ଭୁବନେଶ୍ୱର/ଶିଳାସ୍ମିତା ରାୟ: ପ୍ରଦୀପ ପାଣିଗ୍ରାହୀଙ୍କୁ ଦଳରୁ ବହିସ୍କାର ପରେ ଦଳରେ ଲାଗିରହିଥିବା ଅଭ୍ୟନ୍ତର କନ୍ଦଳ ପଦାରେ ପଡିଛି । ଅଭ୍ୟନ୍ତରୀଣ କନ୍ଦଳ ବ୍ୟତୀତ ଦଳର ଦୁଇ ନେତା ଓ ପ୍ରଶାସକ ନବୀନ ସରକାର ହଟେଇବାକୁ ରିତିମତ ଷଡଯନ୍ତ୍ର କରୁଥିଲେ । ରାଜନୈତିକ ବିଶେଷଜ୍ଞଙ୍କ ଅନୁଯାୟୀ ସରକାର ଭାଙ୍ଗିବାକୁ ହେଉଥିବା ଷଡଯନ୍ତ୍ର ପୂର୍ଣ୍ଣ ରୂପ ନେବା ପୂର୍ବରୁ କିନ୍ତୁ ଷଡଯନ୍ତ୍ରକାରୀଙ୍କ ପଥରେ କଣ୍ଟା ସାଜିଲେ ପ୍ରଦୀପ । ଯେଉଁଥି ପାଇଁ ପ୍ରଥମେ ତାଙ୍କୁ ଝିଅ ବାହାଘର କେମିତି କରିବ ବୋଲି ଧମକ ଦିଆଯାଇଥିଲା । ପରେ ପ୍ରଦୀପଙ୍କ ଭବିଷ୍ୟତ ଜ୍ୱାଇଁ ଆକାଶ ପାଠକ ଓ ତାଙ୍କ ବାପା ଅଭୟ ପାଠକଙ୍କୁ ଜାଲିଆତି ଅଭିଯୋଗରେ ଗିରଫ କରାଗଲା । ପ୍ରଦୀପ ଦଳର ଜଣେ ପୁରୁଖା ନେତା ଭାବେ ନବୀନଙ୍କ ପ୍ରତି ତାଙ୍କ ବିଶ୍ୱସନୀୟତା ପ୍ରତିପାଦନ କରିବାକୁ ଯାଇ ଆଜି ଦଳରୁ ବହିସ୍କୃତ ହୋଇଥିବା କୁହାଯାଉଛି । ତେବେ କଥାର ବାସ୍ତବତାକୁ ନେଇ ଏଯାବତ୍ କୌଣସି ଠୋସ ପ୍ରମାଣ ମିଳି ନ ଥିଲେ ମଧ୍ୟ ପାରିପାଶ୍ୱିର୍କ ପରିସ୍ଥିତି ଓ ବିଶେଷଜ୍ଞ ତଥ୍ୟ ଆଧାରରେ ଏହା ଉପସ୍ଥାପନ କରାଯାଉଛି ।
୨୦୧୯ ସାଧାରଣ ନିର୍ବାଚନ ପୂର୍ବରୁ ମୁଖ୍ୟମନ୍ତ୍ରୀ ତାଙ୍କ ଉତ୍ତରାଧିକାରୀ ତାଙ୍କ ପରିବାରୁ କେହି ହେବେ ନାହିଁ କହିବା ପରେ ଦଳର କିଛି ନେତାଙ୍କ ମଧ୍ୟରେ ପରବର୍ତ୍ତୀ ମୁଖ୍ୟମନ୍ତ୍ରୀ ହେବାକୁ ଆଶା ଉକ୍ରଟ ରୂପ ନେଇଥିଲା । ଶୁଣିବାକୁ ମିଳିଆସୁଛି, ଏହି ଦୌଡରେ ଯାଜପୁର ବିଧାୟକ ବବି ଦାସ ଆଗରେ ଥିବା ବେଳେ କନ୍ଧମାଳ ସାଂସଦ ଅଚ୍ୟୁତ ସାମନ୍ତ ମଧ୍ୟ ଦୌଡରୁ ବାଦ ପଡିନାହାନ୍ତି । ଏପରି କି ସାମନ୍ତ ନିଜକୁ ପରବର୍ତ୍ତୀ ମୁଖ୍ୟମନ୍ତ୍ରୀ ବୋଲି ମଧ୍ୟ ଘୋଷଣା କରି ସାରିଛନ୍ତି । ଆଉ ଅବିଶ୍ୱନୀୟ ହୋଇଥିଲେ ମଧ୍ୟ କୁଆଡେ ଷଡଯନ୍ତ୍ରର ମାଷ୍ଟର ମାଇଣ୍ଡ ମୁଖ୍ୟମନ୍ତ୍ରୀଙ୍କ ବ୍ୟକ୍ତିଗତ ସଚିବ । ଏସବୁ ଶୁଣା କଥା । କିନ୍ତୁ ଦଳରୁ ପ୍ରଦୀପ ବହିଷ୍କାର ହେବା ପରେ ଏହି ପ୍ରସଙ୍ଗ ଏବେ ଚର୍ଚ୍ଚାକୁ ଫେରିଛି ।
ବିଶେଷଜ୍ଞ ଅନୁଯାୟୀ, ୨୦ ବର୍ଷ ଧରି ପ୍ରଦୀପ ମୁଖ୍ୟମନ୍ତ୍ରୀଙ୍କ ଗୁଡ ବୁକରେ ରହି ଆସିଥିଲେ । ମୁଖ୍ୟମନ୍ତ୍ରୀଙ୍କର ପ୍ରଦୀପଙ୍କ ଉପରେ ଅଗାଢ ବିଶ୍ୱାସ । ଯେଉଁଥି ପାଇଁ ମୁଖ୍ୟମନ୍ତ୍ରୀ ତାଙ୍କୁ ତାଙ୍କ ପ୍ରତିନିଧିଭାବେ ହିଞ୍ଜିଳିରେ ଅବସ୍ଥାପିତ କରିଥିଲେ । ଏପରି କି ପ୍ରଦୀପ ମଧ୍ୟ ୩ ତିନି ଥର ମନ୍ତ୍ରୀ ହେବାର ସୁଯୋଗ ହାସଲ କରିଛନ୍ତି । କିନ୍ତୁ ସାଧାରଣ ନିର୍ବାଚନ ପରେ ପ୍ରଦୀପଙ୍କୁ ମୁଖ୍ୟମନ୍ତ୍ରୀଙ୍କଠାରୁ ଦୂରେଇ ରଖିବାକୁ ଦଳର ସକ୍ରିୟ ଓ ସୁପ୍ରିମୋଙ୍କ କିଛି ନିକଟତର ନେତା ଓ ବ୍ୟକ୍ତିଗତ ସଚିବ ପ୍ରୟାସ କରିଥିଲେ । ଏହା ମଧ୍ୟରେ କୋଭିଡ ପରିସ୍ଥିତି ସୃଷ୍ଟି ହୋଇଥିଲା । କୋଭିଡକୁ ନେଇ ସୁପ୍ରିମୋଙ୍କୁ କାହାରିକୁ ଭେଟିବାକୁ ଦିଆଯାଇ ନ ଥିଲା । ଏହାରି ମଧ୍ୟରେ ଧୀରେ ଧୀରେ ପ୍ରଦୀପ ନିଜ ନିର୍ବାଚନ ମଣ୍ଡଳୀରେ ନିଜକୁ ସୀମିତ ରଖିଥିଲେ । କିନ୍ତୁ ଗତ ମାସରେ ପ୍ରଦୀପଙ୍କୁ ଦଳର ଜଣେ ନେତାଙ୍କଠାରୁ ସୂଚନା ମିଳିଥିଲା କି ନବୀନ ସରକାର ଭାଙ୍ଗିବାକୁ ଷଡଯନ୍ତ୍ର ପ୍ରସ୍ତୁତ କରାଯାଉଛି । ଏହି ଷଡଯନ୍ତ୍ରରେ ବବି ଦାସ, ଅଚ୍ୟୁତ ସାମନ୍ତ ଓ ପାଣ୍ଡିଆନ ମୁଖ୍ୟ ପୁରୋଧା ସାଜିଛନ୍ତି ।
ସୂଚନା ପାଇ ବିଧାୟକ ନିଜକୁ ନିୟନ୍ତ୍ରଣ କରି ପାରି ନ ଥିଲେ । ଦଳ ତଥା ସୁପ୍ରିମୋଙ୍କ ପ୍ରତି ତାଙ୍କ ବିଶ୍ୱସନୀୟତା ଏହି ଷଡଯନ୍ତ୍ରକାରୀଙ୍କ ଠାରୁ ତାଙ୍କୁ ତଥା ତାଙ୍କ ପରିବାର ପ୍ରତି ଥିବା ଭବିଷ୍ୟତ ବିପଦ ସମ୍ପର୍କରେ ଚିନ୍ତା କରିନଥିଲେ । ସେ ମୁଖ୍ୟମନ୍ତ୍ରୀଙ୍କୁ ସିଧାସଳଖ ଫୋନ କରି ସରକାର ଭାଙ୍ଗିବା ପାଇଁ ହେଉଥିବା ଷଡଯନ୍ତ୍ର ସମ୍ପର୍କରେ ସୂଚିତ କରିଥିଲେ । ଯେଉଁ ଦିନ ସେ ମୁଖ୍ୟମନ୍ତ୍ରୀଙ୍କୁ ଷଡଯନ୍ତ୍ରକ ବିଷୟରେ ଅବଗତ କଲେ ସେହି ରାତିରେ ତାଙ୍କ ଘରେ ବବି ଓ ଅଚ୍ୟୁତ ପହଞ୍ଚିଥିଲେ । ସେ ଯାହା କରୁଛନ୍ତି, ତାହା କଣ ଠିକ ବୋଲି ପଚାରିବା ସହ ଏହି କାର୍ଯ୍ୟରୁ ଓହରିଯିବାକୁ କହିଥିଲେ । ବବି ଏଥିସହ ଝିଅର ବିବାହ ତାରିଖ ପଚାରି ବୁଝି ଝିଅ ବିବାହ କିପରି କରୁଛ ବୋଲି ଧମକ ମଧ୍ୟ ଦେଇଥିବା ଶୁଣିବାକୁ ମିଳୁଛି । ବବି ଓ ଅଚ୍ୟୁତଙ୍କ ଧମକ ପରେ ପରେ ହିଁ ପ୍ରଦୀପଙ୍କ ସମୁଦି ତଥା ଆଇଏଫଏସ ଅଫିସର ଅଭୟ ପାଠକଙ୍କ ଘରେ ଚଢଉ କରାଯାଇ ତାଙ୍କୁ ଓ ତାଙ୍କ ପୁଅ ତଥା ପ୍ରଦୀପଙ୍କ ଭାବି ଜ୍ୱାଇଁ ଆକାଶ ପାଠକଙ୍କୁ ଗିରଫ କରାଗଲା । ପ୍ରଦୀପଙ୍କ ମୁହଁ ବନ୍ଦ କରିବାକୁ ଯାଇ ପ୍ରଦୀପଙ୍କ ଝିଅଙ୍କ ଭବିଷ୍ୟତ ସହ ମଧ୍ୟ ଖେଳିବାକୁ କ୍ଷମତାନ୍ଧ ବିଜେଡି ନେତା ପଛେଇ ନ ଥିବା କୁହାଯାଉଛି ।
ତେବେ ଏହି ତଥ୍ୟ ଗୋଟିଏ କଥା ସ୍ପଷ୍ଟ କରିଛି, କରୋନା କଟକଣା ବିଜେଡିର ଏହି ସ୍ୱାର୍ଥାନ୍ଧ ଓ କ୍ଷମତାନ୍ଧ ନେତାଙ୍କୁ ସୁଯୋଗ ଦେଇଛି ମୁଖ୍ୟମନ୍ତ୍ରୀଙ୍କୁ ଅନ୍ୟ ନେତା ମନ୍ତ୍ରୀଙ୍କଠାରୁ ଅଲଗା କରିବାରେ । କୋଭିଡ ପାଇଁ ଏପ୍ରିଲ ମାସରୁ ମୁଖ୍ୟମନ୍ତ୍ରୀଙ୍କ ଦ୍ୱାର ତାଙ୍କ ଦଳୀୟ ନେତା ମନ୍ତ୍ରୀଙ୍କ ପାଇଁ ବନ୍ଦ ରହିଥିବା କୁହାଯାଇ ଆସୁଛି । ତାଙ୍କୁ କାହାରିକୁ ଭେଟିବାକୁ ଦିଆଯାଉ ନାହିଁ । ମୁଖ୍ୟମନ୍ତ୍ରୀଙ୍କ ଏହି ଗୃହବନ୍ଦୀକୁ ନେଇ ଗଣମାଧ୍ୟମରେ ବିଭିନ୍ନ ସମୟରେ ଚର୍ଚ୍ଚା ହୋଇଛି । କିନ୍ତୁ ସେ ନୀରବ । ତେବେ ମନରେ ସ୍ୱତଃପ୍ରବୃତ୍ତ ଭାବେ ଏହି ଷଡଯନ୍ତ୍ର ସମ୍ପର୍କରେ ଜାଣିବା ପରେ ପ୍ରଶ୍ନ ଉଠୁଛି, କୋଭିଡ ପାଇଁ ମୁଖ୍ୟମନ୍ତ୍ରୀ ନିଜକୁ ଏକାନ୍ତବାସରେ ରଖିଛନ୍ତି ନାଁ ତାଙ୍କ ସରକାର ଭାଙ୍ଗିବାର ଷଡଯନ୍ତ୍ର କରୁଥିବା ଷଡଯନ୍ତ୍ରକାରୀମାନେ ଗୃହବନ୍ଦୀ କରି ରଖିଛନ୍ତି । କାରଣ କୋଭିଡ ପରଠାରୁ ମୁଖ୍ୟମନ୍ତ୍ରୀ ବେଶୀ ବାହାରକୁ ବାହାରି ନାହାନ୍ତି । ଯେଉଁ ୫-୭ ଥର ବାହାରିଛନ୍ତି ତାହା ସ୍ୱଳ୍ପ ସମୟ ପାଇଁ ଓ ସାଙ୍ଗରେ ତାଙ୍କ ବ୍ୟକ୍ତିଗତ ସଚିବ ଛାୟୀ ପରି ରହିଛନ୍ତି । ତାଙ୍କ ସହ ମଧ୍ୟ କାହାରିକୁ କଥା ହେବାର ସୁଯୋଗ ଦିଆଯାଇ ନାହିଁ ।
