କାମାକ୍ଷାନଗର: ବାରମ୍ବାର ରାଜ୍ୟର ବିଭିନ୍ନ ଅଞ୍ଚଳରେ ଲୁଟ ତରାଜ ଭଳି ଘଟଣା ବଢିବାରେ ଲାଗିଛି । ଗତକାଲି ବିଳମ୍ବିତ ରାତିରେ ମଧ୍ୟ ପ୍ରାୟ ୨୫ରୁ ଅଧିକ ଦୁର୍ବୃତ୍ତ କାମାକ୍ଷାନଗର ଥାନା ଅନ୍ତର୍ଗତ ରେକୁଳା ପମ୍ପ ହାଉସରେ ଲୁଟ କରିଥିବା ଘଟଣା ସାମନାକୁ ଆସିଛି । ଏଥିସହ କର୍ମଚାରୀମାନଙ୍କୁ ମାରପିଟ ମଧ୍ୟ କରିଛନ୍ତି । ଖବର ପାଇ ସ୍ଥାନୀୟ ପୋଲିସ ପହଞ୍ଚି ତଦନ୍ତ ଆରମ୍ଭ କରିଛି ।
ଗତକାଲି ରାତି ପ୍ରାୟ ୧ଟା ବେଳେ ୨୫ରୁ ଉଦ୍ଧ୍ୱର୍ ଦୁର୍ବୃତ୍ତ ରେକୁଳା ପମ୍ପ ହାଉସରେ ପଶିଥିଲେ । ତେବେ ଘଟଣାସ୍ଥଳରେ ଉପସ୍ଥିତ ପମ୍ପ ଡ୍ରାଇଭର ଶ୍ରୀଧର ବେହେରା ଏବଂ କର୍ମଚାରୀ ପ୍ରଦୀପ୍ତ ବେହେରାଙ୍କୁ ହାତ ଗୋଡ ବାନ୍ଧି ମାଡ ମାରିଥିଲେ ଦୁର୍ବୃତ୍ତ । ଏହାପରେ ସେମାନଙ୍କ ନିକଟରେ ଥିବା ମେବାଇଲ ଏବଂ ସେମାନଙ୍କ ବେକରେ ଥିବା ସୁନା ଚେନ ମଧ୍ୟ ଲୁଟି ନେଇଥିଲେ । ଏଥିସହ ପମ୍ପ ହାଉସ୍ କ୍ୟାମ୍ପସରେ ଥିବା ଲକ୍ଷାଧିକ ଟଙ୍କାର ପାଇପ ନେଇ ଏହି ଦୁର୍ବୃତ୍ତ ଫେରାର ହୋଇ ଯାଇଥିଲେ । ତେବେ ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି । ଏ ସମ୍ପର୍କରେ ବିଭାଗୀୟ ଅଧିକାରୀ କହିଛନ୍ତି, ହଠାତ୍ ଦୁର୍ବୃତ୍ତମାନେ ପହଞ୍ଚି ରାତି କର୍ମଚାରୀଙ୍କୁ ବାନ୍ଧି କରି ଲକ୍ଷାଧିକ ଟଙ୍କାର ପାଇପ୍ ନେଇଯାଇଛନ୍ତି। ଏନେଇ ଥାନା ଅଧିକାରୀଙ୍କୁ ଅବଗତ କରାଯାଇଛି।
କର୍ମଚାରୀଙ୍କୁ ମାରି ଲୁଟିନେଲେ ଲକ୍ଷାଧିକ ଟଙ୍କାର ପାଇପ
