ପୁରୀ: ସ୍ନାନ ଯାତ୍ରା ଓ ଘୋଷଯାତ୍ରାକୁ ସୁରୁଖୁରୁରେ କରିବାକୁ ଶ୍ରୀମନ୍ଦିର ମୁଖ୍ୟ ପ୍ରଶାସକ ଡକ୍ଟର କ୍ରିଷନ କୁମାର ସମସ୍ତଙ୍କ ସହଯୋଗ କାମନା କରିଛନ୍ତି । ଏଥିନେଇ ଘନଘନ ବୈଠକ କରୁଛନ୍ତି । ଅଧିକାରୀ ତଥା ଶ୍ରୀମନ୍ଦିର ନିଯୋଗ, ସେବାୟତ, ଠାକୁର ରାଜା, ଜଗତଗୁରୁ ଶଙ୍କରାଚାର୍ଯ୍ୟଙ୍କ ସହ ରିତିମତ ସମ୍ପର୍କ ସ୍ଥାପନ କରି ଉଭୟ ସ୍ନାନ ଯାତ୍ରା ଓ ଘୋଷଯାତ୍ରାକୁ ରୀତିନୀତି ମଧ୍ୟରେ ସଫଳ କରିବାକୁ ପ୍ରୟାସ ଜାରି ରଖିଛନ୍ତି । ପୁରୀରେ କରୋନା ସଂକ୍ରମଣ ଆଉ ଯେମିତି ବୃଦ୍ଧି ନ ପାଏ ସେଥିପାଇଁ ପୁରୀବାସୀଙ୍କ ସହଯୋଗ କାମନା କରିଛନ୍ତି ଡ କୁମାର । ସ୍ନାନଯାତ୍ରା ଠାରୁ ନୀଳାଦ୍ରୀବିଜେ ପର୍ଯ୍ୟନ୍ତ ଶ୍ରୀଜୀଉମାନଙ୍କ ସମସ୍ତ କାର୍ଯ୍ୟ ଯେମିତି ବିନା ପ୍ରତିବନ୍ଧକରେ ସମ୍ପନ୍ନ ହେବ ସେଥିପାଇଁ ପୁରୀବାସୀଙ୍କ ସହଯୋଗ ଲୋଡିଛନ୍ତି । ଏସମ୍ପର୍କରେ ଡକ୍ଟର କୁମାର କହିଛନ୍ତି, ଶ୍ରୀଜଗନ୍ନାଥଙ୍କ ମୂଳପୀଠର କିଭଳି ବିଧି ରକ୍ଷାହେବ ସେଥିପାଇଁ ସମସ୍ତେ ସହଯୋଗ କରିବା ଆବଶ୍ୟକ ।
ରଥ ନିର୍ମାଣରେ ନିୟୋଜିତ ସମସ୍ତ ମହାରଣା, ଭୋଇ ଓ ରୂପକାର, ଅନ୍ୟ ସେବକମାନଙ୍କ କିଭଳି ଦିନରାତି କାର୍ଯ୍ୟ କରୁଛନ୍ତି ତାହାକୁ ପ୍ରଶଂସା କରିଛନ୍ତି । ସେମାନଙ୍କ ତ୍ୟାଗ ଯୋଗୁଁ ସମସ୍ତ କାର୍ଯ୍ୟ ସୁରୁଖୁରୁରେ ଆଗେଇ ଚାଲିଥିବା ସେ ସୂଚନା ଦେଇଛନ୍ତି । ଗତକାଲି ଗରଗରା ଖାପ କାମ ପରେ ପାଞ୍ଚ ଦଣ୍ଡା ଉପରେ ଫିଟିଙ୍ଗ କରାଯାଇ ପୋଲ ଗୟଳ ଲଗାଯାଇଛି । ଭୂଇଁ ଚଉଡା କାଠରେ ସାଲ ସହ ବିନ୍ଧ କାମ ସରିଥିବାବେଳେ ନାଗ ଗୋଡରେ ରୂପକାର ସେବକମାନେ ରାହୁ ରୂପ ଖୋଦେଇ କାମ ଜାରି ରଖିଛନ୍ତି । ଛନ୍ଦା ଗୟଳ ଚଉପଟ କାମ ଶେଷ ପର୍ଯ୍ୟାୟରେ ପହଞ୍ଚିଛି । ୧୪ ନାହାକା କାଠରେ ଚାରି କଣ ଅଂଶ ମରା କାମ ସରିଛି । ଚାରି ନାହାକାକୁ ବାନ୍ଧି ରଖିବାପାଇଁ ‘ଢମକ’ ପ୍ରସ୍ତୁତ ଚାଲିଛି । ଓଝା ସେବକମାନେ ଗୟଳ ଲଗାଇବା ପାଇଁ ଆବଶ୍ୟକ ମତେ ଗୟଳକଣ୍ଟା ରଥ ଖଳାକୁ ଯୋଗାଇବା ସହ ପୋଟଳ କଣ୍ଟା ପ୍ରସ୍ତୁତ ସରିଛି।
