ସତ୍ୟବାଦୀ ବିଜେଡିର ପ୍ରତିଷ୍ଠା ଦିବସରେ ଯୋଗଦେଲେ ପର୍ୟ୍ୟବେକ୍ଷକ ରଣେନ୍ଦ୍ର ପ୍ରତାପ ସ୍ଵାଇଁ

ପୁରୀ : ସତ୍ୟବାଦୀରେ ଅନୁଷ୍ଠିତ ହୋଇଛି ବିଜେଡିର ପ୍ରତିଷ୍ଠା ଦିବସ।ସ୍ଥାନୀୟ ପଞ୍ଚସଖା ପଡ଼ିଆ ଠାରେ ଆୟୋଜିତ କାର୍ୟ୍ୟକ୍ରମରେ ମୁଖ୍ୟ ଅତିଥି ଭାବେ ଯୋଗ ଦେଇଥିଲେ ପୁରୀ ଜିଲ୍ଲା ବିଜେଡି ପର୍ୟ୍ୟବେକ୍ଷକ ତଥା ମନ୍ତ୍ରୀ ରଣେନ୍ଦ୍ର ପ୍ରତାପ ସ୍ୱାଇଁ । ସ୍ଥାନୀୟ ବିଧାୟକ ଉମାକାନ୍ତ ସାମନ୍ତରାୟ ନେତୃତ୍ୱରେ ଏକାଠି ହୋଇଥିଲେ ହଜାର ହଜାର କର୍ମୀ । ଏକ ମିଶ୍ରଣ ପର୍ବରେ ମାନ୍ୟବର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନୀତି ଆଦର୍ଶ ରେ ଅନୁପ୍ରାଣିତ ହୋଇ ବିଜେଡିରେ ସାମିଲ ହୋଇଥିଲେ ସରପଞ୍ଚ ଓ ସମାଜ ସେବୀ । ଯେଉଁଥିରେ କଣାସ ବ୍ଲକ ର ୩ଜଣ ରହିଥିବା ବେଳେ ସତ୍ୟବାଦୀରୁ ଜଣେ ସରପଞ୍ଚ ଥିଲେ । ସତ୍ୟବାଦୀ ନିର୍ବାଚନ ମଣ୍ଡଳୀ ରେ ସ୍ଥାନୀୟ ବିଧାୟକଙ୍କ ପ୍ରଚେଷ୍ଟାରେ ସରକାରଙ୍କ ପକ୍ଷରୁ ହୋଇଥିବା ଅନେକ ବିକାଶ କାର୍ୟ୍ୟକୁ ପ୍ରଶଂସା କରିଥିଲେ ମାନ୍ୟବର ମନ୍ତ୍ରୀ । ସେପଟେ ଅଞ୍ଚଳରେ ହୋଇଥିବା ବିକାଶର ବାର୍ତ୍ତା ନେଇ ଦଳ ଘରେ ଘରେ ପହଞ୍ଚାଇବା ସହ ଆଗାମୀ ସାଧାରଣ ନିର୍ବାଚନରେ ଦଳୀୟ ସଙ୍ଗଠନ କୁ ଅଧିକ ମଜବୁତ କରାଯିବ ବୋଲି ବିଧାୟକ କହିଛନ୍ତି । ବ୍ଲକ ବିଜେଡି ସଭାପତି ପ୍ରମୋଦ କୁମାର ରାଉତରାୟଙ୍କ ସଭାପତିତ୍ୱରେ କାର୍ୟ୍ୟକ୍ରମ ଅନୁଷ୍ଠିତ ହୋଇଥିବା ବେଳେ ଅନ୍ୟତମ ଅତିଥି ଭାବେ ସତ୍ୟବାଦୀ ବିଜେଡି ପର୍ୟ୍ୟବେକ୍ଷକ ପ୍ରମୋଦ ସାମଲଙ୍କ ସହିତ ଅନ୍ୟମାନେ ଯୋଗଦେଇଥିଲେ।