ଆଗାମୀ ବିଧାନସଭା ନିର୍ବାଚନକୁ ଆଖି ଆଗରେ ରଖି କଂଗ୍ରେସ ସଂଗଠନରେ ବଡ଼ ଧରଣର ପୁନର୍ଗଠନ ପାଇଁ ପ୍ରସ୍ତୁତି ଚାଲିଥିବା ଖବର ମିଳୁଛି। ଦଳର କେନ୍ଦ୍ରୀୟ ଓ ରାଜ୍ୟ ସ୍ତରରେ ବ୍ୟାପକ ପରିବର୍ତ୍ତନ କରାଯିବା ନେଇ ଚର୍ଚ୍ଚା ଜୋର ଧରିଛି। ସଂଗଠନକୁ ଅଧିକ ସକ୍ରିୟ ଓ ନିର୍ବାଚନମୁଖୀ କରିବା ଉଦ୍ଦେଶ୍ୟରେ ଏହି ପଦକ୍ଷେପ ନିଆଯାଉଥିବା ସୂଚନା ମିଳିଛି।
ଦଳୀୟ ସୂତ୍ର ଅନୁସାରେ, AICCର ଚାରିଜଣ ସାଧାରଣ ସମ୍ପାଦକଙ୍କୁ ହଟାଯାଇପାରେ। ଏହା ସହିତ ତିନିରୁ ଚାରିଟି ରାଜ୍ୟର ପ୍ରଦେଶ କଂଗ୍ରେସ ସଭାପତିଙ୍କୁ ମଧ୍ୟ ପରିବର୍ତ୍ତନ କରାଯିବାର ସମ୍ଭାବନା ରହିଛି। ଛଅରୁ ସାତ ଜଣ ରାଜ୍ୟ ପ୍ରଭାରୀଙ୍କ ଦାୟିତ୍ୱ ମଧ୍ୟ ବଦଳିପାରେ। ବର୍ତ୍ତମାନ ଥିବା ୬୨ ଜଣ ଜାତୀୟ ସମ୍ପାଦକଙ୍କ ମଧ୍ୟରୁ ପ୍ରାୟ ୨୬ ଜଣଙ୍କୁ ହଟାଯାଇ ନୂତନ ମୁହଁଙ୍କୁ ସୁଯୋଗ ଦିଆଯାଇପାରେ। ପରିବର୍ତ୍ତନର ତାଲିକାରେ ହରିୟାଣା ପ୍ରଭାରୀ ବି.କେ. ହରିପ୍ରସାଦ, ମହାରାଷ୍ଟ୍ର ପ୍ରଭାରୀ ରମେଶ ଚେନ୍ନିଥାଲା, ଛତିଶଗଡ଼ ପ୍ରଭାରୀ ସଚିନ ପାଇଲଟ, ତାମିଲନାଡୁ ପ୍ରଭାରୀ ଗିରିଶ ଚୋଡ଼ଙ୍କର ଓ ରାଜସ୍ଥାନ ପ୍ରଭାରୀ ସୁଖଜିନ୍ଦର ସିଂହ ରନ୍ଧାୱାଙ୍କ ନାମ ରହିଛି। ବି.କେ. ହରିପ୍ରସାଦ କର୍ଣ୍ଣାଟକ କଂଗ୍ରେସର ସଭାପତି ହୋଇଥିବାରୁ ହରିୟାଣା ପାଇଁ ନୂଆ ପ୍ରଭାରୀ ନିଯୁକ୍ତ ହେବେ।
ସେହିପରି କେରଳରେ କଂଗ୍ରେସ ସରକାର ଗଠନ ପରେ ରମେଶ ଚେନ୍ନିଥାଲା ଓ ସନି ଯୋଶେଫ ମନ୍ତ୍ରୀ ହୋଇଥିବାରୁ ସଂଗଠନରେ ସେମାନଙ୍କ ସ୍ଥାନରେ ନୂତନ ନେତାଙ୍କୁ ଦାୟିତ୍ୱ ମିଳିପାରେ। ଗୋଆ ପ୍ରଦେଶ କଂଗ୍ରେସ ସଭାପତି ଭାବେ ନିଯୁକ୍ତ ହୋଇଥିବା ଗିରିଶ ଚୋଡ଼ଙ୍କର ମଧ୍ୟ AICCର ଦାୟିତ୍ୱ ଛାଡ଼ିପାରନ୍ତି।
ସୂତ୍ର କହୁଛି, ଦିଲ୍ଲୀ, ରାଜସ୍ଥାନ, ପଞ୍ଜାବ, ତାମିଲନାଡୁ ଓ ଉତ୍ତର ପ୍ରଦେଶରେ ପ୍ରଦେଶ କଂଗ୍ରେସ ସଭାପତି ପରିବର୍ତ୍ତନ ହୋଇପାରେ। ବିଶେଷକରି ୨୦୨୭ରେ ପଞ୍ଜାବ ଓ ଉତ୍ତର ପ୍ରଦେଶରେ ବିଧାନସଭା ନିର୍ବାଚନ ଥିବାରୁ ଏହି ଦୁଇ ରାଜ୍ୟରେ ସଂଗଠନକୁ ଅଧିକ ଶକ୍ତିଶାଳୀ କରିବା ପାଇଁ ନୂତନ ନେତୃତ୍ୱ ଆଣାଯାଇପାରେ।
ଦଳୀୟ ଗୋଷ୍ଠୀବାଦକୁ ନିୟନ୍ତ୍ରଣ କରିବା, ତୃଣମୂଳ ସ୍ତରରେ ସଂଗଠନକୁ ସକ୍ରିୟ କରିବା ଏବଂ ଯୁବ ନେତୃତ୍ୱକୁ ସୁଯୋଗ ଦେବା ଉଦ୍ଦେଶ୍ୟରେ ଏହି ବଡ଼ ଧରଣର ଅଦଳବଦଳ କରାଯାଉଥିବା ଆଲୋଚନା ହେଉଛି। ଆଗାମୀ କିଛି ଦିନ ମଧ୍ୟରେ କଂଗ୍ରେସ ହାଇକମାଣ୍ଡ ଏନେଇ ବଡ଼ ଘୋଷଣା କରିପାରନ୍ତି ବୋଲି ରାଜନୈତିକ ମହଳରେ ଚର୍ଚ୍ଚା ଚାଲିଛି।
