ଚମକିଲେ ଆଉ ଜଣେ ଦ୍ରୁତ ବୋଲର । ଏଥର ଭାରତୀୟ ଦଳରେ ନିଜର ଚମକ ପଦର୍ଶନ କରିବାକୁ ହେଉଛନ୍ତି ପ୍ରସ୍ତୁତ ତେବେ ଜାମ୍ମୁ କାଶ୍ମୀରର ସୁନ୍ଦର ପାହାଡ଼ିଆ ଅଞ୍ଚଳରୁ ବାହାରି ଏବେ ଜଣେ ଯୁବ ଦ୍ରୁତ ବୋଲର ଭାରତୀୟ କ୍ରିକେଟରେ ନିଜର ଚମକ ଦେଖାଇବାକୁ ପ୍ରସ୍ତୁତ ହୋଇଛନ୍ତି । ତାଙ୍କ ନାଁ ହେଉଛି ଆକିବ ନବୀ । ଗତ ଦୁଇଟି ରଣଜୀ ସିଜିନରେ ନିଜର ଶାଣିତ ବୋଲିଂରେ ବ୍ୟାଟରମାନଙ୍କୁ ନାକେଦମ୍ କରିବା ପରେ ଶେଷରେ ତାଙ୍କୁ ଜାତୀୟ ଚୟନକର୍ତ୍ତାଙ୍କ ପକ୍ଷରୁ ଡାକରା ମିଳିଛି । ଆଶ୍ଚର୍ଯ୍ୟର କଥା ହେଉଛି, ଶ୍ରୀଲଙ୍କା ବିପକ୍ଷ ଟେଷ୍ଟ ସିରିଜରେ ସେ ଦୁନିଆର ଅନ୍ୟତମ ଶ୍ରେଷ୍ଠ ବୋଲର ଜସପ୍ରୀତ ବୁମରାଙ୍କ ସ୍ଥାନ ନେବାକୁ ଯାଉଛନ୍ତି ।ଆକିବ ନବୀ ଜାମ୍ମୁ-କାଶ୍ମୀରର ବାରାମୁଲ୍ଲାର ବାସିନ୍ଦା ।
ଦେଶର ପ୍ରାୟ ପ୍ରତ୍ୟେକ କ୍ରିକେଟରଙ୍କ ଭଳି ତାଙ୍କ କାହାଣୀ ମଧ୍ୟ ଅନେକ ସଂଘର୍ଷରେ ପରିପୂର୍ଣ୍ଣ । ତାଙ୍କ ପିତା ଗୁଲାମ ନବୀ ଡାର୍ ପେଶାରେ ଜଣେ ଶିକ୍ଷକ ଏବଂ ସେ ଚାହୁଥିଲେ ଯେ ତାଙ୍କ ପୁଅ ଜଣେ ଡାକ୍ତର ହେଉ । କିନ୍ତୁ ଆକିବଙ୍କ ରକ୍ତରେ କ୍ରିକେଟର ନିଶା ଥିଲା । କୁହାଯାଏ ଯେ, ପାଠ ପଢ଼ିବା ପାଇଁ ତାଙ୍କୁ କୋଠରୀରେ ବନ୍ଦ କରିଦେଲେ ସେ ଝରକା ଦେଇ ବାହାରକୁ ଡେଇଁ ଖେଳିବାକୁ ପଳାଉଥିଲେ । ଆରମ୍ଭ ଦିନରେ ଭଲ ‘ସ୍ପାଇକ୍’ ଜୋତା ଏବଂ କ୍ରିକେଟ୍ ସାମଗ୍ରୀ କିଣିବାକୁ ତାଙ୍କ ପାଖରେ ଟଙ୍କା ନଥିଲା, ଯେଉଁଥିପାଇଁ ତାଙ୍କୁ ସାଙ୍ଗମାନଙ୍କଠାରୁ ଜୋତା ଉଧାର ନେବାକୁ ପଡ଼ୁଥିଲା । ଶେଷରେ ପୁଅର ଜିଦ୍ ଆଗରେ ପିତା ହାର୍ ମାନିଲେ ଏବଂ ତାଙ୍କୁ ସମର୍ଥନ କଲେ । ନିଜର କଠିନ ପରିଶ୍ରମ ବଳରେ ସେ ଘରୋଇ କ୍ରିକେଟରେ ନିଜର ଏକ ସ୍ୱତନ୍ତ୍ର ପରିଚୟ ସୃଷ୍ଟି କରିପାରିଛନ୍ତି । ୨୦୨୦ ମସିହାରେ ସେ ନିଜର ପ୍ରଥମ ଶ୍ରେଣୀ କ୍ରିକେଟ୍ କ୍ୟାରିୟର ଆରମ୍ଭ କରିଥିଲେ।
ଭାରତୀୟ ଦଳରେ ବୁମରାଙ୍କ ସ୍ଥାନ ପୂରଣ କରିବା ଏକ ବଡ଼ ଦାୟିତ୍ୱ। କିନ୍ତୁ ଆକିବଙ୍କ ପାଖରେ ଥିବା ଅସୀମ ଗତି ଏବଂ ସଠିକ ଲାଇନ୍-ଲେନ୍ଥ ତାଙ୍କୁ ଜଣେ ପ୍ରତିଭାଶାଳୀ ଖେଳାଳି ଭାବେ ଉଭା କରିଛି। କାଶ୍ମୀରର ଏହି ‘ସୁପରଷ୍ଟାର’ ଏବେ ଅନ୍ତର୍ଜାତୀୟ ସ୍ତରରେ ନିଜର ଜଲୱା ଦେଖାଇବାକୁ ସମ୍ପୂର୍ଣ୍ଣ ପ୍ରସ୍ତୁତ ।
