ହାତୀ ଆକ୍ରମଣରେ ଯୁବକ ମୃତ

(ମହାଭାରତ, ସୁନ୍ଦରଗଡ): ସୁନ୍ଦରଗଡ ଜିଲ୍ଲା ଅଟୋମୁଣ୍ଡା ଗାଁରେ ଏକ ବଣୁଆ ହାତୀ ଆକ୍ରମଣରେ ଜଣେ ବ୍ୟକ୍ତି ପ୍ରାଣ ହରାଇଛନ୍ତି । ମୃତକ ଜଣକ ସେହି ଗାଁର ନରବାତ କୁଲୁ ବୋଲି ଜଣାପଡିଛି । ମିଳିଥିବା ସୂଚନା ଅନୁଯାୟୀ, ଗତ ରବିବାର ବିଳମ୍ବିତ ରାତିରେ ହାତୀଟି ଗାଁରେ ପଶି ଲୋକଙ୍କ ଘର ଭାଙ୍ଗିବା ସହ ବ୍ୟାପକ କ୍ଷୟକ୍ଷତି କରିଥିଲା । ଏଥିରେ ଭୟଭୀତ ହୋଇ ଗାଁଲୋକେ ଏକ ଆଶ୍ରୟସ୍ଥଳୀର ସାହାରା ନେଇଥିଲେ । ଖବର ପାଇ ବନବିଭାଗ କର୍ମଚାରୀମାନେ ଗାଁରେ ପହଞ୍ଚି ହାତୀଟିକୁ ଘଉଡାଇବା ପାଇଁ ଉଦ୍ୟମ ଆରମ୍ଭ କରିଥିଲେ । ଏହି ସମୟରେ ଗାଁର ଯୁବକ କୁଲୁ ସେମାନଙ୍କୁ ସାହାଯ୍ୟ କରିବାକୁ ଯାଇ ହାତୀ ହାବୁଡରେ ପଡିଥିଲେ । ଫଳରେ ଉତ୍ତ୍ୟକ୍ତ ହାତୀଟି ତାଙ୍କୁ ଶୁଣ୍ଡରେ ଟେକି ତଳେ କଚାଡି ମାରି ଦେଇଥିଲା । ପରେ ଜଙ୍ଗଲ ଭିତରକୁ ଦୌଡି ପଳାଇଥିଲା ।