ହାତୀ ଶାବକର ଶବ ଉଦ୍ଧାର

(ମହାଭାରତ, ରେଢାଖୋଲ): ସମ୍ବଲପୁର ଜିଲ୍ଲା ରେଢାଖୋଲ ଡିଭିଜନ ଅନ୍ତର୍ଗତ ବଡମାଳା ରେଞ୍ଜ ଅଧିନରେ ଥିବା ସଗଜୁଆରି ଠାରେ ଏକ ହାତୀ ଶାବକର ଶବକୁ ବନବିଭାଗ କର୍ମଚାରୀମାନେ ଉଦ୍ଧାର କରିଛନ୍ତି । ମିଳିଥିବା ସୂଚନା ଅନୁସାରେ, ବନ ବିଭାଗ କର୍ମଚାରୀଙ୍କ ପକ୍ଷରୁ ସନ୍ଧାନ ଚାଲିଥିବା ବେଳେ ଏହି ହାତୀ ଛୁଆର ମୃତଦେହକୁ ଉଦ୍ଧାର କରାଯାଇଥିଲା । ଗତ ତିନି ଦିନ ଧରି ନିକଟସ୍ଥ ଖସଡା ଜଙ୍ଗଲରେ ପଡିରହିଥିବା ଏହି ୨ ବର୍ଷିୟ ହାତୀ ଶାବକର ମୃତଦେହକୁ ଜିଲ୍ଲା ଜଙ୍ଗଲ ଅଧିକାରୀ (ଡିଏଫଓ) ଚିହ୍ନଟ କରିଥିଲେ । ହାତୀ ଶାବକର ମୃତ୍ୟୁର କାରଣ ଏଯାଏ ଅସ୍ପଷ୍ଟ ରହିଛି । ବନ ବିଭାଗ କର୍ମଚାରୀମାନେ ଏନେଇ ତଦନ୍ତ ଜାରି ରଖିବା ସହ ଶବ ବ୍ୟବଚ୍ଛେଦ ପରେ ମୃତ୍ୟୁର କାରଣ ଜଣାପଡିବ ବୋଲି ସୂଚନା ମିଳିଛି ।