ଗୌହାଟି: ଆସାମର ଦୁଇ କଂଗ୍ରେସ ବିଧାୟକ ଇସ୍ତଫା ଦେବା ପରେ ରାଜ୍ୟରେ କଂଗ୍ରେସ ବିରୋଧୀ ଦଳର ମାନ୍ୟତା ହରାଇଛି । ଆସାମ ବିଧାନସଭାର ସଚିବ ଏହି ସୂଚନା ଦେଇଛନ୍ତି। ଦୁଇ ବିଧାୟକ ଇସ୍ତଫା ପରେ କଂଗ୍ରେସର ବିଧାୟକ ସଂଖ୍ୟା ୨୦ରେ ପହଞ୍ଚିଛି । ବର୍ଷର ପ୍ରଥମ ଦିନରେ କଂଗ୍ରେସ ବିରୋଧୀଦଳ ନେତା ଦେବବ୍ରତ ସୌକିଆ ବିରୋଧୀ ଦଳର ନେତା ପଦ ହରାଇଥିବା ବିଧାନସଭା ପକ୍ଷରୁ ସୂଚନା ଦିଆଯାଇଛି ।
ଆସାମର ୧୨୬ ବିଧାନସଭା ଆସନରୁ କଂଗ୍ରେସ ୨୬ଟି ଆସନ ଜିତିଥିଲା। କିନ୍ତୁ ଦୁଇ ବିଧାୟକ ପ୍ରଣବ କୁମାର ଗୋଗୋଇ ଏବଂ ତରୁଣ ଗୋଗୋଇଙ୍କର ଦେହାନ୍ତ ପରେ ହୋଇଥିବା ଉପ-ନିର୍ବାଚନରେ ଦଳ ପରାଜୟ ବରଣ କରିଥିଲା । ଫଳରେ ଦଳର ବିଧାୟକ ସଂଖ୍ୟା ୨୪କୁ ଖସିଯାଇଥିଲା । ଏହା ପରେ ପୂର୍ବରୁ ଦୁଇ ଜଣ ଓ ନିକଟ ଅତିତରେ ଦୁଇ ଜଣ ବିଧାୟକ ପଦରୁ ଇସ୍ତଫା ଦେବା ପରେ ଏବେ ଏହା ୨୦କୁ ଖସି ଆସିଛି । ବିରୋଧି ଦଳ ନେତା ହେବାକୁ କଂଗ୍ରେସକୁ ରାଜ୍ୟରେ ସର୍ବନିମ୍ନ ୨୧ ଆସନ ଆବଶ୍ୟକ ହେଉଥିବା ବେଳେ ଏବେ ୨୦ ବିଧାୟକ ଥିବାରୁ ଦଳ ବିରୋଧୀ ମାନ୍ୟତା ହରାଇଥିବା କୁହାଯାଇଛି ।
