ରାମଭୀର ସିଂହ ବିଧୁରି ଦିଲ୍ଲୀ ବିରୋଧୀ ଦଳ ନେତା

(ନୂଆଦିଲ୍ଲୀ): ବିଜେପି ପକ୍ଷରୁ ଦିଲ୍ଲୀ ବିଧାନସଭାର ବିରୋଧୀ ଦଳ ନେତାଙ୍କ ନାମ ଘୋଷଣା ହୋଇଛି । ଦିଲ୍ଲୀ ବଦରପୁର ନିର୍ବାଚନ ମଣ୍ଡଳୀର ବିଜେପି ବିଧାୟକ ରାମଭୀର ସିଂହ ବିଧୁରିଙ୍କ ନାମରେ ଦଳ ମୋହର ଲଗାଇଛି । ତାଙ୍କୁ ଦିଲ୍ଲୀ ବିଧାନସଭାରେ ବିଜେପି ପକ୍ଷରୁ ଦୁଇଟି ପଦର ଦାୟୀତ୍ୱ ଦିଆଯାଇଛି । ସେ ବିଧାନସଭାରେ ବିଜେପି ପାଇଁ ବିଧାୟକ ଦଳ ନେତା ଓ ବିରୋଧୀ ଦଳ ନେତା ଭାବେ କାର୍ଯ୍ୟ କରିବେ । ଏନେଇ ଦିଲ୍ଲୀ ବିଜେପି ମୁଖ୍ୟ ମନୋଜ ତିୱାରୀ ସୂଚନା ଦେଇଛନ୍ତି । ବିଧୁରି ଚତୁର୍ଥ ଥର ପାଇଁ ବିଜେପି ଟିକଟରେ ଦିଲ୍ଲୀର ବଦାରପୁର ବିଧାନସଭା ଆସନରେ ବିଜୟୀ ହୋଇଛନ୍ତି । ସୂଚନାଯୋଗ୍ୟ, ଦିଲ୍ଲୀର ୭୦ଟି ବିଧାନସଭା ଆସନରେ ହୋଇଥିବା ନିର୍ବାଚନର ଫଳାଫଳ ଫେବୃଆରୀ ୧୧ ତାରିଖରେ ପ୍ରକାଶ ପାଇଥିଲା । ଏଥିରେ ଆମ୍ ଆଦମୀ ପାର୍ଟି (ଆପ୍) ସର୍ବାଧିକ ୬୨ଟି ଆସନ ଦଖଲ କରିଥିବା ବେଳେ ବିଜେପି ମାତ୍ର ୮ଟି ଆସନରେ ସନ୍ତୁଷ୍ଟ ହୋଇଥିଲା । କଂଗ୍ରେସ ପୂର୍ବଥର ପରି ଚଳିତଥର ମଧ୍ୟ ଖାତା ଖୋଲିବାରେ ବିଫଳ ହୋଇଥିଲା ।