ବିହାର ନିର୍ବାଚନ ପାଇଁ ନୀତିଶଙ୍କ ଟାର୍ଗେଟ ନିର୍ଦ୍ଧାରଣ

(ପାଟନା): ଚଳିତ ବର୍ଷ ବିହାରରେ ବିଧାନସଭା ନିର୍ବାଚନ ହେବାକୁ ଯାଉଛି । ସେଥିପାଇଁ ଏବେ ଠାରୁ ରାଜନୀତି ସରଗରମ ହୋଇଛି । ରବିବାର ବିହାର ମୁଖ୍ୟମନ୍ତ୍ରୀ ନୀତିଶ କୁମାର ତାଙ୍କ ଜନ୍ମଦିନ ଅବସରରେ ପାଟନାର ଗାନ୍ଧୀ ମୈଦାନରୁ ଜନସଭାର ଶୁଭାରମ୍ଭ କରିଛନ୍ତି । ଏହି ଜନସଭାରେ ଉଦ୍ବୋଧନ ଦେବା ସମୟରେ ସେ ଆଗାମୀ ନିର୍ବାଚନରେ ତାଙ୍କ ନେତୃତ୍ୱାଧିନ ଜେଡିୟୁ ଦଳ ଓ ବିଜେପି ଜିତିବାକୁ ଥିବା ଆସନ ଗୁଡିକର ଟାର୍ଗେଟ୍ ନିର୍ଦ୍ଧାରଣ କରିଛନ୍ତି । ଏଥର ବିଧାନସଭା ନିର୍ବାଚନ ଜେଡିୟୁ, ବିଜେପି ସହ ମିଶି ଲଢିବ । ଆଉ ୨୦୦ ଆସନରେ ବିଜୟ ଲାଭ କରିବ ବୋଲି ସେ ଦାବି କରିଛନ୍ତି । ଏହାସହ ଚଳିତଥର ଏନଡିଏ (ନ୍ୟାସନାଲ ଡେମୋକ୍ରାଟିକ ଆଲାଏନ୍ସ) ମେଣ୍ଟ ବିହାରରେ ୨୦୦ ଆସନରେ ଜିତିବା ନିଶ୍ଚିତ କରନ୍ତୁ ବୋଲି କହିଛନ୍ତି । ସେ ଆହୁରି କହିଛନ୍ତି ଯେ, ଆରଜେଡି ଓ କଂଗ୍ରେସ ରାଜ୍ୟର ସଂଖ୍ୟାଲଘୁଙ୍କ ଭୋଟ୍ ହାତେଇଛନ୍ତି । କିନ୍ତୁ ଜେଡିୟୁ ସେମାନଙ୍କ ପାଇଁ କାମ କରିଛି । ତେଣୁ ଏବେ ବିହାରରେ ସଂଖ୍ୟାଲଘୁ ସୁରକ୍ଷିତ ଅଛନ୍ତି । ପୂର୍ବରୁ ଜେଡିୟୁ ଓ ବିଜେପି ଦିଲ୍ଲୀ ଓ ଝାଡଖଣ୍ଡ ବିଧାନସଭା ନିର୍ବାଚନରେ ଅଲଗା ଅଲଗା ଲଢିଥିଲେ । କିନ୍ତୁ ଉଭୟଙ୍କୁ ପରାଜୟ ବରଣ କରିବାକୁ ପଡିଥିଲା । କିନ୍ତୁ ଆଗାମୀ ନିର୍ବାଚନରେ ବିହାରରେ ସେଭଳି ହେବ ନାହିଁ । ବିଜେପି ସହ ମିଳିତ ଭାବେ ଲଢି ପୁଣିଥରେ ବିହାରରେ ତାଙ୍କ ସରକାର ଶାସନ କରିବ ବୋଲି ନୀତିଶ ଦୃଢୋକ୍ତି ପ୍ରକାଶ କରିଛନ୍ତି । ସୂଚନାଯୋଗ୍ୟ, ବିହାରରେ ମୋଟ ୨୪୩ ବିଧାନସଭା ଆସନ ରହିଛି । ଏଥି ମଧ୍ୟରୁ ଜେଡିୟୁ ଓ ବିଜେପିର ଯଥାକ୍ରମେ ୭୦ ଏବଂ ୫୪ ଜଣ ସଦସ୍ୟ ରହିଛନ୍ତି ।