ଟ୍ୱିନ ସିଟିର ଦୁଇ ନୂଆ ଡିସିପିଙ୍କ ଦାୟିତ୍ୱ ଗ୍ରହଣ

ଭୁବନେଶ୍ୱର: ଆଜି ଟ୍ୱିନ ସିଟି କଟକ ଓ ଭୁବନେଶ୍ୱରର ନୂଆ ଡିସିପି ଭୁବନେଶ୍ୱର ପୋଲିସ ସେବା ଭବନଠାରେ ସେମାନଙ୍କ ଦାୟିତ୍ୱ ଗ୍ରହଣ କରିଛନ୍ତି । ଭୁବନେଶ୍ୱରର ନୂଆ ଡିସିପି ଭାବେ ଆଇପିଏସ ଡ ଉମାଶଙ୍କର ଦାସ ଦାୟିତ୍ୱ ନେଇଥିବା ବେଳେ କଟକ ଡିସିପି ଭାବେ ଆଇପିଏସ ପ୍ରତିକ ସିଂ ଦାୟିତ୍ୱ ନେଇଛନ୍ତି । ଡ ଉମାଶଙ୍କରଙ୍କୁ ଭୁବନେଶ୍ୱରର ଅତିରିକ୍ତ ପୁଲିସ କମିଶନର ଅନୁପ ସାହୁ ଦାୟିତ୍ୱ ହସ୍ତାନ୍ତର କରିଥିବା ବେଳେ କଟକର ପୂର୍ବତନ ଡିସିପି ଅଖିଳେଶ ସିଂହଙ୍କଠାରୁ ଦାୟିତ୍ୱ ଗ୍ରହଣ କରିଛନ୍ତି ପ୍ରତିକ ସିଂ । ଏହି ଦାୟିତ୍ୱ ଗ୍ରହଣ ପାଇଁ ଆଜି ମଧ୍ୟାହ୍ନ ୧୨ଟାରେ ଲୋକସଭା ଭବନଠାରେ ଏକ କାର୍ଯ୍ୟକ୍ରମର ଆୟୋଜନ କରାଯାଇଛି । ଏହି ଅବସରରେ ପୁଲିସ କମିଶନର ସୁଧାଂଶୁ ଷଡଙ୍ଗୀ, ଅନ୍ୟ ବରିଷ୍ଠ ପୁଲିସ ଅଧିକାରୀ ଉପସ୍ଥିତ ରହିଥିଲେ । ସମସ୍ତ କାର୍ଯ୍ୟକ୍ରମକୁ ସାମାଜିକ ଦୂରତା ରକ୍ଷା କରି ପାଳନ କରାଯାଇଥିବା ଦେଖିବାକୁ ମିଳିଛି ।
ଭୁବନେଶ୍ଵର ଡିସିପି ଡା. ଉମାଶଙ୍କର ଦାସ ପୂର୍ବରୁ ପୁରୀ ଏସ୍‌ପି ଭାବେ କାର୍ୟ୍ୟ କରୁଥିଲେ। କୋଭିଡ୍‌-୧୯ ସମୟରେ ପୁରୀରେ କଟକଣା ଭିତରେ ରଥଯାତ୍ରା କରାଇବାରେ ଡ. ଦାସଙ୍କ ଗୁରୁତ୍ବପୂର୍ଣ୍ଣ ଭୂମିକା ରହିଥିଲା। ସେହିପରି ପ୍ରତିକ ସିଂହ କନ୍ଧମାଳ ଏସ୍‌ପି ଭାବେ କାର୍ୟ୍ୟ କରୁଥିଲେ।