ନୂଆଦିଲ୍ଲୀ: ଆଜିକାଲି ଅଜଣା ନମ୍ବରରୁ କଲ କରି କିଛି ଅସାମାଜିକ ଲୋକ ସମସ୍ତଙ୍କୁ ହଇରାଣ କରନ୍ତି । ଫଳରେ ଅନେକ ଲୋକ ଅଜଣା ନମ୍ବରରୁ କଲ ଆସିଲେ ରିସିଭ କରିବା ପାଇଁ କୁଣ୍ଠାବୋଧ କରିଥାନ୍ତି । ଯାହାଦ୍ୱାରା କିଛି ଦରକାରୀ ଏବଂ ଗୁରୁତ୍ୱପୂର୍ଣ୍ଣ କଲ ମଧ୍ୟ ମିସ କରିଥାନ୍ତି । ତେବେ ଏସବୁ ସମସ୍ୟାକୁ ଦୂର କରିବା ପାଇଁ ଟ୍ରୁ କଲର ଭଳି ମୋବାଇଲ ଆପ୍ସ ସହାୟକ ହୋଇଛି । କିନ୍ତୁ ଏହା ଏକ ବିଦେଶୀ ଆପ ହୋଇଥିବାରୁ ଏହା ଦ୍ୱାରା ବ୍ୟକ୍ତିଗତ ତଥ୍ୟ ଚୋରି ହେବାର ଭୟ ରହିଛି । ତେଣୁ ଭାରତ ଏହାର ଏକ ବିକଳ୍ପ ଆପ ନିର୍ମାଣ କରିସାରିଛି । ଗତ ଅଗଷ୍ଟ ୧୫ ସ୍ୱଧୀନତା ଦିବସ ଅବସରରେ ଏହି ଆପକୁ ଲଞ୍ଚ କରାଯାଇଛି । ‘ଭାରତ କଲର’ ଟ୍ରୁକଲର ଆପ ଅପେକ୍ଷା ଅନେକ ମାମଲାରେ ଆଗରେ ରହିଥିବା କହିଛନ୍ତି ଏହାର ନିର୍ମାତା ।
ଭାରତ କଲର ଆପ ଭଳି ଏକ କଲର ଆଇଡି ଆପକୁ ନିର୍ମାଣ କରିଛନ୍ତି କିଛି ଇଞ୍ଜିନିୟର । ଏହି ଆପ ଟ୍ରୁକଲର ଆପର ଏକ ବିକଳ୍ପ ଭାବେ କାମ କରିପାରିବ ବୋଲି କହିଛନ୍ତି ଆପର ମୁଖ୍ୟ ପ୍ରସ୍ତୁତକାରୀ ତଥା ଆଇଆଇଏମ ବେଙ୍ଗଲୁରୁର ପୂର୍ବତନ ଛାତ୍ର ପ୍ରଜ୍ଜ୍ୱଳ ସିହ୍ନା । ଏହା ସମ୍ପୂର୍ଣ୍ଣ ଭାବେ ସୁରକ୍ଷିତ ବୋଲି ମଧ୍ୟ ସେ ଦାବି କରିଛନ୍ତି । କିଛି ଦିନ ପୂର୍ବରୁ ସେନା ଦେଶରେ ଟ୍ରୁକଲର ଆପକୁ ବ୍ୟାନ କରିଥିଲା । ତେଣୁ ସେମାନେ ସ୍ୱଦେଶୀ ଆପ ବାହାର କରିବାକୁ ଯୋଜନା କରିଥିଲେ । ଯାହା ସଫଳ ହୋଇଛି । ୨୦୨୦ ଡିସେମ୍ବରରୁ ଆପ ଉପରେ କାମ ଆରମ୍ଭ ହୋଇଥିଲା । ଟ୍ରାଏଲ୍ସରେ ସଫଳ ହେବା ପରେ ଏହାର ପ୍ରଥମ ଭର୍ଜନ ଲଞ୍ଚ କରାଯାଇଛି ।ଏଥିରେ ୟୁଜର କଣ୍ଟାକ୍ଟସ୍, କଲ୍ ଲଗସ୍ ସର୍ଭରରେ ସେଭ୍ ହେବ ନାହିଁ । ଫଳରେ ଗୋପନୀୟିତା ଉପରେ କୌଣସି ପ୍ରଭାବ ପଡିବ ନାହିଁ । ଏହାକୁ ବିଭିନ୍ନ ଭାରତୀୟ ଭାଷାରେ ଲଞ୍ଚ୍ କରାଯାଇଛି । ୟୁଜରମାନଙ୍କୁ ଇଂରାଜୀ, ଗୁଜରାଟୀ, ବାଂଲା, ମରାଠି ଆଦି ଭାଷାର ବିକଳ୍ପ ମିଳିବ । ଆଣ୍ଡ୍ରୋଏଡ୍ ଓ ଆଇଓଏସ ୟୁଜର ଆପ୍ ଷ୍ଟୋରରୁ ଡାଉନଲୋଡ୍ କରି ଭାରତ କଲରରୁ ବ୍ୟବହାର କରିପାରିବେ ବୋଲି ନିର୍ମାତା କହିଛନ୍ତି।
