ଝାରସୁଗୁଡା: ଠାବ ହେଲା ଆଇପିଏଲ ବେଟିଂ ରାକେଟ । ଆଇପିଏଲ ବେଟିଂରେ ଦୁଇ ଜଣଙ୍କୁ ଗିରଫ କରିବା ସହ ଜବତ କରିଛି ଲକ୍ଷ ଲକ୍ଷ ଟଙ୍କା । କେବଳ ଦେଶ ନୁହେଁ, ଦେଶ ବାହାରେ ମଧ୍ୟ ଏହି ରାକେଟର ଲିଙ୍କ ଥିବା ଜଣା ପଡିଛି ।
ଝାରସୁଗୁଡା ସହର ଗୋଶାଳା ଛକ ନିକଟରେ ଆଇପିଏଲ ମ୍ୟାଚକୁ ନେଇ ବେଟିଂ କରାଯାଉଥିବା ସୂଚନା ପାଇଥିଲା ପୋଲିସ । ଖବର ପାଇବା ପରେ ଗୋଶାଳା ଛକର ଏକ କୋଠରୀରେ ଟାଉନ ପୋଲିସ ଚଢାଉ କରିଛି । ଏହି ଚଢାଉରେ ପୋଲିସ ଏକ ଆଇପିଏଲ ରାକେଟ ଠାବ କରି ଦୁଇ ଜଣଙ୍କୁ ଗିରଫ କରିଛି । ଏହା ସହିତ ଘଟଣାସ୍ଥଳରୁ ନଗଦ ୬ ଲକ୍ଷ ୮୦ ହଜାର ଟଙ୍କା ମଧ୍ୟ ଜବତ କରାଯାଇଛି ।
ଗିରଫ ହୋଇଥିବା ଦୁଇ ଅଭିଯୁକ୍ତ ହେଉଛନ୍ତି ହରିଶ ସାହୁ ଏବଂ ଅକିଲ ଆଜିଜ ମୋତିବାଲା । ତେବେ ପୋଲିସ ସୂଚନା ଅନୁଯାୟୀ ଏହି ମାମଲାରେ ଆଉ ଦୁଇ ଜଣ ଜଡିତ ଅଛନ୍ତି । ଉଭୟ ସମ୍ବଲପୁର ଏବଂ କୋଲକାତାରେ ଥିବା ନେଇ ପୋଲିସ ସୂତ୍ରରୁ ପ୍ରକାଶ ପାଇଛି ।
