(ପଞ୍ଜାବ) : ଇସ୍ତଫା ଦେଲେ ପଞ୍ଜାବ ରାଜ୍ୟପାଳ ତଥା ଚଣ୍ଡିଗଡ଼ ପ୍ରଶାସକ ବନୱାରୀଲାଲ ପୁରୋହିତ । ସେ ଆଜି ତାଙ୍କ ପଦରୁ ଇସ୍ତଫା ଦେଇଛନ୍ତି । ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କୁ ପଠାଯାଇଥିବା ତାଙ୍କ ଇସ୍ତଫା ପତ୍ରରେ ସେ ଏହି ପଦ ଛାଡିବା ପାଇଁ ବ୍ୟକ୍ତିଗତ କାରଣ ଦର୍ଶାଇଛନ୍ତି । ବନୱାରିଲାଲ ପୁରୋହିତ ଅଗଷ୍ଟ ୨୦୨୧ରେ ପଞ୍ଜାବର ରାଜ୍ୟପାଳ ଭାବରେ ଦାୟିତ୍ଵ ଗ୍ରହଣ କରିଥିଲେ।
ସୂଚନାନୁଯାୟୀ , ସେ ୨୦୧୭ରୁ ୨୦୨୧ପର୍ଯ୍ୟନ୍ତ ତାମିଲନାଡୁର ରାଜ୍ୟପାଳ ଥିଲେ। ଏହାପୂର୍ବରୁ ସେ ୨୦୧୬ ରୁ ୨୦୧୭ ପର୍ଯ୍ୟନ୍ତ ଆସାମର ରାଜ୍ୟପାଳ ଥିଲେ। ପୁରୋହିତ ଭାରତୀୟ ଜନତା ପାର୍ଟିର ଜଣେ ବରିଷ୍ଠ ନେତା । ସେ ନାଗପୁରରୁ ତିନିଥର ସାଂସଦ ହୋଇଛନ୍ତି। ପୁରୋହିତ 16 ଏପ୍ରିଲ ୧୯୪୦ରେ ରାଜସ୍ଥାନରେ ଜନ୍ମଗ୍ରହଣ କରିଥିଲେ । ଅକ୍ଟୋବରରେ ସେ ପଞ୍ଜାବ ବିଧାନସଭାର ଦୁଇ ଦିନିଆ ଅଧିବେଶନରେ ଉପସ୍ଥାପିତ ହେବାକୁ ଥିବା ତିନୋଟି ବିଲ୍ ଅନୁମୋଦନ କରିବାକୁ ମନା କରିଦେଇଥିଲେ। ଏହା ପରେ ମୁଖ୍ୟମନ୍ତ୍ରୀ ଭଗବନ୍ତ ମାନଙ୍କ ସମେତ ଆମ୍ ଆଦମୀ ପାର୍ଟି ତାଙ୍କୁ ବିରୋଧ କରିଥିଲେ।
