ମଧ୍ୟପ୍ରାଚ୍ୟ ଯୁଦ୍ଧ ଏବଂ ହର୍ମୁଜ୍ ପ୍ରଣାଳୀର ଅବରୋଧ ଯୋଗୁଁ ତୈଳ ଏବଂ ଗ୍ୟାସ ଯୋଗାଣ ବାଧାପ୍ରାପ୍ତ ହେଉଥିବାରୁ ଶୁକ୍ରବାର କେନ୍ଦ୍ର ସରକାର ପେଟ୍ରୋଲ ଏବଂ ଡିଜେଲର ମୂଲ୍ୟ ଲିଟର ପିଛା ୩ ଟଙ୍କା ବୃଦ୍ଧି କରିଥିବା ବେଳେ, ସିଏନଜିର ମୂଲ୍ୟ ମଧ୍ୟ କିଲୋ ପ୍ରତି ୨ ଟଙ୍କା ବୃଦ୍ଧି କରିଛନ୍ତି । ଶୁକ୍ରବାର ସକାଳ ୬ଟାରୁ ଦିଲ୍ଲୀ ସମେତ ସାରା ଦେଶରେ ପେଟ୍ରୋଲ ଡିଜେଲ ଏବଂ ସିଏନଜିର ମୂଲ୍ୟ ବୃଦ୍ଧି ପାଇଛି ।
ନିୟମିତ ପେଟ୍ରୋଲରେ ଲିଟର ପିଛା ୩.୧୪ ଟଙ୍କା ବୃଦ୍ଧି ପାଇ ଏବେ ଦିଲ୍ଲୀରେ ୯୭.୭୭ ଟଙ୍କା, କୋଲକାତାରେ ୧୦୮.୭୪ ଟଙ୍କା, ମୁମ୍ବାଇରେ ୧୦୬.୬୮ ଟଙ୍କା ଏବଂ ଚେନ୍ନାଇରେ ୧୦୩.୬୭ ଟଙ୍କାରେ ପହଞ୍ଚିଛି । ସେହିପରି ଡିଜେଲ ୩.୧୧ ଟଙ୍କା ମହଙ୍ଗା ହୋଇ ଏବେ ଦିଲ୍ଲୀରେ ୯୦.୬୭ ଟଙ୍କା, କୋଲକାତାରେ ୯୫.୧୩ ଟଙ୍କା, ମୁମ୍ବାଇରେ ୯୩.୧୪ ଟଙ୍କା ଏବଂ ଚେନ୍ନାଇରେ ୯୫.୨୫ ଟଙ୍କାରେ ପହଞ୍ଚିଛି । ୨୦୨୨ ପରେ ପ୍ରଥମ ଥର ପାଇଁ ଆଜି ପେଟ୍ରୋଲ ଏବଂ ଡିଜେଲର ମୂଲ୍ୟ ଏତିକି ପରିମାଣରେ ବୃଦ୍ଧି ପାଇଛି ।
ଇରାନ-ଆମେରିକା ଯୁଦ୍ଧ ଏବଂ ବିଶ୍ୱବ୍ୟାପୀ ଅଶାନ୍ତି ମଧ୍ୟରେ, ଅଶୋଧିତ ତୈଳର ମୂଲ୍ୟ ଆକାଶଛୁଆଁ ହୋଇଛି, ଯାହା ଫଳରେ ଭାରତୀୟ ସରକାରୀ କମ୍ପାନୀଗୁଡ଼ିକ ପାଇଁ ପ୍ରତିଦିନ ₹୧,୦୦୦ କୋଟି କିମ୍ବା ମାସିକ ₹୩୦,୦୦୦ କୋଟି କ୍ଷତି ହେଉଛି । ଅଶୋଧିତ ତୈଳ, ଯାହା ବର୍ତ୍ତମାନ ପର୍ଯ୍ୟନ୍ତ ପ୍ରାୟ $୭୦ ପ୍ରତି ବ୍ୟାରେଲ ଥିଲା, ଏବେ ବ୍ୟାରେଲ ପ୍ରତି $୧୨୬ରେ ପହଞ୍ଚିଛି ।
