କରି ପାରିବେ ନାହିଁ ବୋଲି ହାଇକୋର୍ଟ ସ୍ପଷ୍ଟ କରିଛନ୍ତି । ହାଇକୋର୍ଟ ଓଏସଏସଏସସି ଦ୍ୱାରା ୧୯ ଫେବୃଆରୀ ୨୦୨୫ରେ ଜାରି ହୋଇଥିବା ଶୋ-କଜ ନୋଟିସ ଏବଂ ୧୦ ଅକ୍ଟୋବର ୨୦୨୫ର ଆଦେଶକୁ ଅବୈଧ ଘୋଷଣା କରିଛନ୍ତି । ହାଇକୋର୍ଟରେ ଦାୟର ୨୫୦ ରୁ ଉର୍ଦ୍ଧ୍ବ ମାମଲାର ଏକତ୍ର ଶୁଣାଣି କରି ବିଚାରପତି ଜଷ୍ଟିସ ବିରଜା ପ୍ରସନ୍ନ ଶତପଥୀଙ୍କୁ ନେଇ ଗଠିତ ଖଣ୍ଡପୀଠ ଏହି ନିର୍ଦ୍ଦେଶ ଦେଇଛନ୍ତି ।