ବହଳଦା ସ୍ୱାସ୍ଥ୍ୟକେନ୍ଦ୍ରରେ ରକ୍ତଦାନ ଶିବିର ଅନୁଷ୍ଠିତ

(ରାଇରଙ୍ଗପୁର): ମୟୁରଭଞ୍ଜ ଜିଲ୍ଲା ବହଳଦା ଗୋଷ୍ଠି ସ୍ୱାସ୍ଥ୍ୟକେନ୍ଦ୍ରରେ ଶ୍ରୀଶ୍ରୀ ପୁରୁଷୋତ୍ତମ ସତ୍ସଙ୍ଗ କେନ୍ଦ୍ର ପକ୍ଷରୁ ରକ୍ତଦାନ ଶିବିର ଅନୁଷ୍ଠିତ ହୋଇଯାଇଛି । ଏହି ରକ୍ତଦାନ ଶିବିର ବହଳଦା ଗୋଷ୍ଠି ସ୍ୱାସ୍ଥ୍ୟକେନ୍ଦ୍ର ଭାରପ୍ରାପ୍ତ ଅଧିକାରିଣୀ ଡ଼ା. ରୀତା ଟୁଡୁ ଉଦଘାଟନ କରିଥିଲେ । ସ୍ୱେଚ୍ଛାସେବୀ ସଂଗଠନ ‘ସ୍ୱାଧୀନ’ ଏଥିରେ ସହଯୋଗ କରିଥିଲା । ସ୍ୱେଚ୍ଛାସେବୀ ଓ ସତସଙ୍ଗ କେନ୍ଦ୍ର କର୍ମୀମାନେ ଏହି ଶିବିରର ପରିଚାଳନା କରିଥିଲେ । ରାଇରଙ୍ଗପୁର ଉପଖଣ୍ଡ ଚିକିତ୍ସାଳୟ ରକ୍ତଭଣ୍ଡାରର ଭାରପ୍ରାପ୍ତ ଅଧିକାରୀ ଡ଼ା. ସଞ୍ଜୀବ ମିଶ୍ରଙ୍କ ତତ୍ତ୍ୱାବଧାନରେ ଡ଼ା. ମୋନାଲିସା ସାହୁ, ଲାବୋରିଟାରୀ ଟେକ୍ନିସିୟାନ ସର୍ବଶ୍ରୀ ଦେବବ୍ରତ ଗିରି ଓ ଉପସ୍ଥିତ ନର୍ସ ଓ ଅନ୍ୟ କର୍ମଚାରୀମାନେ ରକ୍ତ ସଂଗ୍ରହ କରିଥିଲେ । ସମୁଦାୟ ୬୧ ୟୁନିଟ ରକ୍ତ ଏହି ଶିବିରରୁ ସଂଗ୍ରହ କରାଯାଇଥିଲା । ରକ୍ତଦାତାଙ୍କ ମଧ୍ୟରେ ବହଳଦା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରର ଡ଼ା. ଭଗତ ଟୁଡୁ ଓ ବହଳଦା ବ୍ଲକ ବି.ପି.ଓ ତପନ କୁମାର ମହାନ୍ତ ଆଦି ସାମିଲ ଥିଲେ । ସେମାନେ ରକ୍ତଦାନ କରିବା ସହ ଅନ୍ୟମାନଙ୍କୁ ରକ୍ତଦାନ ପାଇଁ ଉତ୍ସାହିତ କରିଥିଲେ ।