ହାତୀ ଦାନ୍ତ ଚାଲାଣ ବେଳେ ଫସଲ ଫାଟିଲା

ବରଗଡ: ଓଡିଶା ପୁଲିସର ସ୍ୱତନ୍ତ୍ର ଟାସ୍କ ଫୋର୍ସ (ଏସଟିଏଫ) ପକ୍ଷରୁ ଚଢାଉ କରାଯାଇ ହାତୀ ଦାନ୍ତ ଚାଲାଣ ପଣ୍ଡ କରାଯାଇଛି । ଏସଟିଏଫ ରମେଶ ପ୍ରଧାନ ନାମକ ଜଣଙ୍କୁ ଗିରଫ କରିଛି । ରମେଶ ହେଉଛି ବଲାଙ୍ଗୀର ଜିଲ୍ଲା ଲାରାମ୍ଭ ବ୍ଲକର ବାସିନ୍ଦା । ବିଶ୍ୱସ୍ତସୂତ୍ରରୁ ସୂଚନା ମିଳିଥିଲା କି ବରଗଡ ଜିଲ୍ଲା ଗାଇସିଲଟ ନିକଟରେ ବେଆଇନ ହାତୀ ଦାନ୍ତ ଚାଲାଣ ପାଇଁ ପ୍ରସ୍ତୁତି ଚାଲିଛି । ଏହି ସୂଚନାକୁ ନେଇ ଏସଟିଏଫ ପକ୍ଷରୁ ଏହି ରେଡ କରାଯାଇଥିଲା ।
ସର୍ଚ୍ଚ ବେଳେ ଗୋଟିଏ ହାତୀ ଦାନ୍ତ ଓ ଅନ୍ୟାନ୍ୟ ସାମଗ୍ରୀକୁ ଜବତ କରିଛି ଏସଟିଏଫ । ଏହି ହାତୀ ଦାନ୍ତକୁ ନେଇ ଏସଟିଏଫର କୌଣସି ପ୍ରଶ୍ନର ଉତ୍ତର ଦେଇପାରିନଥିଲା ରମେଶ । ତେଣୁ ତାକୁ ଗିରଫ କରି ନେଇଛି ପୁଲିସ । ଏହାକୁ ନେଇ ଯାଞ୍ଚ ଜାରି ରହିଛି ।
ଗତ ଏକବର୍ଷ ଭିତରେ ଏସଟିଏଫ ୨୯ଟି ବାଘ ଛାଲ ଓ ୧୧ଟି ହାତୀ ଦାନ୍ତ, ୨ ହରୀଣ ଛାଲ, ୬ଟି ବଜ୍ରକାପ୍ତା ଓ ୧୫ କେଜି ବଜ୍ରକାପ୍ତା ଛାଲ ଜବତ କରିବା ସହ ୪୩ ଅପରାଧୀଙ୍କୁ ଗିରଫ କରିଛି ।