ଶ୍ରୀନଗର: କରୋନା ଆତଙ୍କରେ ସାରା ବିଶ୍ୱ । ଭାରତରେ ଏହି ଭୂତାଣୁ ସଂକ୍ରମଣକୁ ପ୍ରାଧାନ୍ୟ ଦିଆଯାଇ ଲକଡାଉନକୁ ଆହୁରି ୧୯ ଦିନ ବଢାଇ ଦିଆଯାଇଛି । ଏପରି ସମୟରେ କଶ୍ମୀରର ପୁଲୱାମାର ନେଓ୍ୱା ଅଞ୍ଚଳରେ ସିଆରପିଏଫର ୧୮୩ ବାହିନୀ ଏବଂ ପୁଲିସ୍ କର୍ମଚାରୀଙ୍କ ମିଳିତ ଶିବିର ଉପରେ ଆତଙ୍କବାଦୀ ଆକ୍ରମଣ ହୋଇଛି । ଏଥିରେ ଜଣେ ସିଆରପିଏଫ ଯବାନ ଆହତ ହୋଇଛନ୍ତି। ଆକ୍ରମଣକାରୀ ଆତଙ୍କବାଦୀ ଖସିଯିବାରେ ସକ୍ଷମ ହୋଇଛି । ତେବେ ଆତଙ୍କବାଦାଦୀକୁ ଧରିବାକୁ ଯବାନ ଓ ପୁଲିସ ଅଧିକାରୀ ମିଳିତ ସର୍ଚ୍ଚ ଅପରେସନ ଜାରି ରଖିଛନ୍ତି।
ଜଣେ ଆତଙ୍କବାଦୀ ହଠାତ ଶିବିର ନିକଟରେ ପହଞ୍ଚି ଆଖିବୁଜା ଗୁଳି ଚଳାଇଥିଲା । ଏହି ଗୁଳିରୁ ଗୋଟିଏ ଶିବିର ବାହାରେ ଠିଆହୋଇଥିବା ଜଣେ କନେଷ୍ଟବଳଙ୍କ ଗୋଡରେ ବାଜିଛି । ଆହତ କନେଷ୍ଟବଳଙ୍କ ନାମ ଇନ୍ଦ୍ର କୁମାର । ଗୁଳି ଶବ୍ଦ ଶୁଣି ଶିବିର ଭିତରରୁ ଅନ୍ୟ ଯବାନ ବାହାରି ଆସିବାରୁ ଉକ୍ତ ଆତଙ୍କବାଦୀ ସେଠାରୁ ଖସିଯାଇଥିଲା । ଆହତ ଇନ୍ଦ୍ର କୁମାରଙ୍କୁ ତୁରନ୍ତ ସେନା କ୍ୟାମ୍ପରେ ଭର୍ତ୍ତି କରାଯାଇ ଚିକିତ୍ସା ଚାଲିଛି । ଏହାପରେ ଆକ୍ରମଣକାରୀକୁ ଧରିବାକୁ ସେନା ଓ ପୁଲିସ ପକ୍ଷରୁ ମିଳିତ ସର୍ଚ୍ଚ ଅପରେସନ ଚାଲିଛି ।
ସୂଚନାଯୋଗ୍ୟ, ଶୁକ୍ରବାର ଜମ୍ମୁ-କଶ୍ମୀରର ଶୋପିଆନରେ ଆତଙ୍କବାଦୀ ଓ ସୁରକ୍ଷାକର୍ମୀ ମୁହାଁମୁହିଁ ହୋଇଥିଲେ। ସୁରକ୍ଷାକର୍ମୀଙ୍କ ସହ ହୋଇଥିବା ଗୁଳି ବିନିମୟରେ ୨ ଜଣ ଆତଙ୍କବାଦୀ ନିହତ ହୋଇଥିଲେ। ଶୋପିଆନର ଡାଇରୋ ଠାରେ କିଛି ଆତଙ୍କବାଦୀ ଲୁଚି ରହିଥିବା ସୂଚନା ମିଳିବା ପରେ ଗୁରୁବାର ରାତିରୁ ସିଆରପିଏଫ, ୪୪ ରାଷ୍ଟ୍ରୀୟ ରାଇଫଲ ଓ ଏସଓଜି ଯବାନଙ୍କ ପକ୍ଷରୁ ପୂରା ଅଞ୍ଚଳକୁ କର୍ଡନ କରି ସର୍ଚ୍ଚ ଅପରେସନ ହୋଇଥିଲା।
