ସମୁଦ୍ରର ଅତଳ ଗଭୀରରେ ରାଷ୍ଟ୍ରପତି ଦ୍ରୌପଦୀ ମୁର୍ମୁ । ରାଷ୍ଟ୍ରପତି କର୍ଣ୍ଣାଟକର କରୱାର ନୌସେନା ଘାଟିରୁ ଭାରତର ଷଷ୍ଠ ଏବଂ ଶେଷ କାଲଭାରୀ-ଶ୍ରେଣୀର ବୁଡ଼ାଜାହାଜ INS ଭାଗଶୀର (S26) ଉପରେ ସମୁଦ୍ର ଯାତ୍ରା କରିଥିଲେ। ଭାରତୀୟ ସଶସ୍ତ୍ର ବାହିନୀର ସର୍ବୋଚ୍ଚ କମାଣ୍ଡର ରାଷ୍ଟ୍ରପତି ମୁର୍ମୁଙ୍କ ସହିତ ନୌସେନା ମୁଖ୍ୟ ଆଡମିରାଲ ଦିନେଶ କେ ତ୍ରିପାଠି ଏବଂ ଭାରତୀୟ ନୌସେନାର ଅନ୍ୟାନ୍ୟ ଅଧିକାରୀମାନେ ଉପସ୍ଥିତ ଥିଲେ। ଏହା ସହିତ ରାଷ୍ଟ୍ରପତି ମୁର୍ମୁ କାଲଭାରୀ-ଶ୍ରେଣୀର ବୁଡ଼ାଜାହାଜରେ ଯାତ୍ରା କରିଥିବା ପ୍ରଥମ ରାଷ୍ଟ୍ରମୁଖ୍ୟ ହୋଇଛନ୍ତି। ପୂର୍ବତନ ରାଷ୍ଟ୍ରପତି (ସ୍ୱର୍ଗତଃ) ଏପିଜେ ଅବଦୁଲ କଲାମଙ୍କ ପରେ ସେ ଦ୍ୱିତୀୟ ରାଷ୍ଟ୍ରମୁଖ୍ୟ ଯିଏକି ବୁଡ଼ାଜାହାଜରେ ଯାତ୍ରା କରିଥିଲେ।
କଲାମ ୧୩ ଫେବୃଆରୀ, ୨୦୦୬ରେ ଆନ୍ଧ୍ରପ୍ରଦେଶର ବିଶାଖାପାଟଣାରେ ଏକ ବୁଡ଼ାଜାହାଜ ଯାତ୍ରା କରିଥିଲେ। ପୂର୍ବରୁ, ରାଷ୍ଟ୍ରପତି ଭାରତୀୟ ବାୟୁସେନା (IAF)ର ଦୁଇଟି ବିମାନର ଉଡ଼ାଣ କରିଥିଲେ। ଏପ୍ରିଲ 2023ରେ, ସେ ଆସାମର ତେଜପୁର ସ୍ଥିତ ବାୟୁସେନା ଷ୍ଟେସନରେ ସୁଖୋଇ Su-30 MKI ଲଢ଼ୁଆ ବିମାନର ଏକ ଐତିହାସିକ ଉଡ଼ାଣ କରିଥିଲେ। ଏହି ବିମାନକୁ 106 ସ୍କ୍ବାଡ୍ରନର କମାଣ୍ଡିଂ ଅଫିସର ଗ୍ରୁପ୍ କ୍ୟାପଟେନ୍ ନବୀନ କୁମାର ଉଡ଼ାଣ କରିଥିଲେ। ପରେ ଚଳିତ ବର୍ଷ ଅକ୍ଟୋବର ୨୯ ତାରିଖରେ, ସେ ହରିୟାଣାର ଅମ୍ବାଲାର ବାୟୁସେନା ଷ୍ଟେସନରେ ରାଫେଲ ଲଢ଼ୁଆ ବିମାନ ଉଡ଼ାଣ କରିଥିଲେ। ରାଫେଲ ଜେଟ୍ ୧୭ ସ୍କ୍ୱାଡ୍ରନର କମାଣ୍ଡିଂ ଅଫିସର ଗ୍ରୁପ୍ କ୍ୟାପ୍ଟେନ୍ ଅମିତ ଗେହାନି ଉଡ଼ାଣ କରିଥିଲେ। ଏହା ସହିତ, ମୁର୍ମୁ ଭାରତୀୟ ବାୟୁସେନାର ଦୁଇଟି ଲଢ଼ୁଆ ବିମାନ ଉଡ଼ାଣ କରିଥିବା ଭାରତର ଏକମାତ୍ର ରାଷ୍ଟ୍ରପତି ହୋଇଥିଲେ।
