(ହିମାଚଳ) : ଲୋକସଭା ନିର୍ବାଚନ ପାଇଁ ପ୍ରତ୍ୟେକ ରାନୈତୀକ ଦଳର କର୍ମୀମାନଙ୍କ ମନରେ ଉତ୍ସାହ ପରିଲକ୍ଷିତ ହେଉଛି । ଏଥର ଚର୍ଚ୍ଚାରେ ରହିଛି ହିମାଚଳ ପ୍ରଦେଶର ମଣ୍ଡି ଆସନ । ନିର୍ବାଚନ ପ୍ରଚାର ମଧ୍ୟରେ ଆରୋପ ଏବଂ ପ୍ରତ୍ୟାରୋପ ମଧ୍ୟ ଜାରି ରହିଛି। ବର୍ତ୍ତମାନ ମଣ୍ଡି ଲୋକସଭା ଆସନରୁ ବିଜେପି ପ୍ରାର୍ଥୀ କଙ୍ଗନା ରଣାୱତ କାହାରି ନାଁ ନ ନେଇ ହିମାଚଳ ମନ୍ତ୍ରୀ ତଥା କଂଗ୍ରେସ ନେତା ବିକ୍ରମଦିତ୍ୟ ସିଂଙ୍କୁ ଟାର୍ଗେଟ୍ କରିଛନ୍ତି ।
ସେ ସିଧାସଳଖ ଚ୍ୟାଲେଞ୍ଜ କରି କହିଛନ୍ତି ଯେ, ଏହା କାହାର ପିତାମାତାଙ୍କ ସମ୍ପତ୍ତି ନୁହେଁ ଯେ ମୋତେ ଡରାଇ ଧମକାଇ ପଠାଇ ଦିଆଯିବ । କଂଗ୍ରେସ ନେତା ବିକ୍ରମଦିତ୍ୟଙ୍କ ନାମ ନ ନେଇ ମଣ୍ଡି ଲୋକସଭା ଆସନରୁ ବିଜେପି ପ୍ରାର୍ଥୀ କଙ୍ଗନା ରଣାୱତ ଆହୁରି କହିଛନ୍ତି, ମୁଁ ସବୁ ସ୍ଥାନରେ ଏପରି ରାଜାଙ୍କ ପୁଅ ପାଇଛି। ଇଣ୍ତିଆ ମେଣ୍ଟ ସରକାର ନିଜ ପ୍ରାର୍ଥୀଙ୍କ ଉପରେ ନିଷ୍ପତ୍ତି ନେବାକୁ ସକ୍ଷମ ନୁହଁନ୍ତି। ସେମାନେ ନର୍ଭସ ଏବଂ ଭୟଭୀତ ଅଛନ୍ତି । ତାଙ୍କ ପାଖରେ କୌଣସି ରାଜନୈତୀକ ପ୍ରସଙ୍ଗ ନାହିଁ । ଯଦି ସେ ଭୟ କରି ନଥାନ୍ତେ ତେବେ ସେ ମହିଳାଙ୍କ ବିରୋଧରେ ଅଶ୍ଳୀଳ ମନ୍ତବ୍ୟ ଦେଇ ନଥାନ୍ତେ। ମୋତେ ସବୁବେଳେ ରାଜବଂଶ ରାଜନୀତି ସହ ସାମ୍ନା କରିବାକୁ ପଡିବ । ସେ ଆହୁରି କହିଛନ୍ତି ଯେ, ଏଠାରେ ମଧ୍ୟ ତାଙ୍କ ସରକାର ଭାଙ୍ଗୁଥିବାର ଦେଖିବା ପାଇଁ ମିଳୁଛି, ତାଙ୍କ ସରକାର ଯେକୌଣସି ସମୟରେ ମଧ୍ୟ ଭାଙ୍ଗି ଯାଇପାରେ ।
