ଭାରତ-ବାଂଲାଦେଶ ସମ୍ପର୍କ ମଧ୍ୟରେ ଶେଖ ହାସିନାଙ୍କ ଅଗଷ୍ଟ ୫ କାର୍ଯ୍ୟକ୍ରମକୁ ନେଇ ବଢ଼ିଛି କୂଟନୀତିକ ଚର୍ଚ୍ଚା। ଛାତ୍ର ଆନ୍ଦୋଳନ ପରେ କ୍ଷମତାରୁ ବିଦାୟ ନେବାର ପ୍ରାୟ ଦୁଇ ବର୍ଷ ପରେ ପୂର୍ବତନ ବାଂଲାଦେଶ ପ୍ରଧାନମନ୍ତ୍ରୀ ଶେଖ ହାସିନା ଦିଲ୍ଲୀରୁ ଏକ ଭର୍ଚୁଆଲ୍ ଭାଷଣ ଦେବାକୁ ଯାଉଛନ୍ତି। ଦକ୍ଷିଣ ଏସିଆର ବିଦେଶୀ ସାମ୍ବାଦିକ କ୍ଲବ୍ ପକ୍ଷରୁ ଏହି କାର୍ଯ୍ୟକ୍ରମ ଆୟୋଜିତ ହେଉଥିବା ବେଳେ ଏହାକୁ ନେଇ ବାଂଲାଦେଶ ଭାରତ ନିକଟରେ ଆପତ୍ତି ଉଠାଇଛି।
ଢାକାର ପକ୍ଷରୁ ଭାରତକୁ ଅନୁରୋଧ କରାଯାଇଛି ଯେ, ଶେଖ ହାସିନା କିମ୍ବା ଆୱାମୀ ଲିଗ ସହ ଜଡ଼ିତ କୌଣସି ବ୍ୟକ୍ତିଙ୍କୁ ଭାରତୀୟ ଭୂମିରୁ ରାଜନୈତିକ କାର୍ଯ୍ୟକଳାପ କିମ୍ବା ବାଂଲାଦେଶର ଆଭ୍ୟନ୍ତରୀଣ ସ୍ଥିତିକୁ ପ୍ରଭାବିତ କରିପାରୁଥିବା କୌଣସି କାର୍ଯ୍ୟ ପାଇଁ ଅନୁମତି ନ ଦିଆଯାଉ। ଏହା ସହ ଶେଖ ହାସିନାଙ୍କ ପ୍ରତ୍ୟର୍ପଣ ଦାବିକୁ ମଧ୍ୟ ବାଂଲାଦେଶ ପୁଣିଥରେ ଦୋହରାଇଛି।
ଏହି ପ୍ରସଙ୍ଗରେ ଭାରତର ବୈଦେଶିକ ମନ୍ତ୍ରଣାଳୟ ସ୍ପଷ୍ଟ କରିଛି ଯେ, ଅଗଷ୍ଟ ୫ର କାର୍ଯ୍ୟକ୍ରମ ସରକାରୀ ନୁହେଁ। ବୈଦେଶିକ ମନ୍ତ୍ରଣାଳୟର ମୁଖପାତ୍ର ରଣଧୀର ଜୟସୱାଲ କହିଛନ୍ତି, ଏହା ଏକ ଘରୋଇ ଗଣମାଧ୍ୟମ ସଂଗଠନ ପକ୍ଷରୁ ଆୟୋଜିତ କାର୍ଯ୍ୟକ୍ରମ ଏବଂ ଏଥିରେ ଭାରତ ସରକାରଙ୍କ କୌଣସି ଭୂମିକା ନାହିଁ। ଏହି ମଞ୍ଚରୁ ପ୍ରକାଶ ପାଉଥିବା ମତାମତକୁ ସରକାର ସମର୍ଥନ କରେନାହିଁ।
ଅନ୍ୟପଟେ ବାଂଲାଦେଶର ପକ୍ଷରୁ କୁହାଯାଇଛି ଯେ, ଶେଖ ହାସିନା ଦେଶକୁ ଫେରି ଆଇନର ସାମ୍ନା କରିବା ଉଚିତ। ବାଂଲାଦେଶ ସରକାରଙ୍କ ପରାମର୍ଶଦାତା ଜାହିଦ ଉର ରହମାନ କହିଛନ୍ତି, ଏନେଇ ଭାରତକୁ ଆନୁଷ୍ଠାନିକ ଭାବେ ଚିଠି ଲେଖାଯାଇଛି ଏବଂ ଭାରତୀୟ ହାଇକମିଶନରଙ୍କ ନିକଟରେ ମଧ୍ୟ ପ୍ରସଙ୍ଗ ଉଠାଯାଇଛି। ତାଙ୍କ କହିବା ଅନୁସାରେ, ହାସିନା ଫେରିଲେ ତାଙ୍କୁ ଗିରଫ କରାଯିବ, ତେବେ ଆଇନ ଅନୁଯାୟୀ ସମସ୍ତ ଅଧିକାର ମଧ୍ୟ ତାଙ୍କୁ ଦିଆଯିବ।
ଏହାରି ମଧ୍ୟରେ ବ୍ରିକ୍ସ ସମ୍ମିଳନୀକୁ ନେଇ ମଧ୍ୟ ଭାରତ ସ୍ପଷ୍ଟୀକରଣ ଦେଇଛି। ବୈଦେଶିକ ମନ୍ତ୍ରଣାଳୟ କହିଛି, ବାଂଲାଦେଶର ଅନ୍ତର୍ବର୍ତ୍ତୀ ସରକାର ମୁଖ୍ୟଙ୍କୁ ଦ୍ୱିପାକ୍ଷିକ ଗସ୍ତ ପାଇଁ ପୂର୍ବରୁ ଆନୁଷ୍ଠାନିକ ନିମନ୍ତ୍ରଣ ଦିଆଯାଇଥିଲା। ଏହାବ୍ୟତୀତ, ବିମଷ୍ଟେକର ବର୍ତ୍ତମାନର ଅଧ୍ୟକ୍ଷ ଭାବରେ ବ୍ରିକ୍ସ ଆଉଟରିଚ୍ ଅଧିବେଶନରେ ଯୋଗଦେବା ପାଇଁ ମଧ୍ୟ ଏକ ପୃଥକ ନିମନ୍ତ୍ରଣ ପଠାଯାଇଛି। ମନ୍ତ୍ରଣାଳୟ କହିଛି, ଏହା ବ୍ରିକ୍ସର ସାଧାରଣ କୂଟନୀତିକ ପ୍ରକ୍ରିୟାର ଅଂଶ।
ସେହିପରି, ପାକ୍ ଅଧିକୃତ ଜମ୍ମୁ-କାଶ୍ମୀରରେ ହେଉଥିବା ତଥାକଥିତ ସ୍ଥାନୀୟ ନିର୍ବାଚନକୁ ମଧ୍ୟ ଭାରତ କଡ଼ା ଭାଷାରେ ସମାଲୋଚନା କରିଛି। ବୈଦେଶିକ ମନ୍ତ୍ରଣାଳୟ କହିଛି, ଏହି ନିର୍ବାଚନ ସମ୍ପୂର୍ଣ୍ଣ ନକଲି ଏବଂ ଏହା ସେଠାର ବାସ୍ତବ ସ୍ଥିତିକୁ ଲୁଚାଇ ପାରିବ ନାହିଁ। ଭାରତର ଅଭିଯୋଗ ଅନୁଯାୟୀ, ପାକିସ୍ତାନ ସେଠାରେ ଦମନମୂଳକ ପଦକ୍ଷେପ ନେଉଛି ଏବଂ ନିର୍ବାଚନ ମାଧ୍ୟମରେ ସେହି କାର୍ଯ୍ୟକୁ ବୈଧତା ଦେବାକୁ ଚେଷ୍ଟା କରୁଛି।
