(ମେକ୍ସିକୋ) : ରବିବାର ଦିନ ଲଘୁଚାପଜନିତ ଭୟଙ୍କର ବାତ୍ୟା ‘ହିଲାରି’ ଉତ୍ତରପଶ୍ଚିମ ମେକ୍ସିକୋରେ ସ୍ଥଳଭାଗକୁ ପ୍ରବେଶ କରିବା ଆମେରିକାର କାଲିଫର୍ଣ୍ଣିଆ ଆଡ଼କୁ ଅଗ୍ରସର ହେଉଥିବା କଥା ଜଣାପଡିଛି । ଲ୍ୟାଣ୍ଡ୍ଫଲ୍ କରିଥିବା ପରେ ଭୟଙ୍କର ବାତ୍ୟା ଯୋଗୁଁ ଆକସ୍ମିକ ବନ୍ୟା, ଚକ୍ରବାତ ଓ ଭୀଷଣ ବତାସ ପ୍ରବାହିତ ହୋଇ ବିଜୁଳି ସରବରାହରେ ବାଧା ପ୍ରାପ୍ତ ହୋଇଛି । ଫଳରେ ଜନଜୀବନ ଅସ୍ତବ୍ୟସ୍ତ ହୋଇପଡିଛି ।
ସୂଚନାନୁଯାୟୀ ,‘ୟୁଏସ୍ ନ୍ୟାସ୍ନାଲ୍ ହରିକେନ୍ ସେଣ୍ଟର୍’ କହିଛି: ଘଣ୍ଟାପ୍ରତି ୧୦୦ କିଲୋମିଟର୍ ବତାସ ସହିତ ‘ହିଲାରି’ ମେକ୍ସିକୋର ଉତ୍ତର ପ୍ରନ୍ତରେ ଥିବା ବାଜା କାଲିଫର୍ଣ୍ଣିଆ ଉପଦ୍ବୀପରେ ଲ୍ୟାଣ୍ଡ୍ଫଲ୍ କରିଛି। ପ୍ରତିବର୍ଷ ମେକ୍ସିକୋର ପ୍ରଶାନ୍ତ ମହାସାଗର ଓ ଆଟ୍ଲାଣ୍ଟିକ୍ ମହାସାଗର ଉପକୂଳବର୍ତ୍ତୀ ଅଞ୍ଚଳରେ ବାତ୍ୟା ହୁଏ। କିନ୍ତୁ, ଆମେରିକାର କାଲିଫର୍ଣ୍ଣିଆକୁ ବାତ୍ୟା କ୍ବଚିତ୍ ପ୍ରଭାବିତ କରେ। ତାହା ପୁଣି ଏତେ ତୀବ୍ର ହୋଇ ନ ଥାଏ। ଦୀର୍ଘ ୮୪ ବର୍ଷ ପରେ ପ୍ରଥମ କରି ଆମେରିକାର କାଲିଫର୍ଣ୍ଣିଆ ଆଡ଼କୁ ଏଧରଣ ବାତ୍ୟା ଅଗ୍ରସର ହେଉଛି।
