ମାଲକାନଗିରି: ରାଜ୍ୟ ଗଞ୍ଜେଇର ବାହାରେ ଡିମାଣ୍ଡ ରହିଥିବା ବେଳେ ଏହି ଗଞ୍ଜେଇ ଚାଲାଣ ରୋକିବାକୁ ପୁଲିସ ଯେତିକି ପଦକ୍ଷେପ ନେଉଛି, ଚାଲାଣକାରୀ ଚାଲାଣର ଅଭିନବ ଉପାୟ ସବୁ ବାହାର କରୁଛନ୍ତି । ତେବେ ଏହି ଚାଲାଣ ପଛରେ କିଛି ଅସାଧୁ ପୁଲିସ କର୍ମଚାରୀ ମଧ୍ୟ ରହିଛନ୍ତି ବୋଲି ବିଭିନ୍ନ ସମୟରେ ଦାବି ହେଉଥିବା ବେଳେ ଏବେ ଜଣେ ପୁଲିସ କର୍ମଚାରୀ ଗଞ୍ଜେଇ ଚାଲାଣରେ ଗିରଫ ହୋଇଛନ୍ତି । ଗାଡିରେ ପଣସ ଓ କଖାରୁ ଯାଉଥିବା ବେଳେ ଏହାର ତଳେ ରହିଥିଲା ଗଞ୍ଜେଇ । ଏହି ଗଞ୍ଜେଇ ମାଲକାନଗିରିରୁ ଛତିଗଡ ଚାଲାଣ ହେଉଥିଲା । ଏହାକୁ ଚାଲାଣ କରୁଥିଲେ ପୁଲିସ କନେଷ୍ଟବଳ ।
ମାଲକାନଗିରି ଜିଲ୍ଲା ଅବକାରୀ ବିଭାଗ ଖବର ପାଇଥିଲା କି ଚିତ୍ରକୋଣ୍ଡା ଅଞ୍ଚଳରୁ ଏକ ଗାଡିରେ ଛତିଶଗଡକୁ ଗଞ୍ଜେଇ ଚାଲାଣ କରାଯାଉଛି । ଏହାପରେ ଅବକାରୀ ବିଭାଗର ୩ଟି ଟିମ ଗାଡିକୁ ବିଭିନ୍ନ ସ୍ଥାନରେ ଜଗି ବସିଥିଲେ । କୋରୁକୋଣ୍ଡା ନିକଟରେ ଗାଡିକୁ ଅବକାରୀ ବିଭାଗର ଟିକ ଅଟକାଇ ଯାଞ୍ଚ କରିଥିଲା । ଯାଞ୍ଚ ବେଳେ ଗାଡିରେ କଖାରୁ ଓ ପଣସ ତଳେ ୮ କୁଇଣ୍ଟାଲ ଗଞ୍ଜେଇ ମିଳିଥିଲା । ଏହାର ଆନୁମାନିକ ମୂଲ୍ୟ ୪୦ ଲକ୍ଷରୁ ଅଧିକ ହେବ । ମାଲକାନଗିରି ପୁଲିସର କନେଷ୍ଟବଳ ସଞ୍ଜିବ ହିରା ଏହାକୁ ଚାଲାଣ କରିବା ସହ ନିଜେ ଗାଡି ଚଳାଉଥିଲେ । ଅବକାରୀ ଅଧିକାରୀ ସଞ୍ଜିବଙ୍କୁ ଗିରଫ କରି କୋର୍ଟ ଚାଲାଣ କରିଛି।
