ଜିଲ୍ଲାପାଳଙ୍କ ନାମରେ ହତ୍ୟା ଅଭିଯୋଗ

(ପ୍ରଶାନ୍ତ କୁମାର ସ୍ୱାଇଁ/ପାରାଦ୍ବୀପ): ଜଗତସିଂହପୁର ଜିଲ୍ଲାପାଳ ସଂଗ୍ରାମ କେଶରୀ ମହାପାତ୍ରଙ୍କ ନାମରେ ହତ୍ୟା ଅଭିଯୋଗ ଆସିଛି । କୁଜଙ୍ଗ ପ୍ରଥମ ଶ୍ରେଣୀ ବିଚାର ବିଭାଗୀୟ ଅଦାଲତରେ ଏହି ମାମଲାର ଶୁଣାଣି ଆରମ୍ଭ ହୋଇଛି । ସୁଚନା ଅନୁଯାୟୀ ୨୦୧୩ ମସିହା ଫେବୃଆରୀ ୩ ତାରିଖରେ ତତ୍କାଳୀନ ଲ୍ୟାଣ୍ଡ ଆକ୍ବେସନ ଅଫିସର ତଥା ବର୍ତ୍ତମାନର ଜଗତସିଂହପୁର ଜିଲ୍ଲାପାଳ ସଂଗ୍ରାମ କେଶରୀ ମହାପାତ୍ର ପୋସ୍କୋ ଜମି ଅଧିଗ୍ରହଣ ସମୟରେ ଆନ୍ଦୋଳନ କରୁଥିବା ଲୋକଙ୍କୁ ଗୋଡେଇ ଗୋଡେଇ ପିଟିଥିଲେ । ଏଥିରେ ଗୋବିନ୍ଦପୁର ଗ୍ରାମର ତରୁଣ ମଣ୍ଡଳ ଅଭୟଚାଦପୁର ଥାନା ରେ ଏତଲା ଦେଇଥିଲେ । ଏତଲା ଦେବାର କିଛିଦିନ ମଧ୍ୟରେ ଘଟଣାକୁ ଚପାଇ ଦେବା ପାଇଁ ତରୁଣ ମଣ୍ଡଳଙ୍କୁ ବୋମା ବିସ୍ଫୋରଣ କରି ହତ୍ୟା କରାଯାଇଥିବା ଜଣାପଡିଛି । ଯେଉଁଥିରେ ଅନ୍ୟ ଦୁଇଜଣଙ୍କର ମଧ୍ୟ ମୃତ୍ୟୁ ହୋଇଥିବା ଅଭିଯୋଗ ହୋଇଥିଲା। ଉକ୍ତ ଘଟଣାକୁ ନେଇ ଏହି ମାମଲାରେ ସମ୍ପୃକ୍ତ ଥିବା ଗୋବିନ୍ଦପୁର ଗ୍ରାମର ପ୍ରକାଶ ଜେନା ଓ ଖିର ଦାସ ଦୁଇଟି ପୃଥକ ପୃଥକ ଆବେଦନ କରିଥିଲେ। ଯାହାର ଶୁଣାଣି ଆଜି କୁଜଙ୍ଗ ପ୍ରଥମ ଶ୍ରେଣୀ ବିଚାର ବିଭାଗୀୟ ଅଦାଲତରେ ଆରମ୍ଭ ହୋଇଛି।