ନୂଆଦିଲ୍ଲୀ: ଦେଶରେ ପ୍ରତ୍ୟହ କରୋନା ସଂକ୍ରମଣ ସଂଖ୍ୟା ବୃଦ୍ଧି ପାଉଥିବା ବେଳେ କିନ୍ତୁ ଏପର୍ଯ୍ୟନ୍ତ ଦେଶର ଏମିତି ରାଜ୍ୟ ଓ କେନ୍ଦ୍ର ଶାସିତ ଅଞ୍ଚଳ ରହିଛି ଯେଉଁଠାରେ କରୋନା ପ୍ରବେଶ କରି ପାରି ନାହିଁ । ସେହି ରାଜ୍ୟ ହେଉଛି ସିକିମ ଓ ଲକ୍ଷାଦ୍ୱୀପ । ବର୍ତ୍ତମାନ ସୁଦ୍ଧା ସିକିମ୍ ଏବଂ ଲାକ୍ଷାଦ୍ୱୀପରେ କୌଣସି କରୋନା ସଂକ୍ରମିତ ଚିହ୍ନଟ ହୋଇ ନାହାଁନ୍ତି। କାରଣ ସମୟ ଥାଇ ରାଜ୍ୟ ସରକାର ସମସ୍ତ ପ୍ରତିଷେଧକ ପଦକ୍ଷେପ ଗ୍ରହଣ କରି ନେଇଥିଲା ।
କରୋନା ସଂକ୍ରମଣକୁ ଦୃଷ୍ଟିରେ ରଖି ସିକିମ୍ ରାଜ୍ୟ ସରକାର ପର୍ୟ୍ୟଟନ ଶିଳ୍ପକୁ ଅକ୍ଟୋବର ପର୍ୟ୍ୟନ୍ତ ବନ୍ଦ ରଖିବାକୁ ଯୋଜନା କରିଛନ୍ତି। ରାଜ୍ୟରେ ମାର୍ଚ୍ଚ ୫ରୁ ବିଦେଶୀ ପର୍ୟ୍ୟଟକଙ୍କ ପ୍ରବେଶ ଉପରେ ପ୍ରତିବନ୍ଧକ ଲଗାଯାଇଛି । ସେହିପରି ମାର୍ଚ୍ଚ ୧୭ଠାରୁ ଘରୋଇ ପର୍ୟ୍ୟଟକଙ୍କ ଉପରେ କଟକଣା ଲଗାଯାଇଥିଲା। ଯେଉଁଥି ପାଇଁ ସିକିମ୍ର ପଡ଼ୋଶୀ ରାଜ୍ୟ ଆସାମ, ତ୍ରିପୁରା ଏବଂ ମେଘାଳୟରେ କରୋନା ସଂକ୍ରମଣ ହୋଇଥିବା ବେଳେ ସିକିମ ଏଥିରୁ ବାଦ ପଡିଛି । ସେହିପରି କେରଳ ନିକଟରେ ଥିବା କେନ୍ଦ୍ରଶାସିତ ଅଞ୍ଚଳ ଲାକ୍ଷାଦ୍ୱୀପରେ ମଧ୍ୟ ଏପର୍ୟ୍ୟନ୍ତ କୌଣସି କରୋନା ପଜିଟିଭ୍ଙ୍କୁ ଚିହ୍ନଟ କରାଯାଇନାହିଁ। ବହୁ କ୍ଷେତ୍ରରେ ଲାକ୍ଷାଦ୍ୱୀପ କେରଳ ଉପରେ ହିଁ ନିର୍ଭର କରିଥାଏ। ତେବେ ଏଠାରେ କରୋନା ପଜିଟିଭ୍ଙ୍କ ସଂଖ୍ୟା ଶୂନ ରହିଛି।
