ନୟାଗଡ଼ ଛେନାପୋଡ଼କୁ ମିଳିବ GI ଟ୍ୟାଗ୍ ମାନ୍ୟତା । ଏନେଇ ସୂଚନା ଦେଲେ କେନ୍ଦ୍ର ବାଣିଜ୍ୟ ଓ ଶିଳ୍ପ ମନ୍ତ୍ରୀ ପୀୟୂଷ ଗୋୟଲ । ବିଶ୍ୱ ପ୍ରସିଦ୍ଧ ନୟାଗଡ଼ ଛେନାପୋଡ଼କୁ ମିଳିବ GI ଟ୍ୟାଗ୍ ମାନ୍ୟତା । ଦୀର୍ଘ ଦିନର ଅପେକ୍ଷା ପରେ ବିଶ୍ୱ ପ୍ରସିଦ୍ଧ ନୟାଗଡ଼ ଛେନାପୋଡ଼କୁ ଭୌଗୋଳିକ ସୂଚକାଙ୍କ ବା ଜିଆଇ ଟ୍ୟାଗ (Geographical Indication Tag) ମିଳିବା ପାଇଁ ବାଟ ପରିଷ୍କାର ହୋଇଛି। ଆସନ୍ତା ମେ ୨୮ ଓ ୨୯ ତାରିଖ ବୈଠକରେ ହୋଇପାରେ ବିଧିବଦ୍ଧ ଘୋଷଣା । GI ଟ୍ୟାଗ୍ ନେଇ ଉପଯୁକ୍ତ ପଦକ୍ଷେପ ନେବେ ବୋଲି ଜଣାଇଛନ୍ତି କେନ୍ଦ୍ର ମନ୍ତ୍ରୀ । ବୈଠକ ପରେ ‘Geographical Indications of Goods (Registration and Protection) Act, 1999’ ଅନୁଯାୟୀ GI ଟ୍ୟାଗ୍ ପ୍ରଦାନ ପ୍ରକ୍ରିୟାକୁ ତ୍ୱରାନ୍ୱିତ କରାଯିବ ବୋଲି ପୀୟୂଷ ଗୋୟଲ ପ୍ରତିଶ୍ରୁତି ଦେଇଛନ୍ତି ।
ଏ ସଂପର୍କରେ ମନ୍ତ୍ରୀ ପୀୟୂଷ ଗୋୟଲଙ୍କୁ ଚିଠି ଲେଖିଥିଲେ ସାଂସଦ ସମ୍ବିତ ପାତ୍ର । GI ଟ୍ୟାଗ୍ ନେଇ ଆବଶ୍ୟକୀୟ ପଦକ୍ଷେପ ନେବେ ବୋଲି କେନ୍ଦ୍ର ମନ୍ତ୍ରୀ ଜଣାଇଛନ୍ତି । ଛେନାପୋଡ ଦିବସରେ ସାଂସଦ ସମ୍ୱିତ ପାତ୍ରଙ୍କୁ ଏକ ଚିଠି ଲେଖି ଏହା ଜଣାଇଛନ୍ତି କେନ୍ଦ୍ର ମନ୍ତ୍ରୀ । ନୟାଗଡ଼ର ଛେନାପୋଡ଼ ଏହାର ସ୍ୱତନ୍ତ୍ର ପ୍ରସ୍ତୁତି ଶୈଳୀ ଓ ସ୍ୱାଦ ପାଇଁ ପରିଚିତ। ଜିଆଇ ଟ୍ୟାଗ୍ ମିଳିବା ଦ୍ୱାରା ଏହା ନୟାଗଡ଼ର ଏକ ସ୍ୱତନ୍ତ୍ର ପରିଚୟ ଭାବେ ବିଶ୍ୱସ୍ତରରେ ମାନ୍ୟତା ପାଇବ। ନକଲି ବ୍ରାଣ୍ଡିଂ ଉପରେ ରୋକ ଲାଗିବ। ସ୍ଥାନୀୟ କାରିଗର ଓ ବ୍ୟବସାୟୀମାନେ ଆର୍ଥିକ ସମୃଦ୍ଧି ପାଇବା ସହ ରପ୍ତାନି ସୁବିଧା ବଢ଼ିବ।
